Ebaruha oko Abanya Efeso
2 Kandi oMungu mwabaha engebe nomo mwanabya imwabirihola busana n’ebibi n’amalolo wenyu, 2 ebyo mwabya mukakola kera, erikwamana n’emibere* y’ekihugho kino,* omw’ikwama omukulu w’omuka, ekirimu ekikasondola lino abandu abatyowa. 3 Omo kati-kati kabo, netu twabya tukayighendya kera erikwamana n’esyongumbu sy’omubiri. Itukakola eby’omubiri anzire n’ebiri omo malengekania wetu. Kandi eritsuka ekiro twabutawa, erihitana ry’oMungu ryabya okw’itwe ng’abandi. 4 Aliwe oMungu, omo lukogho lwiwe lungyi, kandi busana n’olwanzo lwiwe lunene olwatukanganaya, 5 mwatuha engebe haghuma na Kristo, nomo twanabya itwabirihola busana n’ebibi byetu. Mumwasabulwa busana n’olukogho olo. 6 Kandi mwatuha engebe haghuma na Kristo n’eritwikalya haghuma naye omo lubula omo bughuma na Kristo Yesu. 7 Mwakola atya, atoke erisyakangania omo mighulu* eyikasa olukogho lwiwe lunene omw’itukolera ebindu bibuya itwe tuli omo bughuma na Kristo Yesu.
8