Tau Olioli he Fekafekauaga Mau
1 Ha ko e tama tote, nakai fakauaua kua fita a koe he manamanatu ke he hau a vaha anoiha. Kua talahau mai he Tau Fakatai 21:5 ki a tautolu ko e “tau manatu he tagata ne malolo ke gahua kua hiku ia ke he muhu mena.” To mitaki foki ni ke manamanatu fakahokulo a koe ke he tau foliaga hau he moui. He taute e koe e tau pulega hau ma e vaha anoiha, manamanatu ke taute e fekafekauaga mau. Ko e ha?
2 Huhu ke he falu tagata lalahi ne paionia he tau vaha ne ikiiki a lautolu ko e heigoa e tau mena ne manatu e lautolu mo e fakatumau ni a lautolu ke talahau e mena taha: “Ko e tau tau haia kua mua ue atu he moui haku!” Ko e matakainaga ne moua e tau olioli he fekafekauaga mau tali mai he tote a ia ne talahau he magaaho fakamui he moui: “Ko e punaaga he makona hokulo ke liu haga ki tua ke he magaaho ne fuata mo e maeke ai ke talahau ko ia ne muitua e tomatomaaga pulotu: ‘Kia manatu a a koe ke he hāu a vaha fuata kia ia ne Eke a koe.’” (Fakama. 12:1) Kua lata mo e pulega mitaki mogonei, mai ia koe mo e tau matua hau, ke fakatokatoka e puhala ma hau ke iloa e faga olioli pehenei he vaha fuata hau.
3 Tau Matua, Fakamalolo e Fekafekauaga Mau: Ko Iehova, ko e Matua fakaalofa, kua fakakite fakatonu atu ki a koe e puhala ke fano ai. (Isa 30:21) He foaki e takitakiaga fakaalofa pihia, kua fakatoka e ia e fakafifitakiaga mitaki ma mutolu ko e tau matua Kerisiano. He nakai toka ni ke he fanau hau ke fifili e puhala kua mitaki lahi ma lautolu, kia fakaako fakapulotu a lautolu ke he puhala kua lata ke o ai a lautolu ke maeke ia lautolu ke moua e monuina ha Iehova. Ti, ka lalahi hake a lautolu, to lagomatai he fakaako hau a lautolu ke “mailoga e tau mena mitaki mo e tau mena kelea.” (Hepe. 5:14) Iloa he tau tagata lalahi kua nakai maeke ia lautolu ke talitonu ke he fifiliaga ni ha lautolu; kua lata ia lautolu ke falanaki ki a Iehova ke fakahako e tau puhala ha lautolu. (Fakatai 3:5, 6) Ko e manako nei kua lahi mahaki ma e tau fuata, ha kua tote e mena iloa he moui.
4 Tau matua, he hohoko atu e tau fanau ke he tau tau fuata mui ha lautolu, po ke nakai la hoko ia, tutala fakahokulo ki a lautolu hagaao ke he tau foliaga gahua ha lautolu. To lali e tau tagata leveki he aoga, tau faiaoga, tau kapitiga aoga ke fakaohooho a lautolu ke fifili ke he tau koloa loga he lalolagi. Lagomatai e fanau hau ke fifili e tau mena fakaako kua foaki e fakamahaniaga aoga, he tauteute a lautolu ke leveki e tau manako ha lautolu ke he tino ka e nakai tiaki e tau mena he Kautu. (1 Timo. 6:6-11) Laulahi ki ai, ko e fakaakoaga he aoga tokoluga fakalataha mo e/po ke matafeua ke he fakamahani he gahuaaga ka liga ko e tau mena ni a ia kua lata ke moua ke maeke ke leveki fakamitaki e tau manako he tagata ka e kamata ke he gahua paionia mau.
5 Fakamafana e tau fuata ke tutuli e mena fakaalofa he nofo tokotaha. Ka fifili a lautolu ke mau he magaaho fakamui, to maeke ia lautolu ke hahamo e tau matagahua mamafa lahi he fakamauaga. (Kikite e paratafa 19 he uho he Ha Tautolu a Fekafekauaga he Kautu ia Iuni 2001, “Maeke Nakai Ia Koe?”) He tutala fakamitaki hagaao ke he paionia, fekafekau he matakavi kua lahi e manako, fekafekau he Peteli, mo e gahua misionare, to hifo ke he loto he tau fanau ikiiki pete he ikiiki agaia e tau tau moui e manako ke fakaaoga ha lautolu a tau momoui ke he puhala kua fakafiafia a Iehova, aoga ai e falu, mo e ta mai e olioli ki a lautolu ni.
6 Tau Fuata, Tuku Fakamua e Fekafekauaga Mau: Tau tagata fuata, aua neke tuaha a mutolu na to fefe la e gahua paionia. Maeke ia koe ke kamata vala magaaho he paionia fakaku ka maeke ia koe he tau tau fano aoga mo e he tau magaaho tuku aoga. Ti iloa mogoia e koe e makona moli he gahua paionia! Maeke nakai ia koe ke fakatoka tuai ke paionia fakaku he vaha tata anoiha?
7 Kaeke ko e matakainaga tane fuata a koe he fakatokatokaaga he Atua, kia manamanatu fakahokulo foki he fakaloa atu ke folia e matakai ko e fekafekau lagomatai. (1 Timo. 3:8-10, 12) Lafi ki ai, fifili po kua manako a koe ke tohi ole ma e fekafekauaga he Peteli po ke fina atu ke he Aoga Fakaako Fekafekau Lagomatai, kaeke ke hokotia atu a koe ke he tau tau he moui. Ko e iloa hau he fekafekauaga paionia ka fakaako a koe ke he tau fakaakoaga uho, tuga e puhala ke muitua tumau ke he setulu, puhala ke fakatolomaki e fakatokatokaaga fakatagata hau, puhala ke femataaki mo e falu, mo e puhala ke feaki e aga lago gahua. To tauteute he tau mena oti nei a koe ke lata mo e tau kotofaaga lalahi he fekafekauaga hau a mui.
8 Ko e puhala aoga he kautu ke he fekafekauaga mau ko e aga fakamakutu ke he tau mena fakateokarasi. Ne fakamalolo he aposetolo ko Paulo e aga pihia, ti fakakite ai e tau monuina ka fua mai ai: “Ko e tau mena oti foki kua eke e mutolu kia eke mo e loto, tuga ne eke ke he [Iehova], . . . ha kua iloa e mutolu to moua e mutolu mai he [Iehova] e totogi, ko e tufaaga haia.” (Kolo. 3:23, 24) Kia fakamonuina e Iehova a koe aki e tau olioli loga he fekafekauaga mau!