Ua Fakakaupā a Koe—Fehagai mo e Setulu Lavelave
1. Ko e ha ne fakauaua e falu ke foaki e fakaako Tohi Tapu?
1 Kua fakauaua e falu ke foaki e fakaako Tohi Tapu ha kua lavelave e tau setulu ha lautolu. Lata ke fai magaaho ke leveki a ia ne fakaako Tohi Tapu. Lata ke fai magaaho ke tauteute ma e fakaako, ke taute ai, mo e ke lagomatai e tagata fakaako ke fehagai mo e tau mena vihi haana ni. Pehē e aposetolo ko Paulo ne foaki e ia haana moui ke lagomatai a lautolu i Tesalonia ke iloa a Iehova. (1 Tesa. 2:7, 8) Taute fēfē e tautolu e fakaako Tohi Tapu pete ni ka lavelave e setulu ha tautolu?
2. Maeke fēfē he fakaalofa ki a Iehova ke lauia e puhala ne fakaaoga e tautolu e tau magaaho ha tautolu?
2 Fai Magaaho ke Lata mo e Tapuaki: Ko e talahauaga mooli, kua lata pauaki ke fai magaaho ma e tapuakiaga. Ma e fakatai, na fakatoka tumau e tautolu e magaaho ke fakalataha ke he tau feleveiaaga, taute e gahua he fonua, totou e Tohi Tapu, mo e liogi. Ko e tagata lavelave ne fai tokoua, to fiafia ke fakatoka taha magaaho ma e hoa haana. Kua latatonu ha ia ha tautolu ke makai ke “fakaaoga” po ke fakatau e magaaho ke tapuaki ki a Iehova ha kua fakaalofa a tautolu ki a ia. (Efeso 5:15-17; 1 Ioa. 5:3) Pehē a Iesu, ko e vala aoga lahi he tapuakiaga ha tautolu ko e gahua taute tutaki. (Mata. 28:19, 20) Ko e manamanatu ke he mena nei ka lagomatai a tautolu ke ua tautaofi ke talia e matagahua fakaako Tohi Tapu.
3. Maeke fēfē a tautolu ke leveki e tagata fakaako Tohi Tapu kaeke kua fakatauhele e setulu ha tautolu ma e fekafekauaga?
3 Ka e kua ka fakatauhele e tau setulu ha tautolu ha ko e tau gahua, tau gagao hololoa, po ke tau kotofaaga fakateokarasi? Ko e falu tagata fakailoa ne fa lata pauaki ke ō kehe he falu magaaho ne taute ha lautolu a fakaako Tohi Tapu he telefoni po ke matutaki he komopiuta. Ko lautolu kua lauia e tau setulu ha ko e tau gagao hololoa, kua taute e fakatokaaga ke hau e tagata fakaako ke he kaina haana ke taute e fakaakoaga. Falu kua taute e tau fakatokaaga ke maeke he taha tagata fakailoa ke eke mo hukui haana mo e lagomatai ke taute e fakaakoaga ka nakai maeke ia ia.
4. Ko e heigoa e tau monuina ka tupu mai he taute e gahua fakaako Tohi Tapu?
4 Ne fiafia lahi a Paulo he foaki e magaaho mo e malolō haana ke lagomatai falu ke iloa e kupu mooli. (Gahua 20:35) He manamanatu a ia ke he fua he tau gahua haana i Tesalonia, ne omoomoi a ia ke fakaaue ki a Iehova. (1 Tesa. 1:2) Ko e olioli mo e fiafia ha tautolu he fekafekauaga kua maeke ke holo ki mua ka nakai fakaatā e tautolu e setulu lavelave ha tautolu ke fakakaupā a tautolu mai he gahua fakaako Tohi Tapu.