Ne Fakaako e Iehova a Tautolu
1 I lalo hifo he takitakiaga faka-Atua ko e fakaholoaga fakaako he lalolagi katoa hane gahuahua he mogonei ke he 233 e tau motu. Nakai fai mena he lalolagi nei kua foaki ke tatai ki ai. Ko e ha tautolu a Fakaako Tokoluga, ko Iehova, kua fakaako a tautolu ke he puhala ke aoga ai a tautolu mogonei ti fakaako foki e ia a tautolu ma e moui tukulagi.—Isa 30:20; 48:17.
2 Tau Aoga he Fakaakoaga Faka-Atua: Manamanatu la ke he tau aoga fou hane fakahoko ke aoga ai e tau tagata a Iehova. Ko e Aoga Fekafekau Fakateokarasi, ne fakahoko fakafahitapu ke he 87,000 he tau fakapotopotoaga, he fakamahani e tau miliona he tau tagata fakailoa he Kautu ke eke mo tau fekafekau lauia mitaki he tala mitaki. Kua hu nakai a koe i ai? Ko koe nakai taha he tokoafe ne fina atu ke he Aoga Fekafekau Paionia ke he ua e fahitapu? Liga ko e fakatote hifo he tula fafati ma e tau paionia tumau to fakamalolo e tokologa ke paionia mo e lata ke o atu ke he aoga nei. Ko e ua mahina he Aoga Fakaako Fekafekau Lagomatai, hane fakahoko mogonei ke he tau matapatu vagahau he lalolagi katoa, kua lagomatai e tau motua nakai fai hoana mo e tau fekafekau lagomatai ke fua fakalahi atu e tau matagahua fakateokarasi. Kua moua tumau he tau motua oti mo e tau fekafekau lagomatai e fakaakoaga pauaki ke he Aoga Fekafekau he Kautu.
3 Ko e tau fale he Watchtower Educational Centre i Patterson, New York, ne fakaaoga ke fakahoko ai tolu e aoga pauaki ke foaki e fakamahaniaga fakateokarasi. Ko e lima e mahina he aoga he Aoga Tohi Tapu a Kiliata he Kolo Toko kua tauteute e tau fekafekau ma e gahua misionare he tau motu kehe. Ko e tau tagata he La Komiti he lalolagi katoa kua o atu ke he aoga he fakatokatokaaga he la ke ua e mahina. Ia Me 1999 ko e aoga ua e mahina ma e tau leveki faifano ka kamata mo e vahega he 48 e tau tagata fakaako mai he Fahi Kaufakalataha mo Kanata. Kua pauaki ni e tau fekafekau oti a Iehova ke moua e tau lagomataiaga mitaki mai he fakamahaniaga ha Iehova hane foaki mai he tau aoga kehekehe nei.
4 Fakaako ma e Kakano Fe? Ne talahau he tagata he Kau Fakatufono: “Ko e fakaholoaga fakaako fou ha tautolu ne talaga ke ta mai oti aki e tau tagata a Iehova he tau matakavi oti ke he tuaga mitaki he lotomatala ne fakamaama mai he Tau Fakatai 1:1-4.” Kia fakatumau a Iehova ke foaki ki a tautolu takitokotaha e “alelo ha lautolu ne fakaako.”—Isa 50:4.