Puhala ke Fakakite e Fakaalofa ke he Katofia ha Tautolu

Ha kua tupu mai oti a tautolu he tagata fakamua ko Atamu, ko tautolu ko e magafaoa taha. Pete kua lata e tau tagata he magafaoa ke fefakaalofaaki mo e fefakalilifuaki, he vahā nei kua uka ke moua e fakaalofa pihia. Nakai ko e manako he Atua fakaalofa ha tautolu anei.

TALAHAUAGA HE TAU TOHIAGA TAPU KE HE FAKAALOFA

“Fakaalofa atu a koe ke he tagata kua katofia mo koe kia tuga na koe kia koe.”​—LEVITIKA 19:18.

“Kia fakaalofa atu a mutolu kia lautolu kua fai fi kia mutolu.”​—MATAIO 5:44.

KAKANO KE FAKAALOFA KE HE TAU TAGATA

Mailoga e fakamaamaaga he Atua ke he fakaalofa he Kupu haana ia 1 Korinito 13:4-7:

“Kua fakauka e fakaalofa, to totonu.”

Manamanatu: Fēfē e logonaaga haau ka fakauka mo e totonu e falu ki a koe mo e nakai ita ha ko e tau hehē haau?

“Nakai mahekeheke e fakaalofa.”

Manamanatu: Fēfē e logonaaga haau ka lahi e tuahā po ke mahekeheke he falu ki a koe?

Ko e fakaalofa kua “nakai kumi e ia hana tau mena.”

Manamanatu: Fēfē e logonaaga haau ka makai e falu ke fakalilifu e tau manatu haau ti nakai peehi tumau e manatu ha lautolu?

Ko e fakaalofa kua “nakai talahaua e kelea ke he taha.”

Manamanatu: Makai e Atua ke fakamagalo e tau tagata kua fakatokihala mai he tau agahala ki a ia. “Nakai totoko mau e ia; nakai taofi tukulagi hana ita.” (Salamo 103:9) Kua loto fakaaue a tautolu ka fakamagalo he taha tagata ne fakahukia e tautolu. Ti lata a tautolu ke mautali ke fakamagalo e falu ka fakaita mai a tautolu.​—Salamo 86:5.

Ko e fakaalofa kua “nakai fiafia ke he tau mahani kelea.”

Manamanatu: Ka fai mena kelea ka tupu ki a tautolu, nakai manako a tautolu ke olioli e falu ke he matematekelea ha tautolu. Ti nakai olioli a tautolu ka matematekelea e falu ke he tau mena vihi, pihia foki ka ekefakakelea e lautolu a tautolu.

Ke moua e tau monuina he Atua, lata a tautolu ke fakaalofa ke he falu he tau puhala nei pete ko hai a lautolu ia. Taha e puhala mitaki ka taute e tautolu e mena nei ko e lagomatai a lautolu kua matematekelea.