Eke mo Foliaga Haau ke Taute e Fakaakoaga Tohi Tapu
1 “Haga hake a ha mutolu a tau mata, mo e kitekite ke he fonua kua hina mai nai ke he heleheleaga saito.” (Ioane 4:35) Ko e tau kupu ia kua vagahau e Iesu Keriso kua moolioli ke aoga ke he tuaga ne fehagai mo e tau fekafekau Kerisiano he vahā nei.
2 Ko e tau tagata loto fakamooli ne manako ke fakaako ke he puhala a Iehova kua moua agaia. Kua kitia mooli e mena nei ke he numera he tau tutaki foou ne papatiso he tau tau takitaha. Ka manako mooli a koe ke taute e fakaakoaga Tohi Tapu, ko e heigoa haau ka taute?
3 Fakatoka e Foliaga: Fakamua, fakatoka e foliaga ke kamata mo e taute tumau taha fakaakoaga Tohi Tapu. Kia tokaloto e foliaga haau he fakalataha a koe ke he fekafekau he fonua. Ha kua putoia e poakiaga Kerisiano ha tautolu ke he fakaako atu, fakalataha mo e fakamatala, kua lata ia tautolu oti ke tutuli ke taute fakalahi e gahua fakaako Tohi Tapu.—Mata. 24:14; 28:19, 20.
4 Falu Manatu ke Tokaloto: Ko e liogi mai he loto kua lata ma e tau tagata fakailoa he Kautu. He falu magaaho kua moua e tautolu e tau tagata kua liogi ma e lagomatai fakaagaaga. Ko e fakamonuina mooli ha ia ke fakaaoga e Iehova ke kumi mo e fakaako a lautolu ia!—Hakai 2:7; Gahua 10:1, 2.
5 Ne liogi e matakainaga fifine ma e fakaakoaga Tohi Tapu ti fakatātā e ia he mena ne gahua ai e tau lagaki he tuleke Manako Nakai a Koe ke Iloa Lahi e Tohi Tapu? He magaaho ne lagaki he fifine taha he tau tuleke, totou katoa ai, ti kamata ke fakapuke e kupono, ne tutala e matakainaga fifine ki a ia ati kamata e fakaakoaga Tohi Tapu.
6 Ko e tau tagata fakailoa fakahele ne lauia mitaki he kamata mo e taute e tau fakaakoaga Tohi Tapu ka lagomatai a koe ke hokotia ke he foliaga haau ke taute e fakaakoaga Tohi Tapu. Liogi he kumi taha, ti fakaaoga e tau lagomatai oti ne fakatoka mai ke hokotia ke he foliaga nei. Liga to nakai leva ti moua e koe e olioli he taute e fakaakoaga Tohi Tapu.