Yeremia
30 Yehova mwakania na Yeremia, amamubwira ati: 2 “Yehova, oMungu we Israeli ati, ‘Handika omo kitabu mw’ebinywa byosi ebyo ngakubwira.’ 3 Kundi “ebiro binemwasa,” Yehova atya, “omo biro ebyo, ngendisyakuma-kuma abandu baghe abanyeghawa abe Israeli n’abe Yuda,” Yehova atya, “kandi ngendisyasubyabo omo kihugho ekyo naha abotata-kulu wabo, neryo kandi kikendisyabya kyabo.”’”
4 Bino byo Yehova akabwira abandu be Israeli n’abe Yuda.
5 Yehova ati:
“Twabiryowa emilenge y’erihandabuka;
Hali obuba, sihali obuholo.
6 Kisi mubulaye: ‘Omulume anganabuta?’
Neryo busanaki ninemulangira abalume bosi b’amaka ibabirihira ebyala by’oko syonda*
Ng’omukali oyunemubuta?
Busanaki obuli busu bwabiritumba?
7 Iyooo! Ni kiro ky’obuhanya
Sihali ekindi ekiri ng’ekyo,
Ni kiro ky’obulighe oko Yakobo.
Aliwe akendisyasabulwa mukyo.”
8 “Ekiro ekyo,” Yehova w’emilondo atya, “ngendisyatwa omuketo owali oko ngoto yabo n’esyokamba syagho. Abandu b’omo bindi bihugho sibendisyasyabayira mo bakobe babo. 9 Bakendisyakolera Yehova oMungu wabo, na Daudi omwami wabo oyo ngendisyabahiriraho.”
10 “Naghu, iwe mughombe waghe Yakobo, isiwasagha,” Yehova atya,
Iwe Israeli isiwasaghisibawa.
Kundi ngendisyakusabula n’erikulusya omo kihugho ky’ehali
Kandi ngendisyasabula abana baghu n’eribalusya omo kihugho ekyo batwalawamo banyewa.
Yakobo akendisyasubula, akendisyabya omo buholo n’obutekane,
Sihendisyabya oyukamusaghisaya.”
11 “Kundi nine haghuma naghu, nitoke erikusabula,” Yehova atya,
“Aliwe ngendisyabughaho ebihanda byosi ebyo nakupanza-panziramo;
Aliwe iwe, sinendisyakubughaho.
Ngendisyakukunga omo lulengo olutolere,
Kandi sinendisyabula erikuha amalipizi n’ahake.”
12 Yehova ati:
“Sihali edawa eyangalamya obubune bwaghu.
Ekironda kyaghu sikyangalama.
13 Sihali oyo wangakulwirako,
Sihali edawa eyangalamya ekironda kyaghu.
Sihali edawa eyangakulamya.
14 Abandu bosi abakwanzire kutsibu babirikubirirwa.
Sibakyanzire n’erikurondya.
Kundi nabirikuhunza ngoko enzighu yikapika omundu,
Kandi nabirikuha amalipizi ngoko omutsibu akaha omundu y’amalipizi,
Busana n’ekosa yaghu nene n’amalolo waghu mangyi.
15 Busanaki obubune bwaghu bukaleka iwalira?
Obulumi bwaghu sibwangahwa!
Mungakukolera ekyo
Busana n’ekosa yaghu nene n’amalolo waghu mangyi.
16 Aliwe abosi abakakutomera bakendisyatomerwa,
Esyonzighu syaghu syosi nasyo sikendisyatwalwa omo bunyewa.
Abakaheka ebindu byaghu, nabo ebindu byabo bikendisyahekwa,
N’abakapura ebindu byaghu, nabo ebindu byabo bikendisyapurwa.”
17 “Aliwe ngendisyalamya omubiri waghu n’erilamya ebironda byaghu,” Yehova atya,
“Nomo banakwahula mo oyo wabirighuswa:
‘Sioni, oyutatsomenwe.’”
18 Yehova ati:
“Abanyewa b’omo mahema wa Yakobo, ngendikuma-kumabo,
Ngendikwira esyohema siwe sy’obulighe.
Omuyi akenditasyahimbwa oko katwa,
N’akaleberyo ako omundu ate angahikamo bweghu-bweghu kakendihimbwa omo mwanya ogho katoleremo.
19 Ebinywa by’erisima n’amaseka, bikendisyasirayo.
20 Abana ba Yakobo bakendisyabya ngoko banabya kera,
N’ekitunga kiwe kikendisyasika embere syaghe.
Ngendisyaha abosi abakamwaghalaya b’amalipizi.
21 Eseghu-seghu eyikendisyamutabala yikendisyalua omo kihanda kiwe.
N’omutabali wiwe akendisyalua omo bana biwe.
Ngendisyamusegherya hakuhi, naye akendisyaseghera hakuhi naghe.”
“Kundi nititakola nitya, nindi yo wangabugha ati akaseghera hakuhi naghe?” Yehova atya.
22 “Mukendisyabya abandu baghe, naghe ngendisyabya Mungu wenyu.”
23 Mulebaye! Ekihunga kya Yehova kikendibuhirira omo buhitane,
Akanyabungu kakendindaghalira oko mitwe y’ababi.
24 Ekinigha kinene kya Yehova sikyendisyabondera
Ate akola n’eriberererya ebiri omo mutima wiwe.
Omo biro by’enduli mo mukendisyaminya ekyo nga kikamaanisayaki.