Aoga Fekafekau Fakateokarasi
Kakano: Ke fakamahani e tau tagata fakailoa ke eke mo tau tagata fakamatala mo e tau faiaoga lauia mitaki he tala mitaki.
Loa: Hololoa.
Matakavi: Fale he Kautu he matakavi.
Tau Lotomatala: Ko lautolu oti kua fakalataha tumau mo e fakapotopotoaga, kua talia ke he tau fakaakoaga he Tohi Tapu, mo e kua moui fakatatau a lautolu ke he tau matapatu fakaakoaga Kerisiano.
Puhala ke Ole: Ko e leveki he Aoga Fekafekau Fakateokarasi ka fakaatā e tagata fakaako ki ai.
Ko Sharon, ne mate e falu faahi tino ha ko e gagao amyotrophic lateral sclerosis (ALS), ne pehē: “Ne fakaako he Aoga Fekafekau Fakateokarasi au ke taute e tau kumikumiaga mo e fakamaama fakamahino e vala tala. Ne fakaako foki au ke hagaaki ke he tau manako fakaagaaga he falu—nakai ko e haaku ni.”
Ko Arnie, ko e leveki faifano, ne talahau: “Ne tupu hake au mo e fakakoekoe ti uka lahi ke ono fakahako ke he mata he falu. Ne lagomatai he aoga nei au ke moua e mauokafua mo e logona hifo kua aoga au. Mo e lagomatai ha Iehova puhala mai he fakaakoaga nei, ne fakaako au ke he tau puhala ke fafagu mo e fanogonogo fakamitaki. Kua fakaaue lahi au he maeke ke fakaheke e Atua i loto he fakapotopotoaga mo e he fekafekauaga haaku.”
Aoga he Kamataaga he Peteli
Kakano: Ke lagomatai a lautolu ne hohoko atu foou ke he Peteli ke kautū ke he ha lautolu a fekafekauaga.
Loa: 45 e minuti he tau faahi tapu takitaha ke he 16 e faahi tapu.
Matakavi: Peteli.
Tau Lotomatala: Lata ke eke mo tagata nofo tumau he magafaoa Peteli po ke tau fekafekau foaki noa fakakū ne talia ke fekafekau he Peteli ke he taha e tau po ke loa atu.
Puhala ke Ole: Tau tagata foou ke he magafaoa Peteli kua maeke pauaki.
Ko Demetrius, ne fakalataha atu ke he aoga nei he tau atu tau 1980, ne pehē: “Ko e aoga nei kua fakaholo ki mua e tau puhala fakaako haaku mo e lagomatai au ke mautali ke he feua loa he Peteli. Ko e tau faiaoga, fakaholoaga, mo e tau fakatonuaga aoga kua fakamooli ki a au e manamanatu fakaalofa ha Iehova mo e manako haana ki a au ke kautū ke he fekafekauaga haaku he Peteli.”
Ko Kaitlyn ne talahau: “Ne lagomatai au ke hagaaki ke he mena kua mua he aoga—ke eke mo tagata fakaagaaga. Ko e Aoga he Kamataaga ne fakaholo ki mua e loto fakaaue haaku ki a Iehova, haana fale, mo e haana fakatokatokaaga.”
Aoga Fekafekau he Kautu
Kakano: Ke fakamahani e tau leveki faifano, tau motua, mo e falu magaaho, ko e tau fekafekau lagomatai ke he puhala ke taute aki ha lautolu a tau kotofaaga mo e tau matagahua he fakatokatokaaga. (Gahua 20:28) Ne fakatutala ai ke he tau tutuaga he mogonei, tau fakahihiga, mo e tau manako he tau fakapotopotoaga. Kua taute e aoga nei he falu tau ka fifili ai he Kau Fakatufono.
Loa: He tau tau e kua mole kua fakahoko e aoga nei he ua ke he ua mo e hafa e aho ma e tau leveki faifano, taha mo e hafa e aho ma e tau motua, mo e taha e aho ma e tau fekafekau lagomatai.
Matakavi: Fa taute ke he Fale he Kautu po ke Fale he Toloaga.
Tau Lotomatala: Lata mo leveki faifano, motua, po ke fekafekau lagomatai.
Puhala ke Ole: Ko e tau motua mo e tau fekafekau lagomatai kua moua e uiina mai he leveki takaiaga. Uiina he la ofisa e tau leveki faifano.
