Yeremia
50 Bino byo Yehova abwira omuminyereri Yeremia oko Babiloni, oko kihugho ky’Abakaldayo:
2 “Mutulaghanayebyo omo kati-kati k’ebihanda n’erilalaniabyo.
Muhande omuti owakendikangania ah’erihindana, kandi mutulaghanaye omwatsi oyo.
Isimwabisa mwatsi!
Mubughe muti, ‘Babiloni abirihambwa.
Beli abirihemulwa.
Merodaki abirisagha kutsibu.
Esyosanamu sye Babiloni syabirihemulwa.
Esyosanamu syamo esikita esyonye* syabirisaghisibwa.’
3 Kundi ekihanda kyabirilua oko luhande lw’endata kikasyalwa na Babiloni.
Kyabiriyira ekihugho ekyo mo kindu ekikita obuba;
Simukikere omundu.
Abandu n’esyonyama, abosi babiritibita;
Babirighenda.”
4 “Omo biro ebyo n’oko ndambi eyo,” Yehova atya, “abandu be Israeli n’abandu be Yuda bakendisyasa haghuma. Bakendisyaghenda bakalira, kandi bakendisyasondya-sondya Yehova oMungu wabo yo haghuma. 5 Bakendisyabulya enzira ye Sioni nga yiri hayi. Obusu bwabo bukendisyabya ibunalolirye e Sioni, kandi bakendisyabugha bati, ‘Mwase tuyighunge oko Yehova omw’ikola naye endaghane ya kera na kera eyitendisyibiriranwa.’ 6 Abandu baghe babiribya ng’esyombuli esiherire. Abalisya basyo bo balyaleka isyahera. Mubatwaliresyo oko bitwa, bamaghangya-ghangyasyo. Ibakalusayasyo oko kitwa, ibatwalasyo oko katwa. Esyombuli syabiribirirwa oho sikaluhukira. 7 Abosi ababya bakasungasyo ibakatomerasyo, n’esyonzighu syasyo musyabugha siti, ‘Situli na lubanza, kundi mubakolera Yehova y’erilolo, mubakosera omwanya w’oyutunganene, oyo wabya maha w’abotata-kulu wabo, ye Yehova.’”
8 “Mutibite n’erilua e Babiloni,
Mulue omo kihugho ky’Abakaldayo,
Mubye ng’esyonyama esikabera esindi sy’embere.
9 Kundi ngendikuma-kuma ebihanda binene-binene by’omo kihugho ky’oko luhande lw’endata,
Ngendiletabyo bisyalwe ne Babiloni.
Bikendilwa naye ibyabiriyipanga busana n’amalwa.
Neryo Babiloni yikendihambwa.
Emisali yabo yiri ng’ey’omusuda
Oyukaleka ababuti ibatabya n’abana;
Siyiriswata n’ahake.
10 Ekihugho ky’Abakaldayo kikendibya kindu ky’erinyegha.
Abosi abakendisyapura ebindu byamo bakendisyughuta ndeke-ndeke,” Yehova atya.
11 “Kundi mumwabya mukatsema, mumwabya mukayisyandira
Omughulu mwabya mukapura omwandu waghe.
Mumwabya mukapika ebisando byenyu by’oko kitaka ng’ende nyilere eyiri omo biti,
Mumwabya mukabehererya ng’esyosabayiri* sy’obulume.
12 Mama wenyu abirihemuka.
Oyo wababuta abiribunika mutima.
Mulangire! Yo muke omo bihanda,
Omwanya owatemo maghetse, kandi embwarara.
13 Busana n’erihitana rinene rya Yehova, syendisyikalamo mundu;
Akendisyabya matongo w’ekwenene.
Abosi abakendisyalaba hakuhi na Babiloni bakendisyasamalirayo n’erikwa obuba.
Kandi bakendisyasughunda busana n’ebihunzo byosi ebiryahikamo.
14 Muyipange busana n’amalwa n’eryasira oko syombande syosi mukasyalwa ne Babiloni,
Mumughuseko emisali, mumughuseko eyosi,
Kundi mwakakolera Yehova y’erilolo.
15 Oko syombande syosi, mumulakire omo mulenge w’amalwa.
Abirisumba ebyala.*
Esyonduyi siwe syabiritera, esyombimbo siwe syabirihimbulwa,
Kundi Yehova yukayituhuliraya.
