Aoga Fakaako Fekafekau—Ko e Gutuhala Lahi kua Hafagi ke he Tau Gahua
1 Puhala mai he perofeta ko Ieremia, ne talahau tuai e Iehova: “To kotofa foki e au e tau leveki mamoe ma lautolu ke leveki a lautolu; ti nakai tuai matakutaku a lautolu, ti nakai fakaatukehe a lautolu, ti nakai galo taha ia lautolu.” (Iere. 23:4) Ko e gahua leveki mamoe pihia he vaha nei kua hane taute he tau tagata he tau motu oti. Ko e mena nei kua taute he totou afe he tau motua he tau fakapotopotoaga. Ke lafi ki ai, kua fakalataha atu e tau fuata tane ne tokologa tuga e hahau ne kua foaki fakamakai e lautolu a lautolu ke he fekafekauaga ha Iehova. (Sala. 110:3) Ko e fakamonuina ha ia he tau matakainaga tane loto molu nei ke he tau fakapotopotoaga he tau tagata he Atua! He matutaki e gahua fakapotopoto fakaagaga, kua manako agaia ke moua e tau tagata tane lotomatala ke fakaata e lautolu a lautolu ke fekafekau ma e tau matakainaga ha lautolu.
2 Ko e foakiaga mitaki ke fakamahani e tau motua mo e tau fekafekau lagomatai nonofo takitokotaha ke lata mo e loga e tau kotofaaga ko e Aoga Fakaako Fekafekau. Molea e 22,000 he tau tagata fakaako mai he kavi 140 e motu ne kua moua e fakamahaniaga nei he 999 e vahega ne kua taute tali mai he fakatu e aoga he 1987. Ma e tau matakainaga tane nei, kua eke moli e aoga mo ‘gutuhala kua hafagi ke he tau gahua.’—1 Kori. 16:9.
3 Kakano he aoga: Ko e foliaga he Aoga Fakaako Fekafekau ke fakamahani mo e tauteute e tau tagata tane ke lotomatala ma e tau kotofaaga he tau mena fe ni ka manako lagomatai e fakatokatokaaga. Kua fakalahi he aoga e iloilo ha lautolu ke taki e gahua fakamatala, fakalataha ke he leveki he fuifui, mo e fakaako i loto he fakapotopotoaga. He oti e fakaakoaga, falu tagata fakaako ne kua kotofa ko e tau paionia pauaki po ke tau leveki ahiahi he tau motu ni ha lautolu po ke o ke he falu motu. Falu ne moua e tau kotofaaga ke fekafekau ni he tau fakapotopotoaga ne o mai ai a lautolu po ke tau matakavi ne kua lahi e manako lagomatai i lalo hifo he matakavi he la.
4 He fakaakoaga ke he valu e fahi tapu, ko e tau tagata fakaako kua fakaako fakahokulo a lautolu ke he Tohi Tapu. Kua kumikumi fakamatafeiga e lautolu e tau fakaakoaga kehekehe he Tohi Tapu pihia mo e tau kotofaaga ke ahiahi e fuifui mo e tau takitakiaga ke taute aki e tau lekua he moui Kerisiano. Kua ako foki e lautolu e tau fakaakoaga he tau Tohiaga Tapu hagaao ke he tau puhala takitaki, fakafili, mo e tau fakatokatokaaga. Kua moua e lautolu e tau fakamahaniaga pauaki ke lauga ke he toloaga mo e ne age e tau lagomatai fakatagata ke fakamafiti aki e tupu fakaagaga ha lautolu.
5 Tau Tutuaga kua Lata: Maama ai, kua tokoluga e tau tutuaga ke o atu he aoga ia. Ko e tau tagata ne tohi ole kua lata ke eke mo motua po ke fekafekau lagomatai ke molea e ua katoatoa e tau. Kua lata oti ke nonofo takitokotaha mo e vahaloto he 23 mo e 50 e tau tau he moui. Kua lata e tau tagata ne tohi ole ke maeke ke totou, tohi, mo e vagahau e vagahau ne kua taute ai e aoga, ti lata foki ia lautolu ke tino malolo, nakai lata ke fai levekiaga pauaki po ke fakataputapu e tau fua kai. Fa fifili mua a lautolu ne fekafekau paionia mau.
