Yeremia
24 Neryo Yehova mwanikangania ebibo bibiri by’esyotini ebyabya embere sy’ehekalu ya Yehova. Oko mughulu oyo, omwami Nebukadneza* we Babiloni abya iniabiritwala omo bunyewa mo Yekonia* mughala wa Yehoyakimu, omwami we Yuda, haghuma n’abakulu be Yuda, abafundi n’abahesi;* mwalusyabo e Yerusalema, amatwalabo e Babiloni. 2 Ekibo kighuma kyabyamo esyotini esyuwene kutsibu, syabya ng’esyotini sy’erimbere-mbere. Aliwe ekindi kibo kyabyamo esyotini esitsandire kutsibu, syabya isitsandire, isisyangalibwa.
3 Neryo Yehova mwanibulya ati: “Yeremia, wamalangiraki?” Munamusubirya niti: “Namalangira esyotini, esyotini esyuwene kutsibu, aliwe esitsandire, sitsandire kutsibu, sisyangalibwa.”
4 Kandi Yehova mwakania naghe, amanibwira ati: 5 “Yehova oMungu we Israeli ati, ‘Abandu be Yuda abali omo bunyewa, obo natibitako omo mwanya ono baye omo kihugho ky’Abakaldayo, ngendisyalangirabo ng’esyotini esi esyuwene, ni bugha ambu, ngendisyalangirabo mo bandu abuwene. 6 Eriso ryaghe rikendisyabya irine okw’ibo nitoke erikolerabo ebyuwene, kandi ngendisyasubyabo omo kihugho kino. Ngendisyahimbabo, sinendisyahimbulabo. Ngendisyaherabo, sinendisyakulabo. 7 Ngendisyahabo omutima owanzire eriniminya, owanzire eriminya ngoko ingye Yehova. Bakendisyabya bandu baghe, naghe ngendisyabya Mungu wabo, kundi bakendisyanisubira n’omutima wabo wosi.
8 “‘Aliwe bino byo Yehova akabugha oko syotini esitsandire esitesyangalibwa: “Ko ngendisyalangira nitya omwami Zedekia we Yuda, abakulu b’omo butabali bwiwe, n’abikalani be Yerusalema abasaka, abakiri omo kihugho kino n’abikere omo kihugho kye Misri. 9 Ngendisyayirabo mo kindu ekikita obuba kandi mo buhanya oko mami wosi w’oko kihugho. Ehosi-hosi eyo ngendisyapanza-panzirabo, abandu bakendisyatswebabo, bakendisyabya bakahulabo omo misyo yabo, bakendisyabya bakasekereryabo, n’eritakirabo. 10 Ngendisyatuma kubo kw’omuyali, enzala, n’ekihunzo,* erihika omughulu bakendisyahwa omo kihugho ekyo nahabo, ibo n’abotata-kulu wabo.”’”