Yeremia
43 Yeremia mwabwira abandu bosi b’ebinywa byosi ebyo Yehova oMungu wabo abugha, ebyosi ebyo Yehova oMungu wabo amubwira ati ababwire. Mwabya abibabwirabyo, 2 Azaria mughala wa Hosaya, Yohanani mughala wa Karea, n’abalume bosi abakayiheka mubabwira Yeremia bati: “Ukateba! Yehova oMungu wetu syetakutuma ati ubughe uti, ‘Isimwayikala e Misri.’ 3 Aliwe Baruku mughala wa Neria yukakutsotsaya eribugha ebyo kusudi tuhirawe omo byala by’Abakaldayo, neryo batwite kutse eritutwala omo bunyewa mwe Babiloni.”
4 Neryo Yohanani mughala wa Karea, abakulu bosi b’abasuda, n’abandu bosi mubatakwama omulenge wa Yehova: Mubaghana erisighala omo kihugho kye Yuda. 5 Aliwe Yohanani mughala wa Karea n’abakulu bosi b’abasuda mubaheka abandu bosi be Yuda abasighalira, abalua omo bihanda byosi ebyo bapanza-panzirawamo batoke erisyikala omo kihugho kye Yuda. 6 Mubaheka abalume, abakali, abana, abali b’omwami, n’abosi* abo Nebuzaradani omukulu w’abateya asighira Gedalia mughala wa Ahikamu, mughala wa Shafani. Mubaheka n’omuminyereri Yeremia na Baruku mughala wa Neria. 7 Mubaya omo kihugho kye Misri, kundi mubatakwama omulenge wa Yehova. Mubayahika ne Tapanesi.
8 Yehova mwakania na Yeremia e Tapanesi, amamubwira ati: 9 “Imaya omo byala byaghu mw’amabwe manene-manene, ubisegho ahasesire esyombiriki ahali hakuhi n’obwingiriro bw’enyumba ya Farao e Tapanesi n’erihira kugho kw’ebyondo. Ukendiyira utya Abayahudi ibanalangire. 10 Enyuma sy’aho, ukendibabwira uti, ‘Yehova w’emilondo, oMungu we Israeli, ati: “Ngendibirikira Nebukadneza* omwami we Babiloni, omughombe waghe. Ngendihira ekitumbi kiwe ky’obwami endata oko mabwe aya ogho niryabisa, kandi akendisanza kugho kw’ehema yiwe y’obwami. 11 Akendyasa n’erihunza ekihugho kye Misri. Abandi bakendihola omo kihunzo ekikaholaya, abandi bakenditwalwa omo bunyewa, n’abandi bakenditibwa omo muyali. 12 Ngenditimya esyohekalu sy’emiungu ye Misri omo muliro, na Nebukadneza akendihisya esyohekalu esyo n’eritwala emiungu eyo omo bunyewa. Akendisyayilingirako ekihugho kye Misri ngoko omulisya akayilingirako olukimba lwiwe, kandi akendisyaluayo buholo.* 13 Akendisyatsutsanga esyonduyi sye Bet-shemeshi* e Misri, kandi akendisyatimya esyohekalu sy’emiungu ye Misri omo muliro.”’”