Maeke a Koe ke Faiaoga!
1. Ko e heigoa e kotofaaga uho ne tuku ki mua he tau tagata fakailoa oti he Kautu?
1 Taha he tau faahi ne palepale lahi he fekafekauaga ko e fakaako e taha tagata ke he kupu mooli. He kitia a ia kua talia e fekau he Kautu mo e lagomatai a ia ke fakatata atu ke he Pule Katoatoa he lagi mo e lalolagi ko e logonaaga ke tokiofa. (Iako. 4:8) Ke fakaako taha ne hoge ma e kupu mooli mo e kitia a ia ne kamata ke taute e tau hikiaga aoga ke he aga, onoonoaga, mo e mahani haana kua lata ke eke mo foliaga he tau tagata fakailoa oti he Kautu.—Mata. 28:19, 20.
2. Ko e ha e falu ne liga mataofi he taute e fakaakoaga Tohi Tapu, ti ko e heigoa ka lagomatai a lautolu ke kautū ke he lekua nei?
2 Falanaki ki a Iehova: He tau vahā kua mole, ne fakauaua e tau fekafekau tua fakamooli ke he tau lotomatala ha lautolu ke taute e poakiaga ha lautolu. Ko e falanaki ki a Iehova ko e Atua ati maeke ia Mose, Ieremia, Amosa, mo e falu tagata noa ke kautū mai he tau fakauaua po ke tau manatu fakalolelole ni ha lautolu mo e taute e gahua aoga lahi. (Esoto 4:10-12; Iere. 1:6, 7; Amosa 7:14, 15) Ko e aposetolo ko Paulo foki ne ‘fakamalolo ke vagavagahau atu.’ Fēfē? Ne talahau e ia “ha ko e Atua ha tautolu.” (1 Tesa. 2:2) E, kua maeke ia tautolu oti ke falanaki ki a Iehova ke foaki e lagomatai, pulotu, mo e malolō kua lata ke taute e tautolu e tau fakaakoaga Tohi Tapu kua holo ki mua.—Isaia 41:10; 1 Kori. 1:26, 27; 1 Pete. 4:11.
3, 4. Ko e heigoa e fakamahaniaga kua fakatoka ke lagomatai a tautolu ke fakaako atu e Kupu he Atua?
3 Talia e Fakamahaniaga: Ko e ha tautolu a Faiaoga Homo Ue Atu, ko Iehova ko e Atua, kua foaki e fakamahaniaga puhala he fakaholoaga fakaako fakaagaaga ke maeke ia tautolu ke katoatoa e lotomatala ko e tau faiaoga. (Isaia 54:13; 2 Timo. 3:16, 17) He talia e fakamahaniaga nei he fakaaoga katoatoa e tau magaaho ke fakatupu e maamaaga haau ke he tau Tohiaga Tapu mo e fakaholo ki mua e lotomatala haau ke fakaako e tau kupu mooli he Tohi Tapu. Pete ko e matapatu kakano anei he Aoga Fekafekau Fakateokarasi mo e Feleveiaaga Fekafekau, kua fakamahani he tau feleveiaaga oti he fakapotopotoaga a tautolu ke fakaako mai he Kupu he Atua.
4 Eketaha ke iloa e tau puhala mukamuka ke fakaako foki e tau mena hokulo fakaagaaga. Ko e tohi Ministry School, lau 227, ne fakamaama: “Kua latatonu ke maama mitaki e koe e matakupu haau ke maeke ia koe ke talahau ke he puhala ke maama he falu.” Ko e tali hake he tau feleveiaaga ka lagomatai a tautolu ke tokaloto e tau matapatu manatu ke fakaaoga he tau magaaho i mua. Kia tauteute fakamitaki, mo e to tupu ki mua e mauokafua haau ke he lotomatala haau ke fakaako.
5. Ko e heigoa e falu fakamahaniaga ha tautolu i loto he fakapotopotoaga ke lagomatai a tautolu ke holo ki mua ko e tau faiaoga?
5 Mai he kamataaga, ne nakai fakauaua kua ako e tau fekafekau Kerisiano mai he taha he fakalataha tokoua ke he gahua taute tutaki. (Luka 10:1) Ka maeke, fakatauō mo e tau tagata fakailoa ne iloa lahi, putoia e tau paionia, tau motua, mo e tau leveki faifano, he gahua fakaako Tohi Tapu. Mailoga e puhala ne fakaaoga e lautolu e tau fakataiaga mukamuka mo e falu puhala fakaako ne ha ha i loto he tau tohi fakaako ha tautolu ke fakamaama aki e tau kupu mooli he Tohi Tapu. Hūhū ki a lautolu ke moua falu puhala ke maeke ia koe ke eke mo faiaoga mitaki. (Fakatai 1:5; 27:17) Kia loto fakaaue ke he tau fakamahaniaga oti pihia—ko e tau fakamahaniaga ne foaki mai he Atua.—2 Kori. 3:5.
6. Ko e heigoa kua aoga lahi ke eke mo faiaoga he Kupu he Atua?
6 Falanaki ki a Iehova, mo e aoga mai he fakamahaniaga kua foaki e ia. Kia eke e tupu ki mua haau mo matakupu he liogi. (Sala. 25:4, 5) To maeke foki ia koe ke logona hifo e olioli he lagomatai taha ke tuga a koe, ko e faiaoga he Kupu he Atua!