Tau Matakainaga Fuata Taane, Kua Foli Atu Nakai a Mutolu?
1. Mogo fe kua lata e matakainaga fuata taane ke fakagahua e tau tomatomaaga ia 1 Timoteo 3:1?
1 “Kaeke kua foli e taha . . . kua manako a ia ke he gahua mitaki.” (1 Timo. 3:1) Ko e tau kupu omoomoi ia he agaaga kua fakamalolō e tau matakainaga taane ke foli atu ke hokotia ke he tau kotofaaga lagomatai he fakapotopotoaga. Lata ni kia a koe ke tagata lahi ke taute pihia? Kua mitaki lahi ke kamata tuai ke foli atu he mogo ne fuata ai. He puhala nei to moua e koe e fakamahaniaga mo e fakakite e malolō haau ke kotofa mo fekafekau lagomatai he mogo ka lahi hake a koe. (1 Timo. 3:10) Kaeke ko e matakainaga fuata taane a koe ne kua papatiso, maeke fēfē ia koe ke foli atu?
2. Maeke fēfē e aga foaki noa ke feaki mo e fakakite ai?
2 Aga Foaki Noa: Manatu ko e foli atu a koe ke he gahua mitaki, nakai ke he matahigoa. Ko e mena ia, kia feaki e manako ke lagomatai e tau matakainaga haau. Taha puhala ke taute e mena ia ko e manamanatu fakahokulo ke he fakafifitakiaga mitaki lahi ha Iesu. (Mata. 20:28; Ioane 4:6, 7; 13:4, 5) Ole ki a Iehova ke lagomatai a koe ke fiafia atu ke he falu. (1 Kori. 10:24) Maeke nakai a koe ke foaki e lagomatai ki a lautolu he fakapotopotoaga ne kua momotua po ke gagao? Maeke nakai ia koe ke moa e tau pupu, oko e tau veve po ke taute falu gahua ke leveki e Fale he Kautu? Maeke nakai a koe ke hukui e taha ke taute e lauga he Aoga Fekafekau Fakateokarasi? To iloa e koe ka foaki atu e koe a koe ke lata mo e falu to moua e koe e fiafia.—Gahua 20:35.
3. Aoga lahi fēfē e tuaga fakaagaaga, mo e feaki fēfē?
3 Tuaga Fakaagaaga: Kua mua e aoga ma e fekafekau he fakapotopotoaga ke malolō fakaagaaga ke he moua e tau taleni po ke lotomatala pauaki. Ko e tagata fakaagaaga to lali ke onoono ke he tau mena tuga a Iehova mo Iesu. (1 Kori. 2:15, 16) Fakatātā e ia e “fua he Agaga.” (Kala. 5:22, 23) Ko ia ko e tagata fakamatala makutu ne tuku fakamua e tau mena he Kautu. (Mata. 6:33) Maeke ia koe ke feaki e tau mahani fakaagaaga he fakatoka e fakaholoaga mitaki ke fakaako fakatagata. Putoia he mena nei e totou e Tohi Tapu he tau aho takitaha, totou e tau fufuta he Ko e Kolo Toko mo e Awake!, mo e tauteute ti fina atu he tau feleveiaaga fakapotopotoaga. (Sala. 1:1, 2; Hepe. 10:24, 25) Mogo ne fakamafana ke he fuata ko Timoteo ke holo ki mua fakaagaaga, ne tohi e Paulo: Kia mataala “a koe kia koe ni, . . . mo e hau a fakaako atu.” (1 Timo. 4:15, 16) Ko e mena ia, kia fakamakamaka ke he tau kotofaaga haau ke lauga he Aoga Fekafekau Fakateokarasi. Tauteute ma e gahua he fonua ti fano tumau foki. Fakatoka e tau foliaga fakaagaaga ti gahua ki ai, tuga e paionia, gahua he Peteli, po ke fina atu he Aoga Tohi Tapu ma e Tau Matakainaga Taane Nofo Tokotaha. To lagomatai he tuaga fakaagaaga a koe ke “hola kehe mo e tau manako lahi he tau fuata.”—2 Timo. 2:22.
4. Ko e heigoa e aoga he falanaki ki ai mo e mahani fakamooli?
4 Maeke ke Falanaki ki Ai mo e Mahani Fakamooli: Ha ko e tau matakainaga taane ne kotofa ke tufatufa e tau mena kai ke he tau Kerisiano nonofogati he senetenari fakamua kua moua e fakaatāaga po ke “talahaua” he maeke ke falanaki ki ai mo e mahani fakamooli, ne nakai tupetupe e tau aposetolo neke nakai maeke ke taute e gahua. Ne fakaatā ai a lautolu ke hagaaki ke he tau mena kua mua e aoga. (Gahua 6:1-4) Ko e mena ia, ka foaki ki a koe e kotofaaga i loto he fakapotopotoaga, eketaha ke taute fakamitaki. Fifitaki ki a Noa, ne muitua fakalahi e ia e tau fakatonuaga ne age ki a ia ke talaga e vaka. (Kene. 6:22) Kua uho ki a Iehova e mahani fakamooli ti kua fakakite foki e motua fakaagaaga.—1 Kori. 4:2; kikite e puha “Tau Fua Mitaki he Fakamahaniaga.”
5. Ko e ha e tau matakainaga fuata taane kua lata ke foli atu?
5 Tuga ni e perofetaaga, ne fakaave e Iehova e matagahua fakapotopoto mai. (Isaia 60:22) He evalesi, kua kuata e miliona tagata ne papatiso he tau tau takitaha. Ha kua tokologa kua o mai foou ke he kupu mooli, kua lata lahi ke moua e tau matakainaga taane motua fakaagaaga ke leveki e tau matagahua he fakapotopotoaga. Kua mua atu he mogonei e lahi he fekafekau ke taute he gahua a Iehova. (1 Kori. 15:58) Tau matakainaga fuata taane, kua foli atu nakai a mutolu? Ka pihia, kua manako a koe ke he gahua mitaki lahi mooli!
[Blurb he lau 2]
Ha kua tokologa kua o mai foou ke he kupu mooli, kua lata lahi ke moua e tau matakainaga taane motua fakaagaaga ke leveki e tau matagahua he fakapotopotoaga
[Puha he lau 3]
Tau Fua Mitaki he Fakamahaniaga
Kua aoga ke he tau matakainaga fuata taane kua lata ka age he tau motua e tau kotofaaga ti fakamahani a lautolu. Ne nofo e leveki takaiaga i mua mo e fakamafana ke he tagata fakailoa he oti e feleveiaaga. Kua mailoga e ia e tama taane ne tu tata mai, ne hūhū ki ai ko e fakatali kia ke tutala mo ia. Ne tala age e fuata taane nei ko e kotofaaga haana ke fakameā e fata i mua ka oti e tau feleveiaaga takitaha. Kua mau e tau mamatua haana ke ō ka e nakai manako a ia ke fano he nakaila taute e kotofaaga haana. Ne fiafia lahi e leveki takaiaga ke uneune. Pehē a ia: “Kua mataala e tau motua he fakapotopotoaga ia ke fakamahani e tau matakainaga fuata taane he age ki a lautolu e tau kotofaaga he fakapotopotoaga. Ko e fua, ne fa mahani a lautolu ke tuku e tau matakainaga fuata taane ke eke mo fekafekau lagomatai ka ahiahi atu au ke he fakapotopotoaga.”