Fakaako Nakai e Koe e Tau Mena Oti Kana Mai ia Iehova?

1. Fēfē e logonaaga a Iehova hagaao ke he fakaakoaga?

¹ Ko Iehova ko e ha tautolu a “akoako [Faiaoga Homo Ue Atu],” kua manako ki a tautolu ke fakaako. (Isaia 30:20) Kua kamata e ia e fakaako he mole e tufugatia e ia e Tama uluaki haana. (Ioane 8:28) He mole e totokoaga a Atamu, ne nakai oti e fakaako a Iehova ka e foaki fakaalofa e ia e fakaakoaga ma e tau tagata nakai mitaki katoatoa.​—Isaia 48:17, 18; 2 Timo. 3:14, 15.

2. Ko e heigoa e matagahua fakaakoaga mogonei hane taute?

² He vahā nei, kua takitaki e Iehova e matagahua fakaakoaga lahi mahaki he fakamauaga tala. He perofeta mai e Isaia, totou miliona he lalolagi katoa kua tafe atu ke he “mouga [fakatai] ha i ai e fale a Iehova.” (Isaia 2:2) Ko e ha ne tafe atu ki ai? Ke fakaako ke he tau puhala he Atua, kua kakano mooli ke fakaako e Iehova! (Isaia 2:3) He tau he fekafekauaga 2010, ne fakaaoga he Tau Fakamoli a Iehova molea e 1.6 e piliona tulā he fakamatala mo e fakaako e tau tagata ke he kupu mooli he Tohi Tapu. Lafi ki ai, he tau faahi tapu takitaha kua fakatoka mai e fakaakoaga fakaagaaga ke he molea e 105,000 e fakapotopotoaga he lalolagi katoa, mo e tau tohi fakaako faka-Kerisiano kua taute he fekafekau fakamoli mo e loto matala ke he molea e 500 e vagahau.

3. Lagomatai fakatagata fēfē a koe mai he fakaakoaga ne foaki e Iehova?

³ Aoga Katoatoa: Aoga mooli a tautolu mai he fakaakoaga faka-Atua! Iloa e tautolu kua fai higoa e Atua ti leveki e ia a tautolu. (Sala. 83:18; 1 Pete. 5:6, 7) Ne iloa e tautolu e tau tali ke he falu he tau hūhū aoga lahi he moui: Ko e ha ne matematekelea mo e mamate e tau tagata? Maeke fēfē au ke moua e fiafia mooli? Ko e heigoa e kakano he moui? Kua foaki foki e Iehova ki a tautolu e takitakiaga he mahani ke maeke ia tautolu ke ‘monuina a tautolu ke he tau puhala oti.’​—Iosua 1:8.

4. Ko e heigoa falu aoga fakaako kua taute ma e tau fekafekau he Atua ti ko e ha kua lata ia tautolu ke fakaako e tau mena oti kua maeke ia tautolu mai ia Iehova?

⁴ Lafi ki ai, ne taute e Iehova e tau fakaakoaga pauaki ke lagomatai e tokologa he tau fekafekau haana ke fakalaulahi atu e fekafekauaga ha lautolu ki a ia. Haia ne tohi he lau 4-6 e tau aoga kua fakaatā ke lata mo e falu. Pete foki ka taofi he tau tuaga ha tautolu a tautolu mai he moua e fakamahaniaga ne kua tohi, kua fakaaoga katoatoa nakai e tautolu e fakaakoaga faka-Atua kua taute ma tautolu? Hane fakamalolō nakai e tautolu a lautolu ne ikiiki, kua fa takitaki kehe he tau faiaoga mo e falu ke kumi e tau fakaakoaga tokoluga atu he lalolagi, ke fakatoka e tau foliaga fakaagaaga ti kumi e fakaakoaga tokoluga ue atu​—ko e fakaakoaga faka-Atua? Ko e fakaako e tautolu e tau mena oti mai ia Iehova to lagomatai a tautolu ke olioli e moui fiafia mogonei mo e vahā tukulagi anoiha.​—Sala. 119:105; Ioane 17:3.

