Yeremia
48 Bino by’ebinywa ebyo Yehova w’emilondo, oMungu we Israeli, akabugha oko Moabu:
“Bulighe oko Nebo, kundi abiritoghotibwa!
Kiriataimu abirihemulwa n’erihambwa.
Obusayiro* bw’eriyiketerwa bwabirihemulwa n’eritsutsangwa.
2 Abandu sibakipipa Moabu.
Mubakamuyirira embita y’erimutoya e Heshboni:
‘Mwase, tubugheho ekihanda eki.’
Naghu, Madmeni, ubye bukutu,
Kundi omuyali anemukukwamirira.
3 Emilake yinemwasira e Horonaimu,
Kundi abiritoghotibwa n’erihimbukala kutsibu.
4 Moabu abiritera.
Abana biwe banemuyilakira.
5 Omo bwiruka bwe Luhiti, abandu banemweruka bakalira.
N’omo bwandaghala bwe Horonaimu munemwasira emilenge y’abandu abali omo bulighe busana n’obuhanya.
6 Mutibite, mubalaye engebe yenyu!*
Mubye ng’omuti w’ekilaghu owali omo mbwarara.
7 Kundi ukayiketera emibiiri yaghu n’ebindu byaghu by’obughuli,
Naghu ukendihambwa.
Na Kemoshi akendisyaya omo bunyewa,
Haghuma n’abahereri biwe n’abakulu abakamukolera.
8 Omutsandya akendisyahika omo buli muyi,
Sihali omuyi ogho akendisyabalya.
9 Mwimanaye ekiminyikalo ekikakanganaya enzira ye Moabu.
Kundi omughulu Moabu akendisyatera, abikalani bamo bakendisyatibita,
N’emiyi yamo ikendisyabya ekindu ekikita obuba,
Simwendisyikala mundu.
10 Atakirawe oyukakola omubiiri wa Yehova wo kitya-kitya!
Atakirawe oyukaghana eryuta omusasi omo muyali wiwe!
11 Abamoabu bikere buholo eritsuka omo bulwana bwabo,
Bali ng’edivai eyabiriteka.*
Sibalibalusibwa omo kindu kighuma n’erikungumulirwa omo kindi,
Kandi sibebatatwalwa omo bunyewa.
Ekyo kyo kyabirileka obusi bwabo ibwasighala bughumerera,
N’ekikumbo kyabo ikyatabinduka.
12 “‘Busana n’ekyo, muhulikirire! Ebiro binemwasa,’ Yehova atya. ‘Omo biro ebyo, ngendisyatuma kubo kw’abandu bayaterayegho. Bakendisyabindulabo n’erilusya omo bindu byabo mw’ebyosi ebirimo. Bakendisyatulanga amalegha wabo manene-manene. 13 Abamoabu bakendisyakwira Kemoshi y’esisoni, ngoko abandu be Israeli bakakwira ebyo babya bakakolera e Beteli by’esisoni, ebyo babya bayiketere.
14 Mwanganatoka eribugha muti: “Tuli basuda b’amaka, tune tayari eriyalwa”?’
15 ‘Moabu abiritoghotibwa,
Emiyi yiwe yabirihambwa,
N’abalwana biwe abuwene nga babirikerwa,’
Omwami, oyukahulawa mo Yehova w’emilondo, atya.
16 Obuhanya obukendihikira Abamoabu bukisiya ibwahika,
N’eritera ryagho rinemwasa luba-luba.
17 Abosi ababatimbireko bakendibakwira obulighe,
Abosi abasi erina ryabo.
Ubabwire uti: ‘Efimbo y’amaka yabiritwibwa, omutso oghuwene nga!’
18 Ulue omo lukengerwa lwaghu,
Kandi wikale iwabirikwa enyota,* iwe mumbesa, iwe wikere e Diboni,
Kundi omutsandya we Moabu abirisyalwa naghu
Kandi akendihimbula emyanya yaghu eyo mundu ate angahikamo bweghu-bweghu.
19 Wimane hakuhi n’endaki n’erisamalira, iwe mwikalani we Aroeri.
Ubulaye omulume oyukatibita n’omukali oyukatswa uti, ‘Yamabyaki?’
20 Moabu abirihemulwa kandi abirikwa obuba.
Musimbe n’erilaka.
Mutulaghanaye hakuhi ne Arnoni ngoko Moabu abiritsandibwa.
21 “OMungu abiritswera olwerere,* e Holoni, e Yahazi, e Mefahati; 22 e Diboni, e Nebo, e Bete-diblataimu, 23 e Kiriataimu, e Bete-gamuli, e Bete-meoni; 24 e Kerioti, e Bozra, n’emiyi yosi y’omo kihugho kye Moabu, yangabya hakuhi kutse hali.
25 ‘Akaghala* ka Moabu kabirikehibwa;
Okuboko kwiwe kwabiribunika,’ Yehova atya.
26 ‘Umutamiraye, kundi abiriyihalamba ati anganasinga Yehova.
Moabu akayikumbaghalaya omo bisalo biwe,
Kandi akasekereribawa.
