Puhala ke Lagomatai a Lautolu kua Nakai Iloa Mitaki ke Totou

1. Ko e heigoa e paleko he fakaako e Tohi Tapu mo lautolu kua nakai iloa mitaki ke totou?

¹ Ko e tau tagata he kaina ne nakai iloa mitaki ke totou kua liga fiafia ke he tau mena fakaagaaga, ka e liga fuafuakelea a lautolu ke he Tohi Tapu mo e falu tohi. He magaaho fakamua kua liga nakai kautū ke foaki e tohi Fakaako he Tohi Tapu ke he tau tagata pihia. Maeke fēfē a tautolu ke lagomatai a lautolu fakaagaaga? Ne hūhū a mautolu ke he tau tagata fakailoa lotomatala mai he molea e 20 e motu kehekehe ke he puhala ne taute e lautolu. Hanei e tau puhala ha lautolu.

2. Ko e heigoa e tau tohi kua mitaki lahi ke lagomatai e taha kua nakai iloa mitaki ke totou?

² Kaeke ke fakakaupā po ke nakai iloa e tagata fakaako ke totou, liga kamata e koe ke he porosua Fanogonogo ke he Atua po ke Fanogonogo ke he Atua mo e Moui Tukulagi. Taha paionia mai he Tau Faahi Kaufakalataha ne fakakite ke he taha tagata e tau porosua ua ia mo e hūhū age ko e tohi fe kua mitaki ki a ia. Ko e la ofisa i Kenya ne hokotaki ko e tau koloa nei ne kua mitaki lahi ha ko e tau tagata Aferika, kua fa mahani ai ke fakaako he talahau e tau tala ka e nakai he tau fakatutalaaga he tau hūhū mo e tau tali. Kua liga mukamuka ma e tagata ne fai fakaakoaga ke talia e totou mo e hūhū, ka ko e puhala ia kua liga fakafuafuakelea e tagata ne tote e fakaakoaga. Ka maeke e tagata fakaako ke totou, tokologa e tagata fakailoa ne fiafia ke kamata aki e tau porosua Tala Mitaki Mai he Atua! po ke Maeke a Koe mo Kapitiga he Atua! po ke liga Tohi Haaku he Tau Tala Tohi Tapu.

3. Ko e heigoa e tau tuaga ha lautolu kua nakai iloa ke totou ka lagomatai a tautolu ke fakaako fakamitaki a lautolu?

³ Nava Atu: Ko lautolu ne nakaila fakaako ke totou kua liga mā, ti tokologa kua tote e mauokafua. Fa mahani ai ko e lagomatai a lautolu ke fakatotoka ko e lakaaga fakamua ke fakaako ki a lautolu e kupu mooli. Laulahi he tau tagata ne nakai iloa ke totou kua iloilo mo e maeke ke fakaako. Fakakite ki a lautolu e fakalilifu ne kua latatonu, mo e fehagai fakamitaki ki a lautolu. (1 Pete. 3:15) To omoomoi a lautolu ke matutaki ke fakaako kaeke kua logona hifo e lautolu kua uho e tau laliaga ha lautolu ti kua holo ki mua fakaagaaga ai. Ti fakamakai he nava atu ki a lautolu.

4. Fakamafana fēfē e tautolu a lautolu kua fakakaupā e puhala totou ke mautauteute ma e fakaakoaga?

⁴ Pete ka fakakaupā e puhala totou he tagata fakaako, fakamafana a ia ke mautauteute ma e fakaako haana. Falu tagata fakailoa i Aferika Toga ne fakamafana e tau tagata fakaako ha lautolu ke ole ke he taha he magafaoa po ke kapitiga ne iloa mitaki ke totou ke lagomatai. Ko e tagata fakailoa i Peritania ne omoomoi e tau tagata fakaako haana ke mautauteute he age ki a lautolu e tohi haana ma e falu paratafa he mogo ne fakaako ai ke kitia e lautolu kua mukamuka lahi ke moua e tau tali ka fakamailoga ai. Taha matakainaga taane i Initia ne fakamafana e tau tagata fakaako haana ke onoono ke he tau fakatino he fakaakoaga he tapu hake mo e manamanatu fakahokulo ki ai.

5. Fakatātā fēfē e tautolu e fakauka ka taute e fakaakoaga?

⁵ Kia Fakauka: Pete ne tohi kua fakaaoga e koe, hagaaki ke he tau matapatu manatu, mo e lagomatai e tagata fakaako haau ke maama mitaki ai. He kamataaga, liga mitaki e tau fakatutalaaga ne 10 ke he 15 e minuti. Ua lali ke lahi e vala tala ka tutala ki ai, liga gahoa ni e paratafa he tau fakaakoaga takitaha. Kia fakauka ka fakatuai e totou he tagata fakaako. To liga omoomoi a ia ke fakatolomaki ki mua e lotomatala haana ke totou he feaki e ia e loto fakaaue ma Iehova. Ke lagomatai e tagata fakaako haau ke taute pihia, kua mitaki ke uiina a ia mai he kamataaga ke fina atu ke he tau feleveiaaga.

6. Maeke fēfē ia tautolu ke lagomatai e tau tagata ke iloa ke totou?

⁶ Kaeke ke iloa e tau tagata fakaako he Tohi Tapu ke totou, to mafiti a lautolu ke holo ki mua fakaagaaga. (Sala. 1:1-3) Tokologa ne lagomatai e tau tagata fakaako ha lautolu he fakaaoga e tohi Apply Yourself to Reading and Writing he tau minuti gahoa he fakahikuaga he tau fakaakoaga takitaha. Kaeke kua fakalolelole e tagata fakaako, liga maeke a koe ke atihake e mauokafua haana he talahau e falu mena ne kua iloa e ia ke taute. Fakamafana ki a ia to fakamonuina e Iehova e tau laliaga haana, ti fakamalolō a ia ke liogi ma e lagomatai. (Fakatai 16:3; 1 Ioa. 5:14, 15) Falu tagata fakailoa i Peritania ne fakamafana e tau tagata fakaako ha lautolu ke fakatoka e tau foliaga kua lata ka e holo ki mua​—liga fakamua ke iloa mitaki e alafapete, ti kumi mo e totou e tau kupu Tohi Tapu ne fifili, mo e fakahiku ai ke totou mai he tau tohi faka-Tohi Tapu kua fakamukamuka. Ke lagomatai e tau tagata ke fakaako ke totou kua fa putoia e omoomoi ki a lautolu ke manako ke taute ai, nakai ni ko e fakaako a lautolu ke totou.

7. Ko e ha kua nakai lata ia tautolu ke mataofi mai he fakakite age e kupu mooli ki a lautolu kua nakai iloa mitaki ke totou?

⁷ Nakai onoono hifo a Iehova ke he tau tagata ne tote e fakaakoaga. (Iopu 34:19) Ko e loto he tagata ne kua kumi a Iehova ki ai. (1 Nofo. 28:9) Ti ua mataofi he fakakite age e kupu mooli ki a lautolu kua nakai iloa mitaki ke totou. Ha ha ia koe e loga he tau koloa mitaki ke kamata aki. Fakahiku ai, ti maeke a koe ke hiki e fakaakoaga ke he tohi Fakaako he Tohi Tapu mo e fakalahi atu e maamaaga haana ke he tau Tohiaga Tapu.