Yeremia

36 Omo mwaka w’akani w’obutabali bwa Yehoyakimu mughala wa Yosia, omwami we Yuda, Yehova mwakania na Yeremia, amamubwira ati: 2 “Imaya ekitabu ky’erilinga, uhandikemo ebinywa byosi by’eritswera ebyo nakubwira oko Israeli, oko Yuda, n’oko bihanda byosi, eritsuka ekiro ky’erimbere ekyo nakanaya naghu omo biro bya Yosia erihika na munabwire. 3 Kwa muhwa abandu be Yuda bakendibya babyowa oko buhanya bosi obo nanzire eribaletera, banganaleka emikolere yabo mibi, neryo ingendighanyira ekosa yabo n’erilolo ryabo.”

4 Neryo Yeremia mwabirikira Baruku mughala wa Neria, Yeremia mwamubwira ebyo akendihandika, mwamubwira ebyosi ebyo Yehova amubwira. Neryo Baruku mwahandikabyo omo kitabu ky’erilinga. 5 Enyuma sy’aho, Yeremia mwabwira Baruku ati: “Nibohirwe, sinangatoka eringira omo nyumba ya Yehova. 6 Neryo iwe utolere eriyasomera abandu omo mulenge muli ebinywa bya Yehova ebiri omo kitabu ky’erilinga ebyo ulyahandika omughulu nilue ngakubwira ebyo ukendihandika. Usomerebyo abandu omo nyumba ya Yehova, omo kiro ky’amafungo. Neryo abandu bosi be Yuda abalyalua omo miyi yabo bakendyowabyo. 7 Kwa muhwa Yehova akendyowa omusabe wabo w’erimusaba bati abakanganaye olukogho, kandi kwa muhwa banganaleka emikolere yabo mibi, kundi Yehova abirihitana kutsibu n’erikapikira busana n’abandu aba.”

8 Neryo Baruku mughala wa Neria mwakola ebyosi ebyo omuminyereri Yeremia amubwira ati akole; mwasomera omo nyumba ya Yehova omo mulenge muli mw’ebinywa bya Yehova ebyabya omo kitabu ky’erilinga.*

9 Neryo omughulu w’obutabali bwa Yehoyakimu mughala wa Yosia, omwami we Yuda, oko mwisi we 9, omwaka w’akatano, abandu bosi be Yerusalema n’abandu b’omo miyi ye Yuda abasa e Yerusalema mubakola amafungo embere sya Yehova. 10 Neryo Baruku mwaya omo nyumba ya Yehova, amingira omo kyumba ky’eriliramo* kya Gemaria mughala w’omuhandiki Shafani, omo kibugha ky’endata, ekyabya hakuhi n’omulango muhya w’enyumba ya Yehova. Neryo mwasomera abandu bosi omo mulenge muli ebinywa bya Yeremia ebyabya omo kitabu ky’erilinga.*

11 Omughulu Mikaya mughala wa Gemaria, mughala wa Shafani, owa ebinywa byosi bya Yehova ebyabya omo kitabu ky’erilinga,* 12 mwandaghalira eyiri enyumba y’omwami, amayingira omo kyumba ky’omusekretere. Abakulu bosi* babya ibanikereyo. Habya omusekretere Elishama, Delaya mughala wa Shemaya, Elnatani mughala wa Akbori, Gemaria mughala wa Shafani, Zedekia mughala wa Hanania, n’abandi bakulu bosi. 13 Mikaya mwababwira ebinywa byosi ebyo owa omughulu Baruku asomera bandu b’ekitabu ky’erilinga.*

14 Neryo abakulu bosi mubatuma Yehudi mughala wa Netania, mughala wa Shelemia, mughala wa Kushi, ayabwire Baruku ati: “Wase n’ekitabu ky’erilinga ekyo ulyasomera bandu.” Neryo Baruku mughala wa Neria mwimya ekitabu ky’erilinga, amaya eyo bali. 15 Mubamubwira bati: “Kisi, ikala, neryo utusomere ekitabu ekyo omo mulenge muli.” Neryo Baruku mwabasomerakyo.

