Yeremia

32 Omo mwaka we 10 w’obutabali b’omwami Zedekia we Yuda, ni bughambu, omwaka we 18 w’obutabali b’omwami Nebukadneza,* Yehova mwakania na Yeremia. 2 Oko mughulu oyo, abasuda b’omwami we Babiloni babya ibabiritimba oko muyi we Yerusalema batoke erilwa nagho, n’omuminyereri Yeremia abya inianaboherwe omo Kibugha ky’Abateya b’enyumba y’omwami we Yuda. 3 Kundi omwami Zedekia we Yuda mwamuboha, n’erimubwira ati, “Busanaki ukabugha obuminyereri obuli ng’obo? Ukabugha uti, ‘Yehova ati: “Ngendihira omuyi ono omo byala by’omwami we Babiloni, naye akendihambagho, 4 n’omwami Zedekia we Yuda syendibala oko Bakaldayo, kundi oko kwenene akendihirwa omo byala by’omwami we Babiloni, kandi akendisyakania naye busu kwa busu, n’erimusamalira omo meso.”’ 5 ‘Akendisyatwala Zedekia ye Babiloni, n’eyo yo Zedekia akendisyabya erihika omughulu ngendisyamulengekaniako,’ Yehova atya. ‘Mukendisyayikasa erilwa n’Abakaldayo, aliwe simwendisyasinga.’”

6 Oko mughulu oyo, Yeremia mwabugha ati: “Yehova mwakania naghe, amanibwira ati, 7 ‘Ye Hanameli, mughala wa Shalumu, Shalumu mughala wabo baba waghu, akendyasa n’erikubwira ati: “Ghula eririma ryaghe eriri e Anatoti, kundi iwe w’erimbere w’oko batolere eritasyaghularyo.”’”

8 Hanameli, omwana w’omughala wabo baba waghe, mwasyanibana ngoko Yehova anabugha. Mwanieya omo Kibugha ky’Abateya, neryo mwanibwira ati: “Kisi, ghula eririma ryaghe eririri e Anatoti, omo kiharo kya Benyamini, kundi iwe utolere erimyaryo n’eritasyaghularyo. Uyighulireryo.” Neryo munaminya ngoko ebyo Hanameli abugha byabya ibikalua oko Yehova.

9 Neryo munaghula eririma rya Hanameli, omwana w’omughala wabo baba waghe eryabya e Anatoti. Neryo munamulengera esyofranga: Esyoshekeli* 7 n’ebihande 10 by’efeza.* 10 Enyuma sy’aho, munahandika edokima, namahira kuyo kw’akashe, namabirikira n’abimiri,* n’erilenga esyofranga sy’oko kilo. 11 Munimya edokima y’eririma, eyabyako akashe ngoko emighambo n’ebyalayiro bisabire erikola, munimya n’edokima eyatabyako akashe. 12 Neryo munaha edokima y’eririma eryo yo Baruku, mughala wa Neria mughala wa Maaseya embere sya Hanameli, omwana w’omughala wabo baba waghe, n’embere sy’abimiri* abahandika oko dokima y’eririma, n’embere sy’Abayahudi bosi ababya bikere omo Kibugha ky’Abateya.

13 Enyuma sy’aho, munabwira Baruku embere syabo niti: 14 “Yehova w’emilondo, oMungu we Israeli, ati, ‘Wimaye amadokima aya: Edokima y’eririma eyiriko akashe, n’eyindi dokima y’eririma eyiteko akashe, neryo uhirebyo omo kindu ky’eribumba, amadokima ayo atoke eribugha mughulu muli.’ 15 Kundi Yehova w’emilondo, oMungu we Israeli, ati, ‘Abandu bakendisyatasyaghula amanyumba, amalima n’amalima w’emizabibu omo kihugho kino.’”

16 Nabere nabiha edokima y’eririma yo Baruku mughala wa Neria, munasaba Yehova niti: 17 “Yehova, iwe Mukama Mukulu oko Bosi, iwe wahangyika olubula n’ekihugho omo kaghala kaghu kanene n’omo kuboko kwaghu kw’amaka.* Sihali ekyo wangatalukako, 18 iwe ukakanganaya amaelfu w’olwanzo oluteleghula, aliwe ukaha abana b’amalipizi busana n’ekosa eyo abobaba wabo bakola kera,* iwe Mungu w’ekwenene, omukulu n’ow’Obutoki, iwe ukahulawa mo Yehova w’emilondo. 19 Emipango yaghu ni minene-minene kandi ukakola emyatsi y’obutoki, ameso waghu akabya inianemulebya ebyosi ebyo bandu bakakola, utoke eriliha obuli mundu erikwamana n’emighendere yiwe n’emikolere yiwe. 20 Muwakola emyatsi y’obutoki n’ebitiko-tiko omo kihugho kye Misri, ekyo kikinasibwe erihika na munabwire. N’omw’ikola utya, muwakumayirya erina ryaghu omo Israeli n’omo kati-kati k’abandu, ngoko kiri munabwire. 21 Kandi muwalusya abandu baghu be Israeli omo kihugho kye Misri omw’ikola emyatsi y’obutoki n’ebitiko-tiko, omo byala by’amaka, omo kuboko kw’amaka,* n’omo myatsi eyikita obuba.

