Tau Mena Tutupu Mai he 2012 Yearbook
NOUE
Lau 114, paratafa 1, ke he lau 116, paratafa 1
Tau Toga Kua Lagomatai ke Fakapotopoto e Moto Tagata Tokologa
Ko e kamataaga he gahua fakamatala i Noue, ko e amaamanakiaga ke fakamatala ke he tau tagata ne nonofo he tau aelani loga mo e tau matakavi mamao he tau kaukau tahi, ko e gahua makimaki. Ko e mena ia, he 1928 ne fakatau he la ofisa e toga enisini, ne lahi ke nonofo ai ua po ke tolu e paionia, ti maō foki ke lata mo e tau kaukau tahi hagahaga kelea ha Noue. Ka ko hai kua pulotu ke ikivaka e toga pihia? Kua fiafia e paionia iloilo ko Karl Gunberg ke taute. Ko e gahua toga (navy) fakamua haana mo e lotomatala ha ko e faiaoga ke he tau hala tahi mo e pulagi (navigation) kua to lahi e aoga. Ko e toga fakamua, ne fakahigoa ko Elihu, ne kamata fenoga mai i Oslo ti fina atu ke he faahi toga, mo e tū fakahaga he tau uaafo kehekehe he kaukau tahi. Ka e he taha pō havili lahi he vahā makalili he 1929, ne malona kelea e Elihu he kavi tata atu ki Stavanger. Fakaaue ha kua hohoko oti ki uta mo e haohao mitaki e tau matakainaga he toga.
He 1931 ne moua foki he tau matakainaga taha toga, ne fakahigoa e lautolu ko Ester. Ne liu foki a Karl tuku fenoga atu, mo e tokoua e matakainaga taane ne lagomatai. Ne holo e Ester ke he tau matakavi he faahi lalo mo e faahi tokelau ha Noue ke he fitu e tau i mua. He 1932, ne logona hifo e Karl kua “motua lahi a ia ke liu atu he tau fenoga pihia.” Ati hiki a ia ki uta ke gahua paionia he faahi uta ha Noue ka e toka e toga ki a Johannes Kårstad. He 1938 ne hukui he toga ne fakahigoa ko Ruth e toga ko Ester, ti fakaaoga ai ato hoko ke he 1940 he mogo ne fakaoti he Felakutaki II he Lalolagi e gahua fakamatala o toga. Ko e tau paionia o toga ne fakamatala ke he laulahi he tau matakavi mo e toka foki e lautolu loga e tohi. He 1939 ko e tau matakainaga taane tokoua he Ruth, ko Andreas Hope mo Magnus Randal, ne pehē ai he taha ni e tau, ne foaki e laua molea e 16,000 tohi, tau tohi ikiiki mo e tau mekasini mo e fakatagi foki laga 1,072 e lauga lapa kofe ke he 2,531 e tagata fanogonogo.
Lafi ke he tau mena mitaki loga fakaagaaga ne tutupu, ne kitia foki he tau matakainaga he toga e tau matakavi ofoofogia. “He taha aho mo e taha aho ne fenoga atu a maua ke he faahi tokelau,” he talahau e Andreas Hope, “o viko ai he tau vala tahi he vahāloto he tau mouga tokoluga. Ko e takatakai ia kua fulufuluola, ofoofogia, mo e vao vihi.” He vahā makalili, ko e faahi tokelau he Arctic Circle, ne ofomate a laua ha ko e “kikila ofoofogia he maama he faahi tokelau [aurora borealis].” Mo e he vahā mafana kua hegia e tau mata ha laua ha ko e “kikila he laā he tuloto pō.”
Lau 151, paratafa 3; lau 153, paratafa 1 mo e 2
Taha he tau tagata lauga he fonoaga faahimotu i Trondheim he 1957 ne fakamafana e tau tagata fakailoa ke manamanatu ke hiki atu ke he matakavi ne manako lahi ke he tau tagata fakamatala. Ko Viggo mo Karen Markussen, ne nonofo i Stavanger, ne fanogonogo fakamitaki, ti neneke atu e Viggo e tulilima haana ki a Karen. Ne mailoga agataha e Karen e kakano he mena ia. ‘Kua totou tuai e tau aho ha maua ne toe i Stavanger,’ he manatu e Karen. Ka ko e heigoa la he tau tama fifine tokotolu ha laua, ne ko e tau tagata fakailoa ne vahāloto he 11 mo e 14 e tau tau moui, ka manatu ke he hikiaga?
Magaaho ne fakatutala e magafaoa Markussen ke he lauga ia he oti e fonoaga, ne talia he magafaoa katoa kua maeke ia lautolu ke fakaatā a lautolu ke fekafekau he matakavi ne manako lahi ke he lagomatai. He tali ke he tohi ha lautolu, ne ole e la ofisa ke hiki a lautolu ki Brumunddal, ne nakai fai fakapotopotoaga i ai. Ati he 1958, ne sela e Viggo mo Karen e fale foou ha laua, sela e Viggo haana fale koloa fakafua mena tuga e tau laulau, ti hiki atu e magafaoa ke he fale akau ne tata ki Brumunddal. Ne fakamonuina e Iehova e aga foaki noa ha lautolu, ti hoko ke he tau tau fakamui, ne tokologa ne fakaako mo lautolu ne o mai ke he kupu mooli. He magaaho ne toka he fanau fifine e kaina mo e kotofa a Viggo mo Karen ke gahua he takaiaga, kua ha ha i ai e fakapotopotoaga tote ka e makutu ne kavi ke he 40 e tagata fakailoa i Brumunddal.