Falu Aoga Fakaako ne Moua Mai he Fakatokatokaaga a Iehova

Tau Vahega Fakaako ke Iloa

• Kakano: Ke fakaako e tau tagata ke totou mo e tohitohi ke maeke ia lautolu ke taute e fakaakoaga fakatagata he Tohi Tapu mo e ke fakaako e falu ke he kupu mooli.

• Loa: Felauaki mo e manako.

• Matakavi: Fale he Kautu.

• Ko Hai ka Ha Ha i Ai: Tau tagata fakailoa oti mo e tau tagata ne fiafia.

• Puhala ke Ole: Fakatokatoka he tau motua he fakapotopotoaga e tau vahega fakaako ke iloa fakatatau ni ke he manako he fakapotopotoaga, ti fakamafana e lautolu e tau tagata oti ka aoga mai i ai ke fakalataha.

Aoga Fekafekau Fakateokarasi

• Kakano: Ke fakamahani e tau tagata fakailoa ke eke mo tau tagata fakamatala mo e tau faiaoga lauia mitaki he tala mitaki.

• Loa: Hololoa.

• Matakavi: Fale he Kautu.

• Ko Hai ka Ha Ha i Ai: Tau tagata fakailoa oti. Ko lautolu oti foki kua fakalataha tumau mo e fakapotopotoaga, ne talia e tau fakaakoaga he Tohi Tapu, ti kua lagotatai e tau momoui mo e tau matapatu fakaakoaga faka-Kerisiano.

• Puhala ke Ole: Tutala ke he leveki Aoga Fekafekau Fakateokarasi.

Tau Vahega Vagahau Kehe

• Kakano: Ke fakaako e tau tagata fakailoa ke fakamatala e tala mitaki ke he taha vagahau kehe.

• Loa: Fā po ke lima e mahina. Ke taute ai e tau vahega he tau pogipogi Faiumu ke he taha po ke ua e tulā.

• Matakavi: Fale he Kautu kua tata mai.

• Ko Hai ka Ha Ha i Ai: Tau tagata fakailoa ne mitaki e tuaga kua manako ke fakamatala he vagahau kehe.

• Puhala ke Ole: Kua fakatoka he la ofisa e tau vahega kua felauaki mo e manako.

Talaga he Tau Fale he Kautu

• Kakano: Ke tā mo e fakafoou e tau Fale he Kautu. Nakai ko e aoga anei, ka ko e fakaholoaga anei ma e tau tagata foaki noa kua fakaako ke he tau lotomatala kehekehe ke maeke a lautolu ke lagomatai e tau matagahua talagaaga.

• Loa: Felauaki ke he tau tuaga he tagata foaki noa.

• Matakavi: Ha mena ne kotofa ki ai e Komiti Tafale he Matakavi. Falu tagata foaki noa kua liga uiina ke lalago e gahua foaki lagomatai he falu matakavi mamao ne lauia he matematekelea.

• Tau Lotomatala: Lata e tau matakainaga taane mo e tau matakainaga fifine ke papatiso mo e talia he kau he tau motua. Liga fai lotomatala po ke nakai fai lotomatala a lautolu.

• Puhala ke Ole: Fakapuke e Kingdom Hall Volunteer Worker Questionnaire (S-82) ne foaki he tau motua he fakapotopotoaga.

Aoga Fekafekau Paionia

• Kakano: Ke lagomatai e tau paionia ‘kia fakakatoatoa ni ha lautolu a feua.’​—2 Timo. 4:5.

• Loa: Ua e faahi tapu.

• Matakavi: Fifili he la ofisa; taute he Fale he Kautu kua tata mai.

• Lotomatala: Ko lautolu kua paionia tumau kavi ke he taha e tau.

• Puhala ke Ole: Latatonu e tau paionia kotofa mo e kua fakailoa atu he leveki takaiaga ha lautolu.

Aoga he Kamataaga he Peteli

• Kakano: Ko e aoga nei kua talaga ke lagomatai a lautolu ne hohoko atu foou ke kautū ke he ha lautolu a fekafekauaga he Peteli.

• Loa: Taha e tulā he tau faahi tapu takitaha ke hogofulumaono e faahi tapu.