27 Si n’iwe wabya ukasekererya Israeli!
Mubakanamuranga omo bibi,
Kusudi utsingaye omutwe n’erimubughako muhanda?
28 Mulue omo miyi, muyikale oko lukuka,* inywe bikalani be Moabu,
Mubye ng’akalikuku akakahimba oluto lwako omo ngwangwa.’”
29 “Mutwowire oko miyiheko ya Moabu—akayiheka kutsibu—
Mutukowa ngoko akayilangira, akayiheka, akayikokolomaya, kandi ngoko awite omutima w’eriyihalamba.”
30 “‘Ninasi ngoko akahitana luba-luba,’ Yehova atya,
‘Aliwe ebinywa biwe ebite na mughaso sibyendisyalwira mo kindu.
Syendisyakola mwatsi.
31 Ekyo kyo kikendisyaleka inasimba busana na Moabu,
Ngendisyalaka busana n’ekihugho kyosi kye Moabu.
Kandi ngendisyasimba busana n’abandu be Kiri-heresi.
32 Iwe muzabibu we Sibma, ngendisyakulira
Kulenga ngoko nalira Yazeri.
Emitahi yaghu eyiboghire yabirisoka engetse,
Yabirihika eyiri engetse e Yazeri
Omutsandya abiritsandya amatunda waghu awakera oko mughulu w’ekipwa*
N’emizabibu yaghu eyo wabiryoha.
33 Obutseme n’eriyisyandira ryabirihwa omo ririrma ry’amatunda
N’omo kihugho kye Moabu.
Nabirileka edivai iyitalua omo kikamiro.
Sihali oyukendilyatangira emizabibu inianemutsema.
Emilenge yabo ikendisyabya y’oghundi muhanda.’”
34 “‘Efuyo yinemulua e Heshboni, iyayahika e Aleale.
Banemubugha omo mulenge muli, iniayahika e Yahazi,
Efuyo yinemwasira e Zoari, iyayahika e Horonaimu, kandi iyayahika e Eglati-shelishiya.
Nibya n’amaghetse we Nimrimu akendisyuma.
35 Ngendisyabugha omo Moabu mo mundu oyukaleta ekihembo omo mwanya w’endata
N’oyukaherera amahere w’oMungu wiwe, Yehova atya.
36 Busana n’ekyo, omutima waghe akendisyimba ng’enyabulere* busana na Moabu,
Kandi omutima waghe akendisyasyimba ng’enyabulere* busana n’abandu be Kiri-heresi.
Kundi obuteke obo atunda bukendisyahwa.
37 Emitwe yosi yabiribyako oluhala,
N’esyonderu syosi syabiritibwa.
N’oko byala byosi kuli ebisaro-bisaro,
Kandi babirimbala olukimba lw’esaki* omo syombindi syabo!’”
38 “‘Oko buli lutwe lwe Moabu
N’omo buli mwanya wiwe w’abandu bosi,
Ekiriro kisa kyo kinemwowikayo.
Kundi nabiribunanga Moabu
Ng’erilegha eryabirighuswa,’ Yehova atya.
39 ‘Abirisagha kutsibu! Musimbe!
Mulangire ngoko Moabu abirinibindukirya omughongo wiwe busana n’esisoni!
Moabu abiribya kindu ky’erisekererwa,
Ekindu ekikita abandu bosi abamutimbireko bo buba.’”
40 “Kundi Yehova ati:
‘Muhulikirire! Ngoko erisamba rikandaghalira oko kitaka,
Kutya n’enzighu ikendisyasanzira ebipupa byayo oko Moabu.
41 Emiyi yikendisyahambwa,
N’emyanya yamo eyo mundu ate angahikamo bweghu-bweghu ikendisyahambwa.
Ekiro ekyo, omutima w’abasuda be Moabu
Akendisyabya ng’ow’omukali oyunemubuta.’”
42 “‘Moabu akendisyahwaho, syendisyabya kihanda.
Kundi mwakayihalamba ati anganasinga Yehova.
43 Obuba bunene, ekyuna, n’ekitegho biri embere syaghu,
Iwe mwikalani we Moabu,’ Yehova atya.
44 ‘Oyukendisyatibita busana n’obuba bunene akendisyatoghera omo kyuna,
N’oyukendisyalua omo kyuna akendisyahambwa omo kitegho.’
‘Kundi ngendisyaletera Moabu y’omwaka wiwe w’erihabwa amalipizi,’ Yehova atya.
45 ‘Abakatibita babirimana omo kitsutsu kye Heshboni isibakiwite akaghala.
Kundi omuliro akendisyalua e Heshboni
N’ekirimi kikendisyalua e Sihoni.
Kikendisyahisya embumo ya Moabu
N’erikuha ry’oko mutwe ry’abasuda abatsurumire.’
46 ‘Bulighe okw’iwe, Moabu!
Abandu be Kemoshi babirihwaho.
Abaghala baghu bosi babiritwalwa omo bunyewa,
N’abali baghu babiritwalwa omo bunyewa.
47 Aliwe omo biro by’enduli, ngendisyakuma-kuma abanyewa be Moabu,’ Yehova atya.
‘Ebinywa by’eritswera Moabu bitwirirye hano.’”