6 Ko lautolu ne foaki noa kua lata ke makaukau mo e maeke ke fekafekau he ha matakavi kua manako lagomatai. Kua lata e mena nei mo e agaga tuga he perofeta ko Isaia, ko ia ne foaki ni e ia a ia ke taute e gahua pauaki, he pehe: “Ko au hanai, kia fakafano atu e koe au.” (Isaia 6:8) Ne fakatata foki e ia e fakatokolalo ke he moui katoa hana. Ko lautolu ne fakaata e lautolu a lautolu ma e Aoga Fakaako Fekafekau kua lata ke omoomoi he fakaalofa ma e tau matakainaga ha lautolu mo e manako ke fekafekau atu ki a lautolu ka e nakai manako ke he talahaua po ke ha tuaga tokoluga. He mole e moua e tau fakamahaniaga mitaki pihia, kua amaamanaki ki a lautolu ne fakaako ke fakagahua e tau mena ne ako e lautolu ke lagomatai e falu.—Luka 12:48.
7 Tau Fua Aoga: Ke he magahala he valu e fahi tapu he lahi e fakamahaniaga, ko e tau tagata ka oti e fakaakoaga kua ‘pukeina ke he tau kupu he tua, mo e tau kupu mitaki.’ (1 Timo. 4:6) Kua tauteute he mena nei a lautolu ke lagomatai mo e fakamalolo falu he tau fakapotopotoaga mo e tau takaiaga ne kotofa a lautolu ki ai. Ke he loga he tau matakavi ne kotofa ai e tau tagata fakaako ne o mai he Aoga Fakaako Fekafekau, ne malikiti e gahua he fonua; kua fakamalolo e fekafekauaga paionia, mua atu ki a lautolu e tau fuata mui; mo e lahi e onoonoaga fakatagata ki a lautolu ne lafi fou mai mo e tau tagata he Atua.
8 Ko koe nakai ko e motua po ke fekafekau lagomatai nofo tokotaha agaia kua vahaloto he 23 mo e 50 e tau he moui? Ko e ha nakai manamanatu ai ke ole ke fano he Aoga Fakaako Fekafekau? Ko koe nakai ko e fuata tane kua manamanatu ke he tau foliaga anoiha he fekafekauaga ha Iehova? Ko e ha he nakai fakamukamuka mo e fakaata e moui hau mai he tau fakatauhele ke maeke ia koe ke hu atu ke he ‘gutuhala kua hafagi ke he tau gahua’? To maeke ke tamai ki a koe e fiafia lahi mahaki mo e makona. Moli, kua fakamoli e Aoga Fakaako Fekafekau ko e fakamonuinaaga nakai ni ke he tau tagata ne kua oti e fakaako mai he aoga ka e pihia ke he tau fakapotopotoaga he tau tagata he Atua he lalolagi katoa.
[Puha he lau 3]
Puhala ne Aoga a Lautolu Mai he Fakamahaniaga
“Kua fakamahomo hake moli he fakamahaniaga ia e fekafekauaga haku mo e maeke au ke leveki fakailoilo e fuifui, he fakaaoga e tau Tohiaga Tapu.”
“Kua mai he aoga ki a au e mauokafua lahi ke taute e tau kotofaaga kehekehe haku he fakapotopotoaga.”
“Kua teitei hikihiki katoa e moui haku, putoia e logonaaga haku ke he pule faka-Atua mo e fakatokatokaaga he Atua.”
“Ko e fakamahaniaga ne moua e au kua lagomatai au ke loto fakaaue he lata ia au ke fakaata au ke fekafekau he matakavi kua manako lagomatai.”