Ua Fakakaupā a Koe—Fahia ke he Tau Logonaaga Lolelole
1. Ko e ha ne fa tautaofi ai e falu ke foaki e fakaako Tohi Tapu?
1 Kua tautaofi kia a koe ke foaki e fakaako Tohi Tapu ha kua nakai mauokafua a koe ke he haau a lotomatala ke taute fakamitaki ai? He falu mogo ko e tau fekafekau tua fakamooli he vahā fakamua, tuga a Mose mo Ieremia, ne logona hifo kua nakai hokotia e iloilo ma e tau kotofaaga ha lautolu. (Esoto 3:10, 11; 4:10; Iere. 1:4-6) Ti ko e tau logonaaga pihia kua fa mahani mau. Kautū fēfē mai he tau logonaaga pihia?
2. Ko e ha kua nakai lata ke fiafia ni a tautolu ke fakakaupā e fekafekauaga ke fakamatala he taha fale ke he taha fale ka e toka e fakaako Tohi Tapu ke taute he falu?
2 Kua lata ia tautolu ke manatu to nakai ole a Iehova ki a tautolu ke taute ha mena kua nakai maeke ia tautolu. (Sala. 103:14) Ti ko e poakiaga ha tautolu ke ‘taute tutaki,’ ‘fakaako atu kia lautolu,’ ko e matagahua kua maeke ia tautolu ke taute. (Mata. 28:19, 20) Nakai ko e kotofaaga ne foaki age e Iehova ki a lautolu ni ne iloilo mo e mahomo atu e tau taleni. (1 Kori. 1:26, 27) Ko e mena ia, kua nakai lata ke fiafia ni a tautolu ke fakakaupā e fekafekauaga ke fakamatala he taha fale ke he taha fale ka e toka e fakaako Tohi Tapu ke taute he falu.
3. Fakaatā fēfē e Iehova a tautolu ke taute e gahua fakaako Tohi Tapu?
3 Fakaatā e Iehova a Tautolu: Ko e lotomatala ha tautolu ke taute tutaki na mai e Iehova. (2 Kori. 3:5) Puhala mai he haana fakatokatokaaga ne fakaako e ia a tautolu ke he tau mena mooli he Tohi Tapu ne nakai iloa he laulahi he tau tagata pulotu he lalolagi nei. (1 Kori. 2:7, 8) Ne tohia e ia e fakamauaga he tau puhala fakaako he Faiaoga ne Mua ko Iesu, ma tautolu ke fifitaki, ti matutaki a ia ke foaki mai e tau fakaakoaga ki a tautolu puhala mai he fakapotopotoaga. Lafi ki ai, nakai toka noa e Iehova a tautolu ke fakatutū ni e tautolu e tau puhala ke fakaako aki e Tohi Tapu. Ne foaki mai e ia e tau koloa, tuga e tohi Fakaako he Tohi Tapu, ne fakakite fakatotoka mai e kupu mooli he puhala kua fai kakano mo e mukamuka ke maama. Ko e takitakiaga he fakaako Tohi Tapu liga nakai paleko ke tuga he manatu e tautolu.
4. Ko e ha kua maeke ia tautolu ke mauokafua to lagomatai e Iehova a tautolu?
4 Maeke a Mose mo Ieremia ke taute e tau kotofaaga ha laua ha ko e lagomataiaga ha Iehova. (Esoto 4:11, 12; Iere. 1:7, 8) Maeke foki a tautolu ke ole ki a Iehova ke lagomatai. Ha ko e magaaho ka taute e tautolu e fakaako Tohi Tapu, kua fakaako e tautolu taha tagata ke he kupu mooli hagaao ki a Iehova, ko e mena ke fiafia ai e Atua. (1 Ioa. 3:22) Ko e mena ia, kia eke e gahua fakaako Tohi Tapu mo foliaga haau, ko e vala fai fua mitaki mo e olioli he fekafekauaga.