Kua maeke foki e tau fuata taane nonofo tokotaha ke fakalaulahi atu e tau mena he Kautu he hiki atu ke he tau matakavi ne nakai fai fakapotopotoaga i ai. He 1992 ko e matakau he tau matakainaga taane paionia, laulahi ia lautolu ne taki 19 e tau tau moui, ne hiki atu ki Måløy, he Nord Fjord, ke fakakia a lautolu ne fiafia i ai. Ne eketaha a lautolu ke he gahua fakamatala mo e kamata he mogoia ni ke taute e tau feleveiaaga he fale nonofo totogi ha lautolu. Ko e fifine ne fiafia foou laia ne fakaako mo lautolu ne fakamokoi lahi ti tuga e matua fifine ke he tau matakainaga taane fuata. Fai magaaho he mole, ko e motua mo e hoana haana ne hiki atu ki Måløy mo e fakatū ai e fakapotopotoaga. Ne fiafia lahi e tau matakainaga fuata taane ke he kotofaaga ha lautolu, ne loga e fakaako Tohi Tapu ne taute, leveki e loga he tau kotofaaga he fakapotopotoaga, mo e fakamalolō e fakapotopotoaga foou kua makutu. “Ko e fenoga fakaagaaga mo e magaaho mitaki a ia ke tupu fakaagaaga,” he talahau he taha fuata taane. Ko e fua he gahua malolō ha lautolu nei mo e falu, kua kavi ke he 30 e tagata fakailoa mogonei he Fakapotopotoaga Nord Fjord, ti kua taute e lautolu kavi 50 ke he 60 e fakaako Tohi Tapu.
RUANATA
Lau 170, paratafa 1, ke he lau 171, paratafa 3
Liu Mai e Tagata Motu
He magaaho ia, ko Gaspard Rwakabubu, ko e tagata Ruanata, ne gahua makeniki he tau matakavi keli apakula i Congo. Ne talahau e ia: “He 1974, ne fina atu au he Aoga Fekafekau he Kautu i Kolwezi. Taha he tau faiaoga ko Michael Pottage, ne pehē kua kumi e la ofisa i Kinshasa ke he taha motua Ruanata kua makai ke liu ke he motu mooli haana ke lagomatai e gahua fakamatala. To makai nakai au ke fano? Pehē au to fakatutala au mo e hoana haaku ko Melanie.
“He mogoia, ko e foaki mai laia he takitaki gahua haaku he kamupanī keli apakula e uiina ke fano ki Sihamani ke fakaako. Ne holo mitaki au he gahuaaga, ti hake tumau e totogi haaku. Pete ia, ne fiha ni e aho ti taute e maua e fifiliaga. Ne tala age au ke he Matakainaga Pottage to talia e maua e uiina ke liliu atu ki Ruanata. Ne nakai maama he takitaki gahua haaku e fifiliaga nei. ‘Ko e ha a koe ne nakai maeke ai ke eke mo taha he Tau Fakamoli a Iehova hinei?’ he hūhū e ia. ‘Ko e ha ne lata ai a koe ke liu ki Ruanata?’ Ne lali foki e tau matakainaga manamanatu mitaki ke hiki e manatu haaku. Pehē a lautolu: ‘Na fā e tama haau. Totou e Luka 14:28-30, nofo hifo ti manamanatu ki ai.’ Pete ia ne nakai maueue a maua.
“Ne totogi he takitaki gahua haaku e tau puhala vakalele ha mautolu oti ke liliu ki Ruanata. Mogo ne hohoko a mautolu ki Kigali, ia Me 1975, ne nonofo totogi a mautolu he fale piliki ne taute mai he kelekele mo e foloa kelekele, kehe mai he fale ha mautolu ne puke he tau koloa he mogo ne gahua au he kamupanī keli apakula. Pete ia, nukua mautali a mautolu ti eketaha a mautolu ke kautu.”
Ha kua fakaaoga he tau paionia pauaki mai he falu motu e vagahau Swahili ke fematutakiaki, ne tokologa e tagata ne manatu kua o mai e tau paionia ke fakaako atu he vagahau ia. Ka ko e tau manatu ia kua hiki he mogo ne hohoko mai a Gaspard mo e haana magafaoa, ha kua maeke ia lautolu ke fakaako e tau tagata ke he kupu mooli he Kautu he fakaaoga e Tohi Tapu Kinyarwanda.
Lafi ki ai, ne fakaliliu he Matakainaga Rwakabubu e tohi tote ne 32 e lau ‘Ko e Tala Mitaki nai he Kautu’ ke he vagahau Kinyarwanda. Ne taute fakailoa ai he 1976 ti tokologa ne fiafia ki ai. Ne totou ai he tau tagata he tau pasi mo e tau puhalatū. Ko e fakaaogaaga he higoa ha Iehova ne takitaki atu ke he tau fakatutalaaga loga.