Amosi
2 “Yehova ati,
‘“Busana n’amakosa asatu agho Moabu akola, kandi busana n’amakosa ani, sinendisyayisubako,
Kundi mwahisya amakuha w’omwami we Edomu atoke eriyiragho mo swakala.
2 Neryo ngendisyatuma omuliro e Moabu,
N’omuliro oyo akendisyatimya ehileberyo ehyo mundu ate angahikamo bweghu-bweghu hye Kerioti;
Moabu akendisyahola omo fuyo nene,
Omo mulenge w’amalwa, omo mulenge w’erihembe.
3 Ngendisyalusya omutabali* omo kati-kati kiwe,
N’erimwita haghuma n’abakulu bosi b’omo butabali bwiwe,” Yehova atya.’
4 Yehova ati,
‘Busana n’amakosa asatu agho Yuda akola, kandi busana n’amakosa ani, sinendisyayisubako,
Kundi mubaghana emighambo* ya Yehova,
Kandi kundi mubatasikya ebyalayiro biwe;
Aliwe amabehi agho abotata-kulu wabo banakwama wanabiribaherya.
5 Neryo ngendisyatuma omuliro e Yuda,
N’omuliro oyo akendisyatimya ehileberyo ehyo mundu ate angahikamo bweghu-bweghu hye Yerusalema.’
6 Yehova ati,
‘Busana n’amakosa asatu agho Israeli akola, kandi busana n’amakosa ani, sinendisyayisubako,
Kundi mubaghulya omutunganene batoke eribana efeza,*
Mubaghulya n’omwera batoke eribana ebiryato.*
7 Bakalyatangira emitwe y’abandu b’ahisi omo lututu,
Kandi bakakingira abolo b’enzira.
Omulume na baba wiwe bakaghotsera n’omumbesa mughumerera,
Omw’ikola batya, bakatsandaya erina ryaghe ribuyirire.
8 Bakayilambika hakuhi n’obuli kiherero oko syongyimba esyo balyimaya oko bandu abalimo edeni yabo;*
N’edivai eyo bakanywira omo nyumba y’emiungu yabo, yalua oko bandu abo balihisaya e amande.’
9 ‘Aliwe n’ingye natoghotaya Omuamori embere syabo,
Omuamori oyo wabya muli ng’emiti y’emierezi kandi oyo wabya akalire ng’omuti w’omualoni
Munatsandya amatunda wagho awabya endata n’emilihi yagho eyabya eyikwa.
10 Munabalusya omo kihugho kye Misri;
Kandi munabalenderya omo mbwarara omo myaka 40,
Mutoke erimya ekihugho ky’Omuamori.
11 Munayira abaghuma b’oko bana benyu b’obulume mo baminyereri
Namayira n’abaghuma b’oko balwana benyu mo Banaziri,
Inywe Baisraeli, ko bite bitya?’ Yehova atya.
12 ‘Aliwe mumwabya mukaha Abanaziri b’edivai,
Kandi mumwabya mukabwira abaminyereri muti: “Isimwabugha obuminyereri.”
13 Neryo ngendibaponda-pondera omo mwanya wenyu,
Ngoko omutoka owaswiremo engano akaponda-ponda ebyosi ebiri aho akalaba.
14 Omundu oyo wasi eritibita syendisyabya n’ah’eritibitira,
Akaghala k’omundu oyuwite akaghala kakendisyahwa,
Sihali n’omusuda oyukendisyabalya engebe* yiwe.
15 Oyukaghusa emisali syendisyasighala ah’imene,
Omulume w’ebisando ebyanguhire syendisyabala,
16 Ekiro ekyo, nibya n’omusuda oyutesagha omo bosi
Akendisyatibita iniane ndumbu,’ Yehova atya.”