Amosi
4 “Muhulikirire ebinywa bino, inywe syonde sye Bashani,
Esiri oko Kitwa kye Samaria,
Inywe bakali abakalimaya abandu b’ahisi n’eriponda-ponda abera,
Inywe mukabwira abalume* benyu muti, ‘Mutuletere eky’erinywa!’
2 Yehova Omukama Mukulu oko Bosi abirilapa omo bubuyirire bwiwe ati,
‘“Muhulikirire! Kiro kighuma, bakendisyabasumba omo syokroshe sy’oyukakera esyonyama
N’abakendisyasighala bakendisyasumbwa omo syontobani.*
3 Obuli mughuma w’okw’inywe akendisyalaba omo kitobo ky’omo luhimbo n’erighenda buta-kita;
Kandi mukendisyaghuswa ebwanga e Harmoni,” Yehova atya.’
4 ‘Mwase e Beteli n’erikola amakosa,
Mwase e Gilgali n’erikola amakosa manene!
Mulete amahere wenyu omo tututu,
N’omo kiro ky’akasatu, mulete ebighuma byenyu by’omw’ikumi.
5 Muhisaye omukati owatemo levire* mo buhere bw’eriha ewasingya;
Mubwire abandu bosi oko bihembo ebyo mukenditeka omwanza!
Kundi ekyo kyo mwanzire erikola, inywe Baisraeli,’ Yehova Omukama Mukulu oko Bosi atya.
6 ‘Kandi omo miyi yenyu yosi, ingye nabirileka ameno wenyu iniera busana n’eribula akalyo
Kandi nabirileka emikati iyabula omo manyumba wenyu wosi;
Aliwe simwetanisubira,’ Yehova atya.
7 ‘Nabiribaghanira n’embula omo misi isatu embere mutsuke erihulula;
Nabiriwisya embula omo muyi mughuma, aliwe butsira omo ghundi.
Embula yabiriwa omo ririma rilebe, aliwe muyitetawa omo rindi ririma,
Neryo ryabiryuma.
8 Abandu b’omo miyi ibiri kutse isatu mubayanywira amaghetse omo muyi mughuma ibanemutsinga-tsinga,
Aliwe enyota yabo siyetahwa;
Nomo bine bitya, simwetanisubira,’ Yehova atya.
9 ‘Munaleta oko byalya byenyu kw’ekihuhania kinene n’amakenge.
Mumwayira oko malima manene n’oko malima manene w’emizabibu,
Aliwe esyongyike musyatsandya emiti yenyu y’esyotini n’emiti yenyu y’emizeituni;
Nikwa simwetanisubira,’ Yehova atya.
10 ‘Munatuma omo kati-kati kenyu mw’ekihunzo ekiri ng’ekihunzo ekyahika e Misri.
Munita abalwana benyu b’omo miyali kandi munahamba esyosabayiri* syenyu.
Munahetukirya ekikumbo ekituwene ekyabya omo syokambi syenyu omo mihuli yenyu,
Aliwe simwetanisubira,’ Yehova atya.
11 ‘Munatsandya ekihugho kyenyu
Ngoko natsandaya e Sodomo ne Gomora.
Kandi mwabya ng’omughogho owalyalusibawa omo muliro;
Aliwe simwetanisubira,’ Yehova atya.
12 Neryo ekyo kyo ngendikukolera, Israeli.
Kundi ekyo kyo ngendikukolera,
Israeli, uyiteghekanaye erihindana n’oMungu waghu.
13 Kundi hulikirira, iye yo wahangyika ebitwa kandi iye yo wahangyika erihunga;
Akaminyisaya abandu amalengekania wiwe,
Akayira ekyakakala ky’omo tututu mo mwirimya,
Kandi akalyatanga emyanya y’endata y’ekihugho;
Erina riwe yo Yehova oMungu w’emilondo.”