Nenyu mumukolere muhanda.
Mumukolere ngoko anabakolera.
16 Mubughe* omo Babiloni mo mundu wosi-wosi oyukahera
N’oyukakolesaya omughusu omughulu w’erighesa.
Busana n’omuyali owatsurumire, obuli mundu akendisuba eyiri abandu b’ewabo.
Obuli mundu akenditibitira omo kihugho kiwe.
17 “Abandu be Israeli ni syombuli esyabiripanzwa-panzwa. Esyosimba syabiripanza-panzabo. Eky’erimbere, omwami we Asiria mwakatomerabo. Enyuma sy’aho, omwami Nebukadneza* we Babiloni amabobongolya amakuha wabo. 18 Busana n’ekyo, Yehova w’emilondo, oMungu we Israeli, ati: ‘Ngendiha omwami we Babiloni n’ekihugho kiwe ky’amalipizi ngoko naha omwami we Asiria y’amalipizi. 19 Enyuma sy’aho, ngendisyasubya Abaisraeli omo bulisiryo bwabo, bakendisyalira ebiti e Karmeli ne Bashani, kandi bakendisyalya n’eryughutira oko bitwa bye Efraimu n’ebye Gileadi.’”
20 “Oko biro ebyo n’oko mughulu oyo,” Yehova atya,
“Abandu bakendisyarondya ekosa ya Israeli,
Aliwe sibendisyasungayo,
Sibendisyasunga n’amalolo wa Yuda,
Kundi ngendisyaghanyira abo ngendisyasigha.”
21 “Uyalwe n’ekihugho kye Meratimu n’abikalani be Pekodi.
Witebo n’eribabughaho,”* Yehova atya.
“Ukole ebyosi ebyo niryabugha niti ukole.
22 Omo kihugho muli omulenge w’amalwa,
Obuhanya bunene.
23 Ehama y’omuhesi eyabya ikatsutsanga ebihanda byosi by’oko kihugho yabiritwibwa n’eribunangwa!
Babiloni abiribya kindu ekikita obuba omo kati-kati k’ebihanda!
24 Iwe Babiloni, mungakutegha, neryo wabirihambwa omo kitegho
Siwetaminya nibya.
Mubakakusunga n’erikuhamba,
Kundi Yehova yo ulyalwa naye.
25 Yehova abirikingula edepo yiwe,
Abirilusyamo ebindu by’amalwa ebyo akakolesaya erikangania ngoko abirihitana kutsibu.
Kundi Omukama Mukulu oko Bosi, Yehova w’emilondo, awite omubiiri w’erikola
Omo kihugho ky’Abakaldayo.
26 Mulue omo myanya y’ehali n’erisyalwa naye.
Mukingule amadepo wiwe w’akalyo.
Mukuma-kumire ebindu biwe byo haghuma ng’ebilundo by’akalyo.
Mumutoghotaye olosi.
Isyasighalamo mundu n’omughuma.
27 Mukere esyonume siwe syosyi sy’esyonde esikine nyilere;
Siyakerawe.
Bulighe bwasyo, kundi ekiro kyasyo kyabirihika,
Endambi y’erihasyo amalipizi yabirihika!
28 Emilenge y’abakatibita yinemwowika,
Abakalua omo kihugho kye Babiloni bakatibita,
Busana n’eriyabwira abandu be Sioni ngoko Yehova oMungu wetu anemuyituhulirya,
Anemuyituhulirya busana n’ehekalu yiwe.
29 Mubirikire abakaghusa emisali,
Abosi abakakondomaya* obuta base balwe ne Babiloni.
Mumutimbayeko esyokambi syenyu; isihabya oyukatswa.
Mumulihe erikwamana n’ebyo akola.
Mumukolere ngoko anakola.
Kundi abya akayiheka embere sya Yehova,
Embere sy’Omubuyirire we Israeli.
30 Busana n’ekyo, abalwana biwe bakendiwa omo myanya yiwe y’abandu bosi,
N’abasuda biwe bakendihola* omo kiro ekyo,” Yehova atya.
31 “Hulikirira! Namakuhikako, iwe mundu w’enyaghuli,” Omukama Mukulu oko Bosi, Yehova w’emilondo atya,
“Kundi ekiro kyaghu kikendisyahika, omughulu ogho ngendisyakutsweramo.
