Yeremia
34 Omughulu omwami Nebukadneza* we Babiloni n’abasuda biwe bosi n’amami wosi w’oko kihugho ogho abya akatabala n’abandu bosi babya bakalwa ne Yerusalema n’emiyi yosi eyitimbire kuyo, Yehova mwakania na Yeremia, amamubwira ati:
2 “Yehova, oMungu we Israeli, ati, ‘Ghenda, uyakanaye n’omwami Zedekia we Yuda, umubwire uti: “Yehova ati, ‘Ngendihira omuyi ono omo byala by’omwami we Babiloni, neryo akendihisyagho omo muliro. 3 Naghu siwendibala omo byala biwe, kundi oko kwenene ukendihambwa n’erihirwa omo byala biwe. Ukendisyasamalira omwami we Babiloni omo meso waghu, akendisyakania naghu busu kwa busu, kandi ukendisyaya e Babiloni.’ 4 Aliwe, hulikirira ekinywa kya Yehova, iwe mwami we Yuda, ‘Yehova akakubughako ati: “Siwendisyitibwa omo muyali. 5 Ukendisyahola buholo, n’omughulu bakendisyakuta, bakendisyakuhisirya obukwa ngoko banakolera abobaba waghu, abami abatabala embere syaghu. N’abandu bakendisyakulira bakabugha bati, ‘Ni mwatsi w’obulighe, mukama waghe!’ ‘Ekyo kyo nanabugha,’ Yehova atya.”’”’”
6 Neryo omuminyereri Yeremia mwabwira omwami Zedekia we Yuda y’ebinywa byosi ebyo e Yerusalema. 7 Oko mughulu oyo, abasuda bosi b’omwami we Babiloni babya bakalwa ne Yerusalema n’emiyi yosi ye Yuda eyasighalira, ni bugha ambu, e Lakishi ne Azeka. Eyo misa yo yabya miyi ye Yuda eyiwatire eyabya isiyiriyatera.
8 Yehova mwakania na Yeremia, mwakania naye omwami Zedekia abikola endaghane n’abandu bosi e Yerusalema ngoko abakobe bakendibya bwiranda, 9 ngoko litolere obuli mundu iniaha obwiranda abakobe biwe Baebrania, bangabya b’obulume kutse b’obukali, kusudi isihabya oyukendisigha Omuyahudi mulilkyabo omo bukobe. 10 Neryo abakulu bosi n’abandu bosi mubakola batya. Babya ibabiringira omo ndaghane eyo n’eriligha bati obuli mundu akendiha obwiranda abakobe biwe b’obulume n’ab’obukali, kandi ngoko sibendibaleka omo bukobe mo mughulu muli. Mubakola batya, bamalekabo baghende. 11 Aliwe, habere habilaba mughulu mulebe, mubasubana n’abakobe b’obulume n’ab’obukali abo babya ibabiriha obwiranda, kandi mubabasubya omo bukobe. 12 Neryo Yehova mwakania na Yeremia. Yehova mwamubwira ati:
13 “Yehova, oMungu we Israeli, ati, ‘Munakola endaghane n’abotata-kulu wenyu ekiro nabalusaya omo kihugho kye Misri, ni bugha ambu, omo nyumba y’obukobe. Munababwira niti: 14 “Emyaka 7 yabihwa, obuli mughuma w’okw’inywe atolere iniaha obwiranda omughala wabo Muebrania oyo aghula, n’oyo wamukolera omo myaka 6; litolere imwamuha obwiranda.” Aliwe abotata-kulu wenyu mubataniowa kutse eritegha amatwi wabo ngakania nabo. 15 Aliwe inywe, sihehakya biro binene* imwamabiyisubako: Mumukakola ebyuwene omo meso waghe omw’iha obwiranda abalikyenyu, n’erikolera endaghane embere syaghe omo nyumba eyiriko erina ryaghe. 16 Aliwe enyuma sy’aho, mwabiritasyabinduka: Mwabiritsandya erina ryaghe omw’isubana n’abakobe benyu b’obulume n’ab’obukali, abo mwabya imwabiriha obwiranda batoke eriya eyo banzire, mwabiritasyabasubya omo bukobe.’
17 “Busana n’ekyo, Yehova ati: ‘Mumutitaniowa kundi simwetaha abaghala n’abalikyenyu b’obwiranda. Aliwe ingye ngendibaha obwiranda, obwiranda bw’erihola omo muyali, omo kihunzo,* n’omo nzala. Kandi ngendibayira mo kindu ekikita amami wosi awali oko kihugho w’obuba, Yehova atya. 18 Eno y’emyatsi eyikendisyahikira abandu abatasikaya endaghane yaghe omw’itendikwama ebinywa ebiri omo ndaghane eyo bakolera embere syaghe omughulu batwa ekyana ky’ende mo bihande bibiri n’erilaba omo bihande bibiri ebyo, 19 ni bugha ambu, abakulu be Yuda, abakulu be Yerusalema, abakulu abakakolera oko bwikalo bw’omwami, abahereri, n’abandu bosi b’omo kihugho abalaba omo kati-kati k’ebihande bibiri by’ekyana ky’ende ekyo: 20 Ngendihirabo omo byala by’esyonzighu syabo n’omo byala by’abakasonda eribita.* Ebinda byabyo bikendisyabya kalyo k’esyonyunyu sy’omo kyanya n’ak’esyonyama sy’oko kihugho. 21 Kandi ngendihira omwami Zedekia we Yuda n’abakulu b’omo butabali bwiwe omo byala by’esyonzighu syabo n’omo byala by’abakasonda eribita* n’omo byala by’abasuda b’omwami we Babiloni, abanemulua ewenyu.’
22 “‘Ngendibabwira ekyo litolere ibakola,’ Yehova atya, ‘kandi ngendisubyabo omo muyi ono. Neryo bakendilwa n’omuyi ono, ibahambagho, n’eritimyagho omo muliro. Ngendiyira n’emiyi ye Yuda mo matongo, awatikeremo mundu.’”