Ezekieli

37 Ebyala bya Yehova byabya okw’ingye, kandi Yehova omo kirimu kiwe mwaniheka amanitwala omo kati-kati k’omusya. Omusyo oyo abya oswiremo amakuha. 2 Mwanitimbya-timbya mugho. Munalangira omo musya oyo imuli amakuha w’oluhunda-hunda, kandi amakuha ayo abya umire kutsibu. 3 Mwanibulya ati: “Mughala w’omundu, amakuha aya anganatasyasuba?” Munasubirya niti: “Yehova, Mukama Mukulu oko Bosi, n’iwe wasi.” 4 Neryo mwanibwira ati: “Ubughe obuminyereri obulebirye amakuha aya. Ubwiregho uti, ‘Inywe makuha awumire, muhulikirire ekinywa kya Yehova:

5 “‘Yehova, Omukama Mukulu oko Bosi akabwira amakuha aya ati: “Ngendileka omuka iniabingiramo, nenyu mukendisuba, imwatasyabyaho. 6 Ngendibahirako emisisa n’eminyoku. Kandi ng’endibaswikako engoba n’eribabuhiramo omuka, neryo mukendisuba imwabya n’engebe; neryo mukendiminya ngoko indi Yehova.”’”

7 Neryo munabugha obuminyereri ngoko nanalayirawa. Nabere nabinabugha obuminyereri, muhabya olukanda, olukanda lw’amakuha awakatulanako. Neryo amakuha mwatsuka erisegheranako, erikuha oko rindi. 8 Neryo munalangira emisisa n’eminyoku bikasa oko makuha ayo, n’engoba muyaswikagho. Aliwe abya isyalyabyamo omuka.

9 Neryo mwambwira ati: “Ubughe n’erihunga omo buminyereri. Mughala w’omundu ubughe obuminyereri, ubwire erihunga uti, ‘Yehova Omukama Mukulu oko Bosi ati: “Ubuhirire erilua oko mahunga ani, iwe rihunga,* ubuhirire abandu abitawa aba, batoke eritasyabyaho.”’”

10 Neryo munabugha obuminyereri ngoko ananilayira, n’omuka* mwingira mugho, nagho mwabya n’engebe n’erimanira oko bisando byagho. Mwabya mulondo munene kutsibu w’abasuda.

11 Neryo mwambwira ati: “Mughala w’omundu, amakuha aya kye kihanda kyosi kya Israeli. Banemubugha bati, ‘Amakuha wetu umire, n’amaha wetu abirihwa. Twabirihwerekereribwa olwosi.’ 12 Neryo ubughe obuminyereri, ubwirebo uti, ‘Yehova Omukama Mukama Mukulu oko Bosi ati: “Inywe bandu baghe, ngendisyakingula amasinda wenyu, inabahangania erilua mugho, n’eribaleta omo kihugho kya Israeli. 13 Nenyu bandu baghe, oko kwenene mukendisyaminya ngoko indi Yehova omughulu ngendisyalibula amasinda wenyu n’eribalusya mugho.”’ 14 ‘Ngendisyabahiramo ekirimu kyaghe, nenyu mukendisyabya n’engebe, kandi ngendisyabikalya omo kihugho kyenyu; nenyu mukendisyaminya ngoko ingyuwene-wene, ingye Yehova, nabiribugha kandi ngoko nabirikolakyo,’ Yehova atya.”

15 Kandi ekinywa kya Yehova mukyanihikako, kiti: 16 “Naghu, iwe mughala w’omundu wimaye omuti, uhandike kugho uti, ‘Busana na Yuda na busana n’abandu ba Israeli abali haghuma naye.’* Neryo utasyimaya n’oghundi muti, uhandike kugho uti, ‘Busana na Yozefu, omuti wa Efraimu, n’abandu bosi b’enyumba ya Israeli abali haghuma naye.’* 17 Neryo uhireyo hakuhi na hakuhi itoke eribya muti mughuma omo byala byaghu. 18 Omughulu abandu baghu* bakendikubulya bati, ‘Siwenditubwira enzumwa y’ebyo ukakola ebi kwehi? 19 ukendibwirabo uti, ‘Yehova Omukama Mukulu oko Bosi ati: “Ngendiimya omuti wa Yozefu owali omo byala Efraimu, n’ebihanda bya Israeli ebiri haghuma naye, ngendihirabyo oko muti wa Yuda; neryo ngendiyirabyo mo muti mughuma, nabo bakendibya mughuma omo byala byaghe.”’ 20 Emiti eyo ulyahandikako litolere iyabya omo byala byaghu batoke erilangirayo.

21 “Neryo ubwirebo uti, ‘Yehova Omukama Mukulu oko Bosi ati: “Ngendisyalusya Abaisraeli erilua omo bihanda eyo babiriya, kandi ngendisyakuma-kumirabo haghuma erilua oko mbande syosi neryo inaletabo omo kihugho kyabo. 22 Ngendisyayirabo mo kihanda kighuma omo kihugho, oko bitwa bya Israeli, n’omwami mughuma akendisyatabala oko bosi, nabo sibendisyasyabya bihanda bibiri; kutse sibendisyasyaghabana mo mami abiri. 23 Sibendisyasyayitsandya omo syosanamu syabo esikita nye* n’omo mikolere yabo eyikita nye n’omo bibi byabo byosi. Ngendisyalamyabo oko bibi byabo byosi ebyo bakola bakanileghulako ebyaleka ibakola erilolo, neryo ngendisyeryabo. Bakendisyabya bandu baghe, naghe ingyuwene-wene ngendisyabya Mungu wabo.

24 “‘“Omughombe waghe Daudi akendisyabya mwami wabo, nabo abosi bakendisyabya n’omulisya mughuma. Bakendisyakwama erisoha lyaghe n’erisikya ndeke-ndeke ebihano byaghe. 25 Bakendisyikala omo kihugho ekyo naha omughombe waghe ye Yakobo, eyo abotata-kulu wenyu babya bikere, nabo bakendisyikala mukyo kera na kera, ibo n’abana babo* n’abana b’ababana babo; n’omughombe waghe ye Daudi akendisyabya musondoli* wabo kera na kera.

26 “‘“Naghe ngendisyakola haghuma nabo endaghane y’obuholo; ikendisyabya ndaghane y’obuholo eya kera na kera. Ngendisyaleka ibasika kandi ngendisyabayira mo bangyi n’erihira ahabuyirire haghe omo kati-kati kabo kera na kera. 27 Ehema* yaghe ikendisyabya haghuma nabo,* naghe ngendisyabya Mungu wabo, nabo bakendisyabya bandu baghe. 28 Omughulu ahabuyirire haghe hakendisyabya omo kati-kati kabo kera na kera, ebihanda bikendisyaminya ngoko ingye Yehova, ngahighula Abaisraeli.”’”