• Matakavi: Peteli.

• Tau Lotomatala: Lata ke eke mo tau tagata nonofo tumau he magafaoa Peteli po ke tau fekafekau fakakū ne leva (taha e tau po ke loa).

• Puhala ke Ole: Tau tagata kotofa ke he magafaoa Peteli kua maeke pauaki.

Aoga Fekafekau he Kautu

• Kakano: Ke fakamahani e tau motua mo e tau fekafekau lagomatai ke taute aki ha lautolu a takitakiaga mo e tau matagahua he fakatokatokaaga. (Gahua 20:28) Kua taute e aoga nei he falu he tau tau gahoa he fifili he Kau Fakatufono.

• Loa: He tau tau e kua mole kua fakahoko ke taha mo e hafa e aho ma e tau motua mo e taha e aho ma e tau fekafekau lagomatai.

• Matakavi: Taute ke he Fale he Kautu kua tata mai po ke Fale he Toloaga.

• Tau Lotomatala: Lata mo tau motua po ke tau fekafekau lagomatai.

• Puhala ke Ole: Ko e tau motua mo e tau fekafekau lagomatai kotofa kua uiina he leveki takaiaga.

Aoga ma e Tau Motua he Fakapotopotoagaa

• Kakano: Ke lagomatai e tau motua ke leveki e tau matagahua ha lautolu he fakapotopotoaga.

• Loa: Lima e aho.

• Matakavi: Fifili he la ofisa; taute ke he Fale he Kautu kua tata mai po ke Fale he Takaiaga.

• Tau Lotomatala: Lata mo tau motua.

• Puhala ke Ole: Tau motua kotofa ne uiina he la ofisa.

Aoga ma e Tau Leveki Faifano mo e ha Lautolu a Tau Hoanab

• Kakano: Ke fakamalolō e tau leveki takaiaga mo e faahimotu ke lauia mitaki he leveki e tau fakapotopotoaga mo e ke “gahua [malolō] ke he kupu katoa mo e fakaako atu” mo e leveki e tau matakainaga ne tuku age ki a lautolu.​—1 Timo. 5:17; 1 Pete. 5:2, 3.

• Loa: Ua e mahina.

• Matakavi: Fifili he la ofisa.

• Tau Lotomatala: Lata mo tau leveki takaiaga po ke faahimotu.

• Puhala ke Ole: Tau leveki faifano kotofa mo e ha lautolu a tau hoana kua uiina he la ofisa.

Aoga Tohi Tapu ma e Tau Matakainaga Taane Nofo Tokotahac

• Kakano: Ke tauteute e tau motua mo e tau fekafekau lagomatai ne nakai fai hoana ma e falu matagahua foki. Laulahi he tau matakainaga kua kautū ka kotofa ke fekafekau he tau matakavi kua manako lagomatai he tau motu ni ha lautolu. Tokogahoa ka moua e kotofaaga he taha motu kaeke ke foaki e lautolu a lautolu.

• Loa: Ua e mahina.

• Matakavi: Fifili he la ofisa; taute ke he Fale he Toloaga po ke Fale he Kautu.

• Tau Lotomatala: Tau matakainaga taane nakai fai hoana he vahāloto he 23 mo e 62 e tau he moui mo e tino malolō kua manako ke fekafekau ke he tau matakainaga mo e tau mena he Kautu he ha matakavi kua manako lagomatai. (Mare. 10:29, 30) Lata ia lautolu ke fekafekau ke kavi ke he ua e tau katoa he kotofaaga.

• Puhala ke Ole: Ka fai aoga pehēnei he fonua he la ha mutolu, ko e fono ma lautolu kua fiafia ke fakalataha atu ka fakahoko ke he fonoaga he takaiaga. Falu fakailoaaga ka moua he fonoaga nei.

Aoga Tohi Tapu ma e Tau Hoa Kerisianod

• Kakano: Ke age ke he tau hoa mau e fakamahaniaga pauaki ke maeke ia lautolu ke fakaaoga fakalahi e Iehova mo e fakatokatokaaga haana. Laulahi ia lautolu kua kautū to kotofa ke fekafekau ke he matakavi kua manako lagomatai he motu ni ha lautolu. Liga to moua he tokogahoa e kotofaaga he taha motu kaeke ke foaki e lautolu a lautolu.