16 Abakulu abo mubabya babyowa ebinywa byosi ebyo, mubasamalirana, ibabirikwa obuba. Neryo mubabwira Baruku bati: “Oko kwenene, litolere itwabwira omwami ebinywa byosi ebi.” 17 Kandi mubabulya Baruku bati: “Kisi, utubwire nga muwahandika ebinywa ebi byo ghuti. Yeremia yo wabya akakubwira ati uhandikebyo?” 18 Baruku mwabasubirya ati: “Yeremia yo wabya akanibwira ati nihandike ebinywa byosi ebi. Munahandikabyo omo kitabu ky’erilinga* omo bwino.” 19 Abakulu mubabwira Baruku bati: “Muyayibise, iwe na Yeremia. Isimwabwira omundu wosi-wosi oho muli.”

20 Neryo abakulu abo mubaya eyiri omwami, omo kibugha, bamahira ekitabu ky’erilinga omo kyumba ky’omusekretere Elishama, kandi mubabwira omwami y’ebinywa byosi ebyo balyowa.

21 Neryo omwami mwatuma Yehudi ati ayende ekitabu ky’erilinga ekiri omo kyumba ky’omuhandiki Elishama. Yehudi mwatsuka erisomakyo embere sy’omwami n’embere sy’abakulu bosi ababya bimene hakuhi n’omwami. 22 Byabya oko mwisi we 9, n’omwami abya inianikere omo nyumba eyo akakabyamo omughulu w’embeho nene. Omuliro abya inianemwakira oko mbebula embere siwe. 23 Yehudi iniakabya abisoma ebitswe* bisatu kutse bini, omwami iniakatwa ekihande ekyo Yehudi amabisoma ky’omo muhamba, neryo iniaghusakyo omo muliro owali oko mbebula. Omwami mwakola atya erihika omughulu ekitabu kyosi ky’erilinga kyahwerera omo muliro owabya oko mbebula. 24 Omwami n’abaghombe biwe mubatasagha omughulu bowa ebinywa ebyo. Muhatabya n’oyukatulanga esyongyimba siwe. 25 Elnatani, Delaya, na Gemaria mubalemba-lemba omwami bati isyahisaya ekitabu ky’erilinga, aliwe mwatowa. 26 Kandi, omwami mwabwira Yerameeli mughala w’omwami, Seraya mughala wa Azrieli, na Shelemia mughala wa Abdieli ati bayahambe omusekretere Baruku n’omuminyereri Yeremia, aliwe Yehova mwabisabo.

27 Omwami mwabya abihisya ekitabu ky’erilinga ekyabyamo ebinywa ebyo Yeremia abwira Baruku ati ahandike, kandi Yehova mwakania na Yeremia, amamubwira ati: 28 “Wimaye ekindi kitabu ky’erilinga, uhandike mukyo mw’ebinywa byosi ebyabya omo kitabu ky’erilinga ky’erimbere, ekyo omwami Yehoyakimu we Yuda alyatimaya. 29 Kandi ukendibugha oko mwami Yehoyakimu we Yuda uti: ‘Yehova ati: “Mughukahisaya ekitabu eki ky’erilinga n’eribugha uti, ‘Busanaki mughukahandika mukyo uti: “Oko kwenene, omwami we Babiloni akendyasa n’eritsandya ekihugho kino n’eribugha mw’abandu n’esyonyama”?’ 30 Bino byo Yehova akabugha oko mwami Yehoyakimu we Yuda: ‘Sihali n’omwitsikulu wiwe n’omughuma oyukendisyikala oko kitumbi ky’obwami kya Daudi, n’abandu bakendisyaleka ekinda kiwe omo kihuhania ky’omw’itungyi n’omo luhohe lw’omo kiro. 31 Ngendisyamutswera, iye, abitsikulu biwe, n’abaghombe biwe busana n’ekosa yabo. Kandi ngendibaletako obuhanya bosi obo nabugha niti ngendibaletako, ibo, abikalani be Yerusalema n’abandu be Yuda, kundi mubatowa.’”’”

32 Neryo Yeremia mwimya ekindi kitabu ky’erilinga, amahakyo Baruku mughala wa Neria, omusekretere. Enyuma sy’aho, Yeremia mwamubwira ebyo akendihandika, neryo mwahandika ebinywa byosi ebyabya omo kitabu ky’erilinga ekyo omwami Yehoyakimu we Yuda ahisaya. N’ebindi binywa bingyi ebiri ng’ebyo mubyatomekwamo.