Isaya
34 Inywe bihanda, museghere hakuhi, mwowe,
Inywe bitunga by’abandu, muteghe amatwi.
Ekihugho n’ebyosi ebyoswire mukyo bihulikirire,
Ekitaka n’ebyosi ebiri kukyo.
2 Kusangwa Yehova ahitene oko bihanda byosi,
Kandi ahitene oko milondo yabyo yosi y’abasuda.
Akenditoghotyabyo;
Akendihirabyo okw’ikerwa.
3 Abandu babo abalyitawa bakendisyaghuswa ehihya,
N’ekikumbo ky’ebinda byabo kikendisyirukira endata;
Ebitwa bikendisyanuna busana* n’omusasi wabo.
4 Emilondo yosi y’elubula ikendisyahwerekerera,
N’olubula lukendisyalingwa ng’ekitabu ky’erilinga.
Emilondo yalo yosi ikendisyumirana,
Ng’ekikoma ekyumire ekikatogha oko muliki w’omuzabibu
Kandi ng’ekihoho ky’etini ekikatogha oko muti w’etini.
5 “Kusangwa omuyali waghe akendisyatsapibwa omo lubula.
Akendisyandaghalira oko Edomu busana n’eritswera,
Oko bandu abo nabirisohera eritoghotya.
6 Yehova awite omuyali; akendisyusulako omusasi.
Akendisyusulako ebisabu,
Akendisyusulako omusasi w’esyombangale silere-silere n’ow’esyombene,
Akendisyusulako ebisabu by’esyombiko sy’esyombangale.
Kusangwa Yehova awite obuhere e Bozra,
N’erikera linene omo kihugho kye Edomu.
7 Esyonume sy’esyonde sy’omoli* sikendisyandaghala haghuma nabo,
Esyonume sy’esyonde esikine nyilere haghuma n’ab’amaka.
Ekihugho kyabo kikendisyatsapa omo musasi,
N’olututu lwabo lukendisyabya bisabu bisa-bisa.”
8 Kusangwa Yehova awite ekiro ky’erikisya,
Omwaka w’erilihisya esyombanza esyo batwa oko Sioni.
9 Esyonyusi siwe* sikendisyabindulwa mo kasuku,*
N’olututu lwayo mo busingo,*
N’ekihugho kyayo kikendisyabya ng’akasuku akakaka.
10 Omo musibo kutse omo kiro, syendisyalimibwa;
Omuki wayo akendisyabya inianemwerukira omo kyanya kera na kera.
Eritsuka oko kizazi* erihika oko kindi akendisyabya bisambukalirya;
Erihika kera na kera sihali oyukendisyalaba omo muyi oyo.
11 Akendisyabya muyi w’emwari n’endiko,
Ebibukulu by’amahembe n’ebikororo bikendisyikala mugho.
OMungu akendisyapima ekihugho eki omo kamba erikangania ngoko kikendisyabya matongo
N’omo kamba eyiriko ekyuma* erikangania ngoko kikendisyatoghotibwa.
12 “Sihali n’omughuma w’oko syoseghu-seghu syagho oyukendisyahabwa obwami,
N’abanya-mwami bayo bosi bakendisyabya buyira.
13 Amanyumba wayo mali-mali awakongotere akendisyalasamo amahwa,
Ekyatsinge n’ebiti by’amahwa bikendisyalasa omo hakongotere hayo.
14 Esyonyama sy’omo mbwarara sikendisyahindana n’esyonyama esikarururma,
N’embene* y’omoli ikendisyama ikabirikira eyindi.
Inga aho ho enyunyu y’ekiro* ikendisyikala n’eribanaho omwanya w’eriluhukiramo.
15 Eyo yo enzoka ikendisyakokotya olutu lwayo n’erilekera amayayi,
Ikendisyatwagho n’erikuma-kumira ehyana hyayo omo kitsutsu kyayo.
Inga, ebihungu bikendisyayikuma-kumira eyo, eky’obulume n’eky’obukali.
16 Musonda-sondaye omo kitabu kya Yehova musomekyo omo mulenge muli:
Sihali n’enguma eyikendisyabula;
Sihali eyikendisyabula ey’obulume kutse ey’obukali,
Kusangwa obuno bwa Yehova bo bwabiribughakyo,
N’ekirimu kiwe kyo kyabirihindaniasyo haghuma.
17 Iye yo wabirikola obukanga busana nasyo,
N’ebyala biwe iyuwene-wene byabiripimirasyo aho wasyo.*
Sikendisyasighalyakyo emighulu eyosi;
Sikendisyikalayo omo bizazi* byosi.