32 Iwe mundu w’enyaghuli, ukendisyatwikala n’eriwa ahisi,
Sihendisyabya oyukakuhanganaya
Ngendisyatimya emiyi yaghu yosi omo muliro,
Omuliro oyo akendisyatimya ebyosi ebikutimbireko.”
33 Yehova w’emilondo ati:
“Abandu be Israeli n’abe Yuda babirighalibwa,
N’abosi abayirabo mo banyewa babirighana erilwikabo.
Babirighana eribaleka baghende.
34 Aliwe Omulamya wabo awite akaghala.
Erina riwe yo Yehova w’emilondo.
Syendisyabula eribalwirako,
Atoke erihira omo kihugho mo butekane
N’erileka abikalani be Babiloni ibahandabuka.”
35 “Omuyali akendimangura Abakaldayo,” Yehova atya,
“Akendimangura abikalani be Babiloni, abakulu bamo, n’abandu bamo b’amenge.
36 Omuyali akendimangura abandu b’omupepe,*
Neryo bakendikola lukiru-kiru.
Omuyali akendimangura abasuda bamo,
Neryo bakendisagha kutsibu.
37 Omuyali akendimangura esyosabayiri* syabo n’emitoka yabo y’amalwa,
Akendimangura abandu bosi b’omo bindi bihugho abikeremo,
Neryo bakendibya ng’abakali.
Omuyali akendimangura ebindu byamo by’obughuli, neryo bikendipurwa.
38 Amaghetse wamo akendihikirwa n’obuhanya, neryo akendyuma.
Kundi ni kihugho ekirimo esyosanamu esibatsire,
Kandi busana n’esyonzoli syabo esikasaghisaya, babere bakayiwata ng’abasire.
39 Busana n’ekyo, esyonyama sy’omo mbwarara sikendisyikala haghuma n’esyonyama esikaluamo emilenge-lenge.
N’esyombuni sikendisyikala omo muyi.
Omundu syendisyasyikalamo,
Simwendisyikala omundu kera na kera.”
40 “Bikendisyabya ng’omughulu oMungu atsandaya e Sodomo ne Gomora n’emiyi eyitimbire kuyo,” Yehova atya, “simwendisyasyikala mundu, kandi sihali oyukendisyasyikalamo.
41 Muhulikirire! Abandu banemwasira oko luhande lw’endata;
Hakendihuluka ekihanda kinene n’abami bakulu-bakulu.
Bakendyasira omo biharo by’ehali-hali by’ekihugho.
42 Bakakolesaya obuta* n’akatumo.
Ni batsibu kandi sibalikwa obulighe.
Ebikindo by’abandu abakaghenda oko syosabayiri*
Biri ng’erihuha ry’engetse.
Bakayipanga busana n’amalwa ng’omundu mughuma batoke erilwa naghu, iwe mumbesa we Babiloni.
43 Omwami we Babiloni abiryowa oko ngulu yabo,
Neryo ebyala byabo byabirileghetsana.
Abirihandabuka,
Abiryowa obulumi ng’omukali oyunemubuta.
44 “Muhulikirire! Omundu anemusyalwa n’emyanya y’erilisiryamo eyitulere. Ali ng’esimba eyikalua omo hisaka ehihatatene ehiri oko musike we Yordani. Aliwe omo katambi kake, ngendimutibitako alue omo kihugho kyabo. Kandi ngendiyira oyulyasombolawa mo musondoli wiwe. Kundi nindi yuli nga ngye, kandi nindi yukendisyayihanda okw’ingye? Hane omulisya oyo wanganisinga? 45 Busana n’ekyo, inywe balume, muhulikirire ebyo Yehova abiriyisogha busana na Babiloni, n’ebyo abirilengekania busana n’ekihugho ky’Abakaldayo.
Oko kwenene, ebyana by’esyonyama bikendikurubanirwa hali.
Obwikalo bwabo bukendiyirwamo matongo busana nabo.
46 Omughulu e Babiloni yikendisyahambwa, hakendisyabya efuyo eyikendisyaleka ekihugho ikyalabamo musiki,
N’efuyo ikendisyowika omo kati-kati k’ebihanda.”