Tau Mena Tutupu Mai he 2011 Yearbook

REPAPILIKI A TOMINIKA

Lau 59, paratafa 1-2

Fakamatala ke he Numera-Hepe

Loga e tau hea telefoni hepe ne moua he matakainaga fifine ti fakatauhele e gahua haana. Fai aho he mole, ne manatu a ia, ‘Maeke au ke fakaaoga e mogo fakatauhele nei ke fakamatala. Taute fēfē e ia? He tali atu ke he tau numera hepe, ne fakamolemole atu a ia ha kua hepe e numera ne vilo he tagata, ka e lafi ai e ia, “Manako au ke hūhū atu ki a koe, Kua totou nakai e koe e Tohi Tapu he aho nei?” Pete ne tuku hifo e falu, tokogahoa ne tali kua nakaila totou e lautolu e Tohi Tapu. Ti hūhū mogoia a ia, “Iloa nakai e koe ko e ha kua aoga lahi ai?” Ke foaki e tali Tohi Tapu, kua totou e ia e Salamo 1:1-3. Taha e tagata gahua fakatufono ne loa e tutala mo e matakainaga fifine ti tala age ki ai kua nakai fai Tohi Tapu a ia. Ne taute e tau fakatokaaga ke uta e Tohi Tapu mo e falu tohi faka-Tohi Tapu ki a ia. Ua e faahi tapu he mole ne hea telefoni atu a ia, mogonei ke fakaaue ke he matakainaga fifine ha ko e haana fiafia mo e tau tohi.

Taha numera hepe foki, ne hūhū e fifine fuata, “Ko koe kia taha he Tau Fakamoli a Iehova?” He tali e matakainaga fifine ko ia, ne kamata e fifine ke tagi he fakamaama ko e tagata fakailoa nakai malolō fakaagaaga a ia. Ne fakamafana he matakainaga fifine a ia mo e fakatokatoka ma e taha tagata ke lagomatai fakaagaaga a ia. Ko e fifine mogonei ko e tagata fakailoa ne liu malolō fakaagaaga.

AUSETALIA

Lau 70, paratafa 7

Loga e Tau Tuleke

Ko Nathan ne 12 e tau, ne uta fano e ia e tau tuleke faka-Tohi Tapu he kato aoga haana ti fakamatala tumau a ia ke he tau kapitiga haana he aoga. Taha aho, he fano hui ki kaina he aoga, ne kitia e ia e fifine fuakau ne tū he faahi mua he fale haana. Ne mamali e fifine, ti mamali atu a Nathan ti age ki a ia taha he tau tuleke haana. Ti tala age e fifine ki a Nathan kua tolu tuai e tau he mate e taane haana. Ne oho hifo a Nathan ke he kato haana mo e eke mai e tuleke Ko e Heigoa e Amaamanakiaga ma e tau Fakahelehele Kua Mamate? Ne puke e tau mata he fifine he tau hihina mata he tala age a Nathan ki a ia hagaao ke he liu tu mai ka liu a ia ke kitia e taane haana he Parataiso. “Ka e ato a fe ke fakaotioti e tau matematekelea?” he hūhū ai he fifine. Ne oho hifo a Nathan ke he taha tuleke foki, Tau Matematekelea Nakai Leva to Fakaoti! Ne hūhū mogoia e fifine ki a Nathan ko e heigoa foki haana ne talitonu. Ti age foki e ia e taha tuleke he kato haana, Ko e Heigoa e Tau Taofiaga he Tau Fakamooli a Iehova? He mole e mena ia ti fano a Nathan. Fai faahi tapu he mole ne liu a ia kitia e fifine he faahi mua haana. Ne hea atu a ia ki a Nathan ke hau ti kaputi atu ki a ia. “Iloa nakai e koe ma Nathan?” he ui e ia. “Mole he mai e koe e tau tuleke ia ki a au, tokoua e fifine Fakamoli ne aahi mai ki a au, ti fakaako au mogonei he Tohi Tapu mo laua!”