• Loa: Ua e mahina.

• Matakavi: Ko e tau vahega gahoa fakamua kua fakahoko ai ke he Watchtower Educational Center i Patterson, New York, U.S.A. Fakamui, ko e aoga nei to fakahoko ai ke he tau matakavi ne fifili he la ofisa, mahani ke taute ke he Fale he Takaiaga po ke Fale he Kautu.

• Tau Lotomatala: Ko e tau hoa mau he vahāloto he 25 mo e 50 e tau he moui mo e mitaki e malolō tino ne maeke ke fekafekau he ha matakavi kua manako lagomatai mo e ha ha e aga: “Ko au hanai, kia fakafano atu e koe au.” (Isaia 6:8) Lafi ki ai, kua lata a lautolu ke mau kavi ke he ua e tau ti ko e mogonei hane fakalataha ke he fekafekau mau kavi ke he ua e tau katoa.

• Puhala ke Ole: Ka fai aoga pehēnei e matakavi he la ha mutolu, ko e fono ma lautolu kua fiafia ke fakalataha ki ai kua taute he aho toloaga pauaki. Ko e falu vala tala kua foaki ke he fonoaga nei.

Aoga Tohi Tapu a Kiliata he Kolo Toko

• Kakano: Ke fakamahani e tau paionia mo e falu fekafekau gahua mau ma e gahua misionare.

• Loa: Lima e mahina.

• Matakavi: Watchtower Educational Center, Patterson, New York, U.S.A.

• Tau Lotomatala: Tau hoa mau ne papatiso ke tolu e tau he vahāloto he 21 mo e 38 e tau he moui ka tuku e tohi ole fakamua ha laua. Kua lata ia laua ke vagahau Peritania, mau ai kavi ke he ua e tau, ti mogonei ko e fekafekau gahua mau kavi ke he ua e tau katoa. Ko lautolu ne tuku e tau tohi ole kua lata ke tino malolō. Ko e tau paionia hane fekafekau he motu kehe (putoia a lautolu he tuaga misionare); tau leveki faifano; tau tagata he magafaoa Peteli; mo lautolu fakamua atu ne kautū mai he Aoga Fakaako Fekafekau, Aoga Tohi Tapu ma e Tau Matakainaga Taane Nofo Tokotaha, mo e Aoga Tohi Tapu ma e Tau Hoa Kerisiano ka tuku foki e ole ka hokotia a lautolu.

• Puhala ke Ole: He tau la ne fifili, ko e fono ma lautolu ne fiafia ke he aoga nei kua taute he fonoaga he faahimotu. Falu vala tala kua foaki he fonoaga nei. Ka nakai fai fono he tau fonoaga he motu ha mutolu ti ka manako a koe ke tohi ole atu, maeke ia koe ke tohi ke he la ofisa ha mutolu ma e falu vala tala foki.

Aoga ma e Tau Tagata he La Komiti mo e ha Lautolu a Tau Hoana

• Kakano: Ke lagomatai a lautolu kua fekafekau he Tau La Komiti ke leveki fakamitaki e gahua he takitakiaga he tau kaina Peteli, foaki e kitekiteaga ke he tau matagahua ne lauia e tau fakapotopotoaga, mo e leveki e tau takaiaga mo e tau faahimotu he tau fonua i lalo hifo ia lautolu, ti pihia mo e fakaliliu, lolomi, mo e fakafano he tau tohi mo e leveki e tau faahi gahua kehekehe.​—Luka 12:48e.

• Loa: Ua e mahina.

• Matakavi: Watchtower Educational Center, Patterson, New York, U.S.A.

• Tau Lotomatala: Ko e tau tagata he La Komiti po ke Komiti he Motu po ke kua kotofa pihia.

• Puhala ke Ole: Tau matakainaga taane kua kotofa mo e ha lautolu a tau hoana kua uiina he Kau Fakatufono.

[Tau Matahui Tala]