Manako Nakai Ia Koe ke Fakalaulahi e Gahua?
1 Ne fakatai e Iesu e Kautu ke he tau koloa uho. (Mata. 13:44-46) Ko e gahua ke fakamatala e tala he Kautu ko e koloa uho pihia. Kua lata e fekafekauaga nai mo mena fakamua atu ke he tau momoui ha tautolu, pete ni kaeke kua fakakaupa kehe e tau manako ne lauia lahi ke he tau loto ha tautolu. (Mata. 6:19-21) Manako nakai ia koe ke fakalaulahi atu e fekafekauaga hau he Kautu?
2 Manamanatu ke he Tau Mena Aoga Nei: Loga e tau mena kua lata lahi ke taute ke fakalaulahi e fekafekauaga fakatagata ha tautolu: (1) kia fifili ke kumikumi fakamua ke he tau momoui e tau manako he Kautu (Mata. 6:33); (2) fakagahuahua e tua mo e falanaki ki a Iehova (2 Kori. 4:1, 7); (3) ke ole atu ke he Atua ma e lagomatai puhala he loto fakamoli mo e liogi fakamakamaka (Luka 11:8-10); (4) tutaki atu mo e taute e tau gahua ne felauaki mo e tau liogi ha tautolu.—Iako. 2:14, 17.
3 Tau Hala ke Fakalaulahi e Fekafekauaga ha Tautolu: Maeke oti ia tautolu ke folia he tau mahina takitaha ke fakaaoga tumau falu a magaaho ke he fekafekauaga. Ka e, manamanatu foki nakai ia koe ke tapatapaki e magaaho he ha magaaho ke fakamatala, mo e kaki ke fakakakano e tau puhala fakafeleveia hau, ti fakaholo ki mua e aogaaga he liu aahi atu a koe, mo e lali ke fakamoho fakahaga e akoaga Tohi Tapu he kaina? Maeke nakai ia koe he paionia fakaku po ke paionia tumau po ke he fekafekau ke he tau matakavi ne tokogahoa e tau tagata? Kaeke ko e matakainaga tane papatiso, ane ha he foli atu ke eke mo fekafekau lagomatai po ke taha motua? (1 Timo. 3:1, 10) Maeke nakai ke fakalaulahi e fekafekauaga hau he folia ke fekafekau i Peteli, he Aoga Fakaako Fekafekau, po ke ako misionare ke he Aoga Kiliata?—Luka 10:2.
4 Taha e matakainaga ne ha ha i ai e gahua mau mo e lavelave lahi ke he tau feua sipote ka e kua fakamafana ke eke mo taha paionia tumau. Ne kamata a ia ke paionia fakaku ti fakahaohao atu e tau tuaga hana ke hu he fekafekauaga tumau. Kua fakahiku ai ne hu atu ke he Aoga Fakaako Fekafekau, ati lagomatai aki a ia ke tauteute ai ma e fekafekauaga hana he magaaho nei ko e leveki he takaiaga. Fiafia lahi a ia nukua talia e fakamafanaaga ne foaki age ki a ia, ti kua malolo lahi e loto he logona e fiafia ne fua mai he hana a fifiliaga ke fakalaulahi atu hana a fekafekauaga he Kautu.
5 Na fakamonuina e Iehova e tau tagata ne foaki fakamakai e lautolu hoko lautolu. (Isa 6:8) Aua fakata ha mena ke taofi a koe he fakalaulahi atu e fekafekauaga hau mo e moua ai e fiafia mua atu ke he makonaaga mo e hauhau ka fua mai.