Aua Neke Lamakai!
1. He puhala fe ke “aua neke lamakai e [tautolu] e mena mitaki”?
1 He fakalataha fakamakutu he fakapuloa e tala mitaki he Kautu he Atua, kia “aua neke lamakai e [tautolu] e mena mitaki” mai ia lautolu he tau matakavi ne kotofa ki a tautolu. (Fakatai 3:27) Ko e fekau naia ne mua atu ke talahau ke he tau tagata ko e tau magaaho mitaki ke o mai ki lalo he pule he Atua. Pete he liga fakamokoi a koe he talahau e amaamanakiaga he Kautu he fakamatala nakai mautali po ke toka e tohi, ko e ha he eke mo foliaga ke taute e fakaakoaga Tohi Tapu, ka nakai la taute pihia e koe?
2. Liga ko e heigoa ka mataofi a tautolu mai he kamata e fakaakoaga Tohi Tapu?
2 He falu magaaho, ko e taha he tau fakatauhele makimaki ke taute e fakaakoaga Tohi Tapu ko e logonaaga ha tautolu hagaao ke he matakupu. Falu ne lamakai po ke, mataofi mai he taute e fakaakoaga Tohi Tapu ha kua temotemoai e logonaaga po kua lavelave e fakaholoaga ha lautolu. Ko e tau manatu nā i lalo ka liga lagomatai a koe ke nakai taofi mai he fakalataha ke he gahua fakaako Tohi Tapu.—Mata. 28:19; Gahua 20:20.
3. Ko e ha kua lata a tautolu ke fakaako atu e Tohi Tapu?
3 Tote e Mauokafua: Liga temotemoai e fakaakoaga fakalalolagi haau po ke falu kakano ne tote e mauokafua ke he lotomatala haau ke taute e fakaakoaga Tohi Tapu. Ko e tau fekafekau Kerisiano lauia mitaki he senetenari fakamua ne ‘nakai ako mo e goagoa.’ Ko e heigoa ne fakamalolō a lautolu ke fakaako e kupu mooli ke he falu? “Ne fakalataha [a lautolu] mo Iesu.” (Gahua 4:13) Ne ako a lautolu mai he Faiaoga ne Mua, ko Iesu, nukua fakamau ai e tau fakaakoaga mo e tau puhala ma tautolu he tau Tohiaga Tapu. Kaeke foki ke temotemoai e fakaakoaga fakalalolagi haau, kua moua e koe e fakaakoaga fakaagaaga ne mua ue atu.—Isaia 50:4; 2 Kori. 3:5.
4. Ko e heigoa ka ako e tautolu mai he fakafifitakiaga ha Amosa?
4 Ne fa fakaaoga e Iehova e tau perofeta ke fakatonu e tau pule mahani kelea po ke falu he tau tutūaga tokoluga. Falu, tuga a Amosa, ne tokolalo e feakiaga. Ne talahau e Amosa: “Nakai ko e perofeta au, nakai ko e tama foki au he perofeta; ka ko e leveki manu au, mo e tagata gahua ke he tau sukamora.” (Amosa 7:14) Ka e, nakai mataofi a Amosa ke fakailoa e fekau he fakafiliaga a Iehova ke he ekepoa tapuaki punua povi ko Amasia. (Amosa 7:16, 17) Kua lata a tautolu ke manatu tumau hane taute e tautolu e gahua he Atua ti to foaki e ia e iloilo ki a tautolu ma e gahua he mogonei.—2 Timo. 3:17.
5. Ko e ha ne lata a tautolu ke lali ke kamata e fakaakoaga Tohi Tapu pete ne fakaholoaga lavelave ha tautolu?
5 Fakaholoaga Lavelave: Pete ne fakaholoaga lavelave haau, kua liga fitā he fakatoka kehe e koe e magaaho ke fakalataha tumau he fekafekauaga. Ko e taute e fakaakoaga Tohi Tapu kua eke mo taha he tau vala fiafia lahi he fekafekauaga. Ko e monuina ke kitia e Kupu a Iehova hane gahuahua he moui he tagata. (Hepe. 4:12) Kua fiafia a Iehova ka taute e tautolu e tau foakiaga fakatagata ke maeke ke lagomatai e taha tagata ke ‘hokotia he maama ke he kupu moli.’ (1 Timo. 2:4) Ne moua foki he tau agelu e olioli he magaaho ne tokihala e taha tagata he haana mahani fakamua mo e tupu ki mua fakaagaaga.—Luka 15:10.
6. Ko e heigoa e kotofaaga kua ha ha ia tautolu he taute e finagalo he Atua?
6 “Kua finagalo [e Atua] ke fakamomoui e tau tagata oti kana, mo e hokotia a lautolu he maama ke he kupu moli.” (1 Timo. 2:4) Ko e kotofaaga lilifu mooli ne moua e tautolu ke gahua fakalautatai mo e finagalo he Atua, he nakai lamakai mai he taute e tau fakaakoaga Tohi Tapu!