Tau Puhala ke Fakalaulahi e Fekafekauaga Hau
1 Molea e 40 tau i tuai, ko e vala tala ne mataulu “Kua Mitaki Lahi Mahaki Nakai e Gahua Hau?” ne kitia he Watchtower, Ianuari 15, 1955. Ne tuhi fakaalofa mai e puhala kua liga maeke he tau tagata a Iehova ke fakaholo ki mua e laliaga ha lautolu takitokotaha ke he fekafekauaga ke malikiti hake ha lautolu a gahua he Kautu. Ko e hatakiaga mitaki ia foki kua lauia foki he vaha nei, he fakatumau a tautolu ke fakatolomaki e mitaki lahi mahaki ha tautolu.
2 Kua lata e tau gahua oti ha tautolu ke omoi he poakiaga mua ue atu: “Kia fakaalofa atu foki a koe ke he Iki hāu a Atua mo e hāu a loto katoa, mo e hāu a agaga katoa, mo e hāu a manatu katoa, mo e hāu a malolo katoa.” (Mare. 12:30) Kua fakatata e tautolu e fakaalofa katoatoa ma Iehova he fakaaoga katoatoa e tau magaaho kua fakaata ki a tautolu ke fakalaulahi e gahua hana he Kautu. Manamanatu la ke he tau puhala nai kua liga ke fakalaulahi hau a fekafekauaga.
3 Hahamo Hau a Matagahua: Ko e tau matakainaga tane tukulele kua lali ke lata mo tau fekafekau lagomatai ti fakaholo atu ke fekafekau ko e tau motua. Ko e tau vala tala “Kua Hokotia Atu?” mo e “Lata Nakai ia Koe ke Fekafekau?,” he fufuta he The Watchtower, ia Sepetema 1, 1990, ne omoomoi e tau matakainaga tane tokologa ke fakaata a lautolu ke lata mo e tau matagahua he fakapotopotoaga. Huhu atu ke he tau motua he fakapotopotoaga ma e tau lagomataiaga pauaki ke he puhala ke hokotia atu mo e kua lata.
4 Ko e tau motua mo e tau fekafekau lagomatai nonofo takitokotaha kua uiina ke manamanatu fakahokulo hagaao ke he fakapuke ma e Aoga Fakaako Fekafekau. Maeke ia koe ke fakamahani a koe mo e aoga nei he totou e tau fakamauaga i lalo he “Ministerial Training School” he Watch Tower Publications Indexes ma e 1986-1995, 1996, mo e 1997. Kitia nakai e koe e ‘gutuhala lahi he gahua’ kua hafagi mai ki a koe? (1 Kori. 16:9a) Tokologa e tau matakainaga tane ne o atu ki ai kua nakai kitia atu e tau kotofaaga oti he gahua he taha fahi. Kua fiafia a lautolu he vaha nei ke gahua he Peteli po ke tau paionia pauaki ke he fonua, tau misionare, po ke tau leveki he takaiaga.
5 Hokotia Atu ke he Fekafekauaga Tumau: Ko e tau fuata kua paase mai he aoga tokoluga, tau hoana gahua kaina, mo lautolu kua litaea kua lata ke manamanatu fakahokulo ke he paionia. Liu totou e uho he Ha Tautolu a Fekafekauaga he Kautu Iulai 1998, ti tutala ke he tau paionia ne tatai e tau tutuaga mo e moui hau. Kua liga ke omoi a koe ke fakatolomaki e fekafekauaga hau he paionia, tuga he taute e lautolu. (1 Kori. 11:1) To maeke fefe ia koe ke fakalahi hau a gahua ke he 70 e tula he mahina ko e fekafekau paionia tumau?
6 Molea e 17,000 he tau matakainaga mogonei hane gahua he tau la ofisa mo e tau kaina Peteli he lalolagi katoa. Kua fakatutala e Our Kingdom Ministry ia Iuni 1995 ke he mena kua lata ke fakapuke ma e gahua pihia. He ha he totou e uho ia mo e kitia ko koe kia taha kua liga ke lata mo e kotofaaga homo ue atu he gahua he Peteli?
7 Fekafekau he Matakavi kua Manako Tagata Gahua: Nofo kia a koe ke he matakavi kua gahua mau po ke matakavi kua tokologa e tau matakainaga tane ke hahamo e gahua? Kua manamanatu nakai a koe ke fakalaulahi hau a fekafekauaga he fano ke he matakavi kua manako lahi ke he tagata gahua? Liga ko e hiki ke he maaga i tua ne kua lata ke tokologa e tau tagata gahua. (Mata. 9:37, 38) Kua nakai lata ke taute fakapulagi noa e mena nei. Kua lata he manamanatu ke he liogi. (Luka 14:28-30) Fakatutala e tuaga hau mo e tau motua mo e leveki takaiaga. To fakakakano e lautolu ki a koe kua pulotu ke taute e hikiaga ia mogonei po ke ke mautauteute ma e tau magaaho i mua. Ka manako a koe ke tohi ke he Sosaiete ma e lagomataiaga ke he mena ka fano a koe ki ai, kua lata ke fakafano mai fakalataha e tohi ne saini he Komiti Fekafekau he Fakapotopotoaga hau he tohi hau.
8 Fakatolomaki e Fua Mitaki he Fekafekauaga Hau: Liga ke fakalataha katoatoa a tautolu oti he fekafekauaga he fakatolomaki e fua mitaki he fekafekauaga ha tautolu he fonua. Kua putoia kia a koe ke he tau mena oti he gahua, putoia e fakamatala ke he taha fale ke he taha fale mo e fakamatala nakai mau tauteute ti pihia foki e liu ahi atu mo e gahua fakaako Tohi Tapu? Ka taute e koe e fakaakoaga, maeke nakai ia koe ke fakatolomaki e puhala fakaako hau? To mitaki ai ke liu totou e uho he Our Kingdom Ministry Iuni 1996 ma e tau lagomataiaga ke fakaaoga e koe ke omoi aki e tau tagata fakaako hau ke he tukuleleaga mo e papatisoaga.
9 Ko e fakatutalaaga mua ue atu he tau puhala ke fakalaulahi mo e fakaholo ki mua e fekafekauaga ha tautolu kua moua he veveheaga 9 he Organized to Accomplish Our Ministry. Moli kua lata ia tautolu oti ke manako ke lahi e mena ka taute he fekafekauaga he Atua. Ko e ha he manamanatu fakahokulo ke he tau foliaaga fakaagaga hau? Taute tuga he talahau he 1 Timoteo 4:15: “Kia manamanatu a koe ke he tau mena na, kia fakamahani a koe ki ai; kia kitia ai he tau tagata oti hāu a mafiti.”