Abalawi
10 Enyuma w’aho, abaghala ba Haruni; ye Nadabu na Abihu, mubimya obuli mundu ekindu kiwe ky’erihiramo omuliro.* Mubahira mubyo mo muliro n’erihira kugho k’obukwa. Neryo mubatsuka erihisya omo muliro, obukwa obo batahamulirwe embere sya Yehova. Mubakola ngoko oMungu atabahana. 2 Busana n’ekyo, omuliro mwalua eyiri Yehova, amahisyabo. Neryo mubaholera embere sya Yehova. 3 Neryo Musa mwabwira Haruni ati: “Yehova abiribugha ati, ‘Litolere inabya mubuyirire omo kati-kati k’abakasa hakuhi naghe n’eribana olukengerwa embere sy’abandu bosi.’” Haruni mwabya bukutu.
4 Neryo Musa mwabirikira Mishaeli na Elizafani, abaghala ba Uzieli, muyomba wa Haruni. Mwabwirabo ati: “Mwase hano, muheke abaghala benyu. Mulusayebo embere w’ahabuyirire, mutwalebo ehihya w’ekambi.” 5 Neryo mubaseghera hakuhi, bamaheka abalume abo omo syokanzu syabo, bamatwalabo ehihya w’ekambi, ngoko Musa anabwirabo.
6 Neryo Musa mwabwira Haruni n’abandi baghala biwe, ye Eleazari na Itamari ati: “Isimwabya butsira erisugha esyonzwiri syenyu kutse isimwatula esyongyimba syenyu, mukasyahola n’oMungu akasyahitana oko ndeko yosi. Abaghala benyu, enyumba yosi ye Israeli, bo bakendilira abo Yehova alyita omo muliro. 7 Isimwahulukira ehihya w’olukyo lw’ehema y’erihindanamo; kundi mwamabihuluka, imukendihola; kusangwa amaghuta awabuyirire* wa Yehova ane okw’inywe.” Neryo Mubakola erikwamana n’ebinywa bya Musa.
8 Neryo Yehova mwabwira Haruni ati: 9 “Omughulu ukingira omo hema y’erihindanamo, iwe n’abaghala baghu, isimwanywa edivai kutse obwabu bosi-bosi, mukasyahola. Ekyo ni kyalayiro ky’omughulu wosi omo bizazi* byenyu byosi. 10 Ekyo ni busana n’erihiraho eritendisosana omo kati-kati k’ekindu ekibuyirire n’ekitabuyirire, n’omo kati-kati k’ekindu ekiterire n’ekyerire, 11 n’erikangirirya Abaisraeli b’ebihano byosi ebyo Yehova abwirabo erilabira Musa.”
12 Neryo Musa mwabugha na Haruni n’abaghala biwe abasaka, ye Eleazari na Itamari ati: “Mwimaye ebiryasaka oko buhere bw’eyisyano erilua oko mahere wa Yehova awakahisibwa omo muliro, mulirebyo hakuhi n’ekiherero, mo mukati owatemo elevire,* kusangwa ni kindu ekibuyirire kutsibu. 13 Litolere imwalirabyo ahabuyirire kusangwa ni righabo ryaghu n’erighabo ry’abaghala baghu erilua oko mahere wa Yehova awakahisibawa omo muliro, kusangwa ko nalayirawa nitya. 14 Mukendirya n’ekikuba eky’obuhere bw’erihungya-hungya n’ekihinga ky’erighabo eribuyirire. Mukendilirabyo omo mwanya ow’erire, iwe, n’abaghala baghu, n’abali baghu kutya; kusangwa wabirihabwa ebindu ebi mo righabo ryaghu n’erighabo ry’abaghala baghu erilua oko mahere w’obuholo* w’Abaisraeli. 15 Bakendisyaleta ekihinga eky’erighabo eribuyirire, n’ekikuba ky’obuhere bw’erihungya-hungya, haghuma n’ebisabu by’obuhere bw’erihisya omo muliro busana n’erihungya-hungya obuhere bw’erihungya-hungya embere sya Yehova. Eryo rikendisyabya righabo ryaghu n’abaghala baghu ery’omughulu wosi, ngoko Yehova anabirilayira.”
16 Musa mwasondya-sondya embene y’obuhere bw’erilolo. Mwafumbula ngoko yabirihisibwa omo muliro. Neryo mwahitana oko Eleazari n’oko Itamari, abaghala ba Haruni abasaka. Mwabugha ati: 17 “Ekiryaleka imutalya embene y’obuhere bw’erilolo niki? Mulyendilirayo ahabuyirire, kusangwa ni kindu ekibuyirire ekyo mwabirihabwa mutoke eriheka amalolo w’endeko n’erihanulirabo embere sya Yehova. 18 Mulebaye, omusasi wayo mwatitaletwa ahabuyirire. Mulyendilirayo ahabuyirire ngoko nalayirawa.” 19 Haruni mwasubirya Musa ati: “Munabwire mubakaherera obuhere bwabo bw’erilolo n’obuhere bwabo bw’eryokererya embere sya Yehova, aliwe nomo bine bitya, emyatsi eyi muyikambikako. Ko niryalya obuhere bw’erilolo munabwire, ekyo kyanganatsemesirye Yehova kwehi?” 20 Musa mwabya abyowa ekyo mwatulera.