22 “Enyuma sy’aho, muwabaha ekihugho kino ekyo walapa eriha abotata-kulu wabo, ekihugho ekikasendamo amaziwa n’obuki. 23 Neryo mubingira omo kihugho ekyo n’erihambakyo. Aliwe mubatakwama omulenge waghu, kandi mubatasikya emighambo yaghu. Mubatakola ekyosi-kyosi ekyo wababwira uti bakole, n’ekyo kyo kyaleka iwabaletera obuhanya bosi obu. 24 Abandu mubasa, bamatimbya oko muyi k’oluhimbo batoke erilwa nagho n’erihambagho. Kandi busana n’omuyali, enzala, n’ekihunzo,* oko kwenene Abakaldayo abakalwa n’omuyi ono bakendihambagho. Ebyosi ebyo wabugha byabiribererera ngoko unalangire. 25 Aliwe Yehova, Omukama Mukulu oko Bosi muwanibwira uti, ‘Ughule eririma oko syofranga, kandi ubirikire abimiri,’* n’omo oko kwenene-kwenene omuyi akendihirwa omo byala by’Abakaldayo.”

26 Neryo Yehova mwakania na Yeremia, amamubwira ati: 27 “Ingye Yehova, oMungu w’abandu bosi,* ingye yono. Hane omwatsi ogho nangatalukako? 28 Neryo Yehova ati, ‘Ngendihira omuyi ono omo byala by’Abakaldayo n’omo byala bya Nebukadneza* omwami we Babiloni, kandi akendihambagho. 29 Abakaldayo abanemulwa n’omuyi oyu bakendingira mugho n’erihisyagho omo muliro. Bakenditimya omuyi oyu n’amanyumba ogho bandu bakahereramo Baali y’amahere oko lutwe lwagho n’eryutirako eyindi miungu ebihembo by’obwabu bakanihitania.’

30 “‘Kundi emyatsi eyituwene omo meso waghe, yo n’abandu be Israeli n’abe Yuda bakanakola eritsuka omo bulwana bwabo. Abandu be Israeli bakabera erinihitania omo myatsi eyo bakakola,’ Yehova atya. 31 ‘Kundi omuyi ono akabera erinihitania n’erileka inabya n’ekinigha eritsuka ekiro bahimbagho, erihika na munabwire. Neryo omuyi oyo atolere inialusibwa embere sy’obusu bwaghe, 32 busana n’ebibi byosi ebyo bandu be Israeli n’abe Yuda bakola busana n’erinihitania, ibo, abami babo, abakulu babo, abahereri babo, abaminyereri babo, abandu be Yuda, n’abikalani be Yerusalema. 33 Ibakabera erinilolyako omughongo omo mwanya w’erinibindukiryako obusu bwabo; munapima erikangiriryabo kangyi-kangyi,* aliwe muhatabya n’oyukahulikirira atoke erikungwa. 34 Kandi mubahira esyosanamu syabo esikita esyonye omo nyumba eyiriko erina ryaghe batoke eritsandyayo. 35 Kandi, mubahimbira Baali y’emyanya y’endata omo Musya w’Omughala wa Hinomu* batoke eribya bakahisirya Moleki y’abana babo b’obulume n’abana babo b’obukali. Nabya isindinatabugha niti bakole omwatsi oyo owakita esyonye, kandi nabya isindinatabya n’amalengekania w’erikola* omwatsi oyo owakita esyonye. Ko baleka batya Yuda iniakola erilolo.’

36 “Mwabiribya mukabugha muti omuyi ono akendisyahirwa omo byala by’omwami we Babiloni omo muyali, omo nzala, n’omo kihunzo. Busana n’ekyo, Yehova, oMungu we Israeli ati, 37 ‘Ngendikuma-kumabo ngalusyabo omo bihugho byosi ebyo nabapanza-panziramo omo buhitane bwaghe, omo kinigha kyaghe, n’omw’itsuruma ryaghe rinene. Kandi ngendisyasubyabo omo mwanya ono n’eribikalyamo buholo. 38 Bakendisyabya abandu baghe, naghe ngendisyabya Mungu wabo. 39 Ngendisyabaha omutima mughuma n’eribalabya omo nzira nguma, batoke eriniubaha mughulu wosi, n’emyatsi yitoke eribaghendera ndeke, ibo n’abana babo enyuma syabo. 40 Kandi ngendisyakola haghuma nabo endaghane ya kera na kera, ngoko sinendisyaleka eribakolera ebyuwene; kandi ngendisyabahiramo omutima w’eriniubaha kusudi isibaniluako. 41 Ngendisyatsema kutsibu ngabakolera ebyuwene, kandi ngendisyaherabo ndeke-ndeke omo kihugho kino, n’omutima waghe wosi n’enafsi* yaghe yosi.’”

42 “Kundi Yehova ati, ‘Ngoko naletera abandu aba b’obuhanya bunene obu, kutya ngendileterabo emyatsi yosi eyuwene eyo ngabalagha. 43 Kandi abandu bakendisyatasyaghula amalima omo kihugho kino ekyo mwabiribya mukabughako muti: “Ni mbwarara eyitemo mundu, kutse enyama, kandi kyabirihirwa omo byala by’Abakaldayo.”’

44 “‘Abandu bakendisyaghula amalima w’oko syofranga, amadokima w’amalima akendisyahandikwa n’erihirwako akashe, bakendisyabirikira abimiri* omo kiharo kya Benyamini, omo biharo ebitimbire oko Yerusalema, omo miyi ye Yuda, omo miyi y’omo kiharo ky’ebitwa, omo miyi y’omo ribanda, n’omo miyi y’oko luhande lw’eyikwa, kundi ngendisyasubulya abandu babo abanyeghawa,’ Yehova atya.”