Foli Atu ke he Fekafekauaga ha Tautolu
1 Ne tomatoma he aposetolo ko Paulo e tau Kerisiano ke ō he puhala he Atua mo e ‘kia au atu he fakamalolo ki ai.’ (1 Tesa. 4:1) Ko e heigoa e kakano he mena nei ma tautolu? Taha e mena kua lata ia tautolu ke fakatumau ke kumi ke he tau puhala ke foli atu ke lahi e gahua fakaagaaga, he eketaha tumau ke ‘fakakatoatoa ni ha tautolu a feua.’—2 Timo. 4:5.
2 Fatuakiloto: Ko e foli atu ke he fekafekauaga ha tautolu kua puna mai he manako ha tautolu ke fekafekau katoatoa ke he Tufuga ha tautolu. Manako a tautolu ke tupu fakaagaaga mo e kumi e tau puhala ke fakatolomaki ki mua e fekafekauaga ha tautolu. Ko e fakaholoaga mitaki mo e fatuakiloto kua tonu ka lagomatai a tautolu ke moua e tau foliaga fakateokarasi.—Sala. 1:1, 2; Filipi 4:6; Hepe. 10:24, 25.
3 He gahua ke fakalaulahi e fekafekauaga ha tautolu kua lata ke feaki e tautolu e aga he foaki noa. Ko e aga pihia kua maeke ke feaki he manamanatu ke he liogi e fakafifitakiaga mitaki a Iesu. (Mata. 20:28) Ne moua e Iesu e olioli lahi he lagomatai e falu he fekafekauaga katoa haana. (Gahua 20:35) Maeke ia tautolu ke fifitaki a Iesu he fakakite e fiafia fakatagata ke he tau tagata mo e mataala ke he tau magaaho ke foli atu ke he fekafekauaga ha tautolu.—Isaia 6:8.
4 Gahua he Tau Matua: Ko e manako ke lagomatai e falu mo e fakalaulahi e fekafekauaga ha tautolu kua lata ke fakaako ke he tau tama he vahā ikiiki. Ko lautolu ne ikiiki kua mailoga e fakamakutu he tau tagata he magafaoa mo e gahuahua malolō ha lautolu he fakalaulahi e fekafekauaga ha lautolu. Taha e matakainaga taane ne fakalagalaga ke foli atu he vahā tote ti ko e fua ne moua he gahua fakalataha mo e tupuna taane haana he tau matagahua fakateokarasi. He kitia e fakamakutu mo e olioli he tupuna taane haana ne omoi a ia ke kumi e tau magaaho ke lagomatai e tau matakainaga haana. Ko e fekafekau lagomatai a ia mogonei.
5 Lata ma e Tau Matakainaga Taane: “Kaeke kua foli e taha . . . , kua manako a ia ke he gahua mitaki.” (1 Timo. 3:1) Ko e tau kupu nei ne fakamalolō e tau matakainaga taane ke foli atu ke lata mo e tau kotofaaga loga he fakatokatokaaga a Iehova. Ko e taute pihia kua nakai lata ke moua e tau makaka pauaki po ke tau iloilo mua ue atu. Ko e matakainaga taane ne foli atu ka kumi fakamua e Kautu mo e fakalataha fakamakai he fekafekauaga. (Mata. 6:33; 2 Timo. 4:5) To lali a ia ke eke mo fakafifitakiaga mitaki ma e falu.
6 Lalolagi Katoa: Hane fakamafiti e Iehova e gahua fakapotopoto. (Isaia 60:22) Kua lata mafiti ma e tau tagata oti ke muitua e fakafifitakiaga a Iesu ke gahua katoatoa ke he fekafekauaga ha lautolu. Ko e hokotaki he lalolagi katoa ma e tau he fekafekauaga he 2006 nukua fakakite kua 248,327 ne papatiso. Kua fakakite he mena ia kua molea e evalesi he 680 a lautolu ne foou mai he tau aho takitaha! Kia fakatumau a tautolu oti ke kumi e tau puhala ke gahua katoatoa ke he fekafekauaga ha tautolu.