“Ko e aoga, pete he loga e tau vala tala he magaaho kū mo e hakotika, kua omoomoi ai e tau motua mo e lagomatai a lautolu ke fakatumau e fiafia mo e ‘kia eke mo tau tagata toa’ he fekafekauaga ha Iehova. Kua fakaako e tau motua foou mo e leva lahi ke leveki fakamitaki mo e kaufakalataha ke he ‘manatu taha.’”—Quinn (i lalo).
“Ko e fakaakoaga nei kua lagotatai katoatoa ke he atihake he tuaga fakaagaaga ha mautolu, hataki a mautolu ke he tau hagahagakelea, mo e foaki ki a mautolu e tau puhala aoga ke leveki aki e fuifui. Ko e totonu ha ia ha Iehova ke lagomatai a mautolu.”—Michael.
Aoga Fekafekau Paionia
Kakano: Ke lagomatai e tau paionia ke ‘fakakatoatoa ni ha lautolu a feua.’—2 Timo. 4:5.
Loa: Ua e faahi tapu.
Matakavi: Fifili he la ofisa; fa taute he Fale he Kautu.
Tau Lotomatala: Ko lautolu kua paionia tumau kavi ke he taha e tau po ke molea.
Puhala ke Ole: Tau paionia kua latatonu ne kotofa pauaki mo e kua fakailoa atu he leveki takaiaga ha lautolu.
“Kua lagomatai he aoga ia au ke fehagai mo e tau paleko he fekafekauaga mo e he moui haaku,” he talahau e Lily (faahi matau). “Kua holo ki mua lahi e puhala fakaako fakatagata haaku, fakaako atu, mo e fakaaoga e Tohi Tapu. Kua maeke ia au ke mautali mitaki ke lagomatai e falu, lalago e tau motua, mo e lafi ke he tupu he fakapotopotoaga.”
Ko Brenda, ne kua lagaua e fano ke he aoga, ne talahau: “Kua fakaatā au ke eketaha ke 100 e pasene ke he tau mena fakaagaaga, ke fakamalolō e loto manamanatu haaku, mo e ke hagaaki ke lagomatai e falu. Maaliali ai, kua fakamokoi mooli a Iehova!”
Aoga ma e Tau Motua he Fakapotopotoaga
Kakano: Ke lagomatai e tau motua ke leveki e tau matagahua ha lautolu he fakapotopotoaga mo e fakahokulo e tuaga fakaagaaga ha lautolu.
Loa: Lima e aho.
Matakavi: Fifili he la ofisa; fa taute ke he Fale he Kautu po ke Fale he Toloaga.
Tau Lotomatala: Lata mo tau motua kotofa.
Puhala ke Ole: Uiina he la ofisa e tau motua.
Kikite la ke he tau talahauaga mai he falu he vahega ke 92 aki he Tau Faahi Kaufakalataha:
“Ko e aoga kua lagomatai lahi mahaki ki a au, kua maeke ia au ke onoono ki a au ni mo e kitia e puhala kua maeke ia au ke leveki aki e tau mamoe ha Iehova.”
“Kua mautali au ke lahi atu e aga fakamafanatia ke he tau tagata oti he fatiaki e tau manatu uho he tau Tohiaga Tapu.”
“To tokiofa e au e fakaakoaga nei mo au ke he moui katoa haaku.”
Aoga ma e Tau Leveki Faifano mo e ha Lautolu a Tau Hoana
Kakano: Ke fakamalolō e tau leveki takaiaga mo e faahimotu ke lauia mitaki he leveki e tau fakapotopotoaga he “gahua [malolō] ke he kupu katoa mo e fakaako atu.”—1 Timo. 5:17; 1 Pete. 5:2, 3.
Loa: Ua e mahina.
Matakavi: Fifili he la ofisa.
Tau Lotomatala: Lata mo leveki takaiaga po ke faahimotu.
Puhala ke Ole: Uiina he la ofisa e tau leveki faifano mo e ha lautolu a tau hoana.
“Kua fakaholo ki mua e loto fakaaue ha mautolu ke he takitakiaga ha Iesu he fakatokatokaaga. Ne kitia e mautolu e lata ke fakamafana e tau matakainaga kua leveki e mautolu mo e ke fakamalolō e kaufakalataha he tau fakapotopotoaga takitaha. Kua peehi he aoga ia ke he tau loto ha mautolu pete ka foaki he leveki faifano e tomatomaaga ti pihia mo e fakatonuaga he falu magaaho, ko e matapatu foliaga haana ke lagomatai e tau matakainaga ke kitia kua fakaalofa a Iehova ki a lautolu.”—Joel, vahega fakamua, 1999.
Aoga Tohi Tapu ma e Tau Matakainaga Taane Nofo Tokotaha
Kakano: Ke tauteute e tau motua mo e tau fekafekau lagomatai kua nofo tokotaha ke leveki e falu matagahua he fakatokatokaaga ha Iehova. Laulahi he tau matakainaga kua kautū ka kotofa ke fekafekau he tau matakavi kua manako lagomatai he tau motu ni ha lautolu. Ko e falu kua moua e kotofaaga ke he taha motu kaeke kua fakaatā e lautolu a lautolu. Ko e falu kua kautū ka liga fekafekau fakakū ko e tau paionia pauaki ke hafagi mo e fakalaulahi e gahua he tau matakavi mamao.
Loa: Ua e mahina.
Matakavi: Fifili he la ofisa; fa taute ke he Fale he Kautu po ke Fale he Toloaga.
Tau Lotomatala: Tau matakainaga taane kua nofo tokotaha he vahāloto he 23 mo e 62 e tau he moui mo e mitaki e malolō tino kua loto ke fekafekau ke he ha matakavi kua manako ke he lagomatai. (Mare. 10:29, 30) Lata ia lautolu ke fekafekau ko e tau paionia tumau ke he kavi ke ua e tau katoa mo e ko e tau motua po ke tau fekafekau lagomatai ke ua e tau katoa.
Puhala ke Ole: Ko e fono to fakahoko ke he toloaga he takaiaga ke foaki falu vala tala ma lautolu kua fiafia ki ai.
“He eketaha ke he aoga nei kua fakaatā e agaaga ha Iehova ke taute e tau hikiaga hokulo ki a au ni,” he talahau e Rick, mai he vahega ke 23 aki he Tau Faahi Kaufakalataha. “Magaaho ka tuku mai e Iehova e kotofaaga, to lalago e ia a koe he kotofaaga ia. Ne iloa e au ka hagaaki au ke he finagalo he Atua nakai ki a au ni, to fakamalolō e ia au.”
“Ne ako au ke loto fakaaue ke he fakatokatokaaga he Atua kua tuga e mana he vahā foou nei,” he talahau e Andreas, kua gahua i Sihamani. “Ko e fakaakoaga ne lagomatai au ke mautali ma e gahua i mua. Ne loga foki e fakafifitakiaga he Tohi Tapu ne kua fakaako mai ki a au e matapatu fakaakoaga nei: Ko e fekafekau ma e tau matakainaga mo Iehova kua takitaki atu ke he fiafia mooli.”
Aoga Tohi Tapu ma e Tau Hoa Kerisiano
Kakano: Ke age ke he tau hoa mau e fakamahaniaga pauaki ke maeke ia lautolu ke fakaaoga fakalahi e Iehova mo e fakatokatokaaga haana. Laulahi ia lautolu kua kautū to kotofa ke fekafekau ke he matakavi kua manako lagomatai he motu ni ha lautolu. Ko e falu liga moua e kotofaaga he taha motu kehe kaeke kua fakaatā e lautolu a lautolu. Ko lautolu kua kautū ka liga fekafekau fakakū ko e tau paionia pauaki ke hafagi mo e fakalaulahi e gahua he tau matakavi mamao.
Loa: Ua e mahina.
Matakavi: Ko e aoga nei kua fakahoko ke he tau Faahi Kaufakalataha, ti kamata ia Sepetema 2012, mo e to taute ai ke he tau la matakavi kua fifili ke he lalolagi katoa, fa taute ke he Fale he Kautu po ke Fale he Toloaga.
Tau Lotomatala: Ko e tau hoa mau he vahāloto he 25 mo e 50 e tau he moui mo e mitaki e malolō tino ne maeke ke fekafekau he ha matakavi kua manako lagomatai mo e ha ha e aga: “Ko au hanai, kia fakafano atu e koe au.” (Isaia 6:8) Kua lata a laua ke mau kavi ke he ua e tau mo e hane fekafekau tumau kavi ke he ua e tau katoa nakai mamutu. Kua lata e taane ko e motua po ke fekafekau lagomatai ke he kavi ke he ua e tau katoa nakai mamutu.
Puhala ke Ole: Ko e fono kua fakahoko ai ke he fonoaga he faahi motu ke foaki falu vala tala ma lautolu kua fiafia ke o atu ki ai. Ka nakai fai fono he tau fonoaga he motu haau ka kua manako a koe ke tohi ole atu, maeke ia koe ke tohi ke he la ofisa ha mutolu ma e falu vala tala.
“Ko e hikiaga mooli he moui e valu e faahi tapu ia ti ko e magaaho mitaki lahi ma e tau hoa kua manako ke foli atu! Kua eketaha a maua ke fakatumau e moui lagotatai ke maeke ia maua ke fakaaoga fakailoilo e tau magaaho ha maua.”—Eric mo Corina (i lalo), vahega fakamua, 2011.
Aoga Tohi Tapu a Kiliata he Kolo Toko
Kakano: Ke fakamahani e tau tagata fakaako ke fekafekau ko e tau misionare he fonua he tau matakavi ne lahi mahaki e puke tagata, ke eke mo tau leveki faifano, po ke eke mo tau matakainaga he Peteli. Ko e foliaga ke fakamalolō mo e fakamau e tau fakatokaaga he fonua mo e la ofisa.
Loa: Lima e mahina.
Matakavi: Watchtower Educational Center, Patterson, New York, U.S.A.
Tau Lotomatala: Tau hoa mau kua haia he fekafekauaga tumau—ko e tau misionare he fonua ne nakaila fakalataha atu ia ke he aoga, tau paionia pauaki, tau leveki faifano, po ke tau matakainaga he Peteli. Kua lata ia laua ke gahua tokoua ke he fekafekau ke he kavi tolu e tau katoa nakai mamutu. Kua lata a lautolu ke iloa mitaki ke vagahau, totou, mo e tohi faka-Peritania.
Puhala ke Ole: Tau hoa mau to liga uiina he ha lautolu a La Komiti ke tuku e tau tohi ole.
Ko Lade mo Monique mai he Tau Faahi Kaufakalataha kua gahua mogonei i Aferika. “Tauteute he Aoga Kiliata a maua ke ō ke he ha matakavi he lalolagi, kia amanaki ke gahua lahi, mo e gahua fakalataha mo e ha maua a tau matakainaga fakahele,” he talahau e Lade.
Lafi e Monique: “He fakagahua e au e tau mena haaku ne fakaako mai he Kupu he Atua, ne fiafia lahi au ke he kotofaaga haaku. Kitia e au e fiafia ia ko e fakamooliaga foki he fakaalofa ha Iehova.”
Aoga ma e Tau Tagata he La Komiti mo e ha Lautolu a Tau Hoana
Kakano: Ke lagomatai a lautolu he Tau La Komiti ke leveki e tau kaina Peteli, ke hagaaki ke he tau matagahua ne lauia e tau fakapotopotoaga, mo e leveki e tau takaiaga mo e tau faahimotu. Kua fakaako foki a lautolu hagaao ke he fakaliliu, lolomi, mo e fakafano he tau tohi.
Loa: Ua e mahina.
Matakavi: Watchtower Educational Center, Patterson, New York, U.S.A.
Tau Lotomatala: Ko e matakainaga he La Komiti po ke Komiti he Motu po ke kua kotofa pihia.
Puhala ke Ole: Kua uiina he Kau Fakatufono e tau matakainaga taane mo e ha lautolu a tau hoana.
Ko Lowell mo Cara, mai he vahega ke 25 aki, ne gahua i Nigeria. “Kua fakamanatu ki a au kua pete ni e lavelave au po ke ko e gahua kua tuku mai ki a au, ko e uho manatu ke fakafiafia a Iehova ko e tuaga fakaagaaga,” he talahau e Lowell. “Ne peehi foki he aoga ia ko e puhala kua fakafehagai a tautolu mo e falu kua lata ke putoia e fakaalofa ne fakakite e Iehova ke he haana tau fekafekau.”
“Taha e talahauaga kua manamanatu fakahokulo au ki ai ko e hanei,” he lafi e Cara. “Ka nakai maeke ia au ke fakamaama fakamukamuka e matakupu, kua lata ni ia au ke fakaako e matakupu ato lali au ke fakaako atu ai ke he falu.”