Yeremia
16 Kandi Yehova mwakania naghe, amanibwira ati: 2 “Isiwatahaya, kandi isiwabutira omo mwanya ono mw’abana b’obulume n’abana b’obukali. 3 Kundi bino byo Yehova akabugha oko bana b’obulume n’abana b’obukali abakabutirawa omo mwanya ono, oko abomama wabo abakababuta, n’oko abobaba wabo abakababutira omo kihugho kino: 4 ‘Bakendihola omo makoni awakita, aliwe sihendisyabya oyukalirabo kutse oyukatabo. Bakendisyabya ng’embolewa oko kitaka. Bakendisyakwa omo muyali n’omo nzala; esyonyunyu sy’omo kyanya n’esyonyama sy’emoli sikendisyalya ebinda byabo.’
5 Yehova ati,
‘Isiwingira omo nyumba eyo bakakoleramo efete y’ekiriro,
Kandi isiwayalira n’abalyaholerawa kutse eriyababwira uti bolo-bolo!’
‘Kundi nabirilusya oko bandu aba kw’obuholo bwaghe,’ Yehova atya,
‘Nabiribalusyako n’olwanzo lwaghe oluteleghula n’obunghanyiri bwaghe.
6 Angabya mukulu kutse mulere, abosi bakendiholera omo kihugho kino.
Sibendisyatabwa,
Sihendisyabya oyukalirabo,
Kandi sihendisyabya oyukendisyayisara-sara kutse oyukendisyahala omutwe busana nabo.*
7 Sihali oyukendisyaha abakalira b’akalyo,
Busana n’eribakirania kundi babiriholerwa.
Kandi sihali oyukendisyabaha ekikombe ekikakiranaya.
Batoke erinywa kundi babiriherya baba wabo kutse mama wabo.
8 Kandi isiwingira omo nyumba eyirimo efete
Uti ukikala haghuma nabo, utoke erirya n’erinywa.’
9 “Kundi Yehova w’emilondo, oMungu we Israeli, ati, ‘Hano, omo mwanya ono, ngendihunia emilenge y’obutseme n’ey’eriyisyandira imukineho kandi imunalangire. Omo mwanya ono, simwendisyasyowika omulenge w’omulunga mulume n’omulenge w’omulunga mukali.’
10 “Ukendibya wabibwira abandu aba b’ebinywa byosi ebi, bakendikubulya bati, ‘Busanaki Yehova mwakabugha ati obuhanya bosi obu bukendituhikira? Mutukakolera Yehova oMungu wetu y’ekosa yahi n’erilolo ryahi?’ 11 Ukendisubiryabyo uti, ‘“Ni kundi abotata-kulu wenyu babirinilekerania,” Yehova atya, “kandi babiriramya eyindi miungu, babirikolerayo, n’erikukamirayo. Aliwe ingye, babirinilekerania, kandi sibetasikya emighambo yaghe. 12 Kandi mwabiriyighendya muhanda kutsibu kulenga n’abotata-kulu wenyu, n’obuli mughuma w’okw’inye akakwama erighundu ry’omutima wiwe omo mwanya w’eriniowa. 13 Busana n’ekyo, ngendibaghusa mulue omo kihugho kino kandi ngendibatwala omo kihugho ekyo inywe n’abotata-kulu wenyu mwataminya. Mukendisyabya mwahika omo kihugho ekyo, mukendisyaramiryayo eyindi miungu omw’itungyi n’omo kiro, kundi sinendisyabakwira obulighe.”’
14 “‘Aliwe ebiro binemwansa,’ Yehova atya, ‘omo biro ebyo, sibendisyasyabugha bati: “Oko kwenene-kwenene ngoko Yehova aliho, oyo walusaya abandu be Israeli omo kihugho kye Misri!” 15 Aliwe omo mwanya w’ekyo, bakendisyabugha bati: “Oko kwenene-kwenene ngoko Yehova aliho, oyo walusaya abandu be Israeli omo kihugho ky’oko luhande lw’endata n’omo bihugho byosi ebyo abapanza-panziramo!” Kandi ngendisyasubyabo omo kihugho kyabo, ekyo naha abotata-kulu wabo.’
16 ‘Ngendibirikira abasohi bangyi b’esyosamaki,’ Yehova atya.
‘Bakendisohabo.
Enyuma sy’aho, ngendibirikira n’abahiyi bangyi.
Bakendihighabo oko buli kitwa n’oko buli katwa.
N’omo mighenyo y’esyonguka.*
17 Kundi ameso waghe akabya inianalangire ebyosi ebyo bakakola.*
Sibebatabisama aho nitenangalangirabo.
N’ekosa yabo siyeyatabisama aho nitenangalangirayo.
18 Eky’erimbere, ngendibaliha omo lulengo olughonere ekyo batolere ibalihwa busana n’ekosa yabo n’erilolo ryabo.
Kundi baritsandya ekihugho kyaghe omo bisosekanio* ebitawite ngebe by’esyosanamu syabo esikita esyonye.
Kandi babiryusulya omo mwandu waghe mw’emyatsi eyikita esyonye.’”
19 Yehova, iwe kaghala kaghe n’omwanya waghe ogho mundu ate angahikamo bweghu-bweghu.
Omwanya waghe w’eritibitiramo omughulu w’obuhanya,
Ebihanda bikendisyasa eyo uli bikalua oko mipaka y’ekihugho.
Bikendisyabugha biti: “Omwandu ogho abotata-kulu wetu balya ni mabehi ghere-ghere,
Ni bindu bule kandi ebite na mughaso kandi ebiteletera endundi.”
20 Omundu anganayikokoterya emiungu?
Oko kwenene, eyo si miungu!
21 “Busana n’ekyo, ngendibaminyisya,
Lero, ngendibakangania akaghala kaghe n’obutoki bwaghe.
Neryo oko kwenene bakendiminya ngoko erina ryaghe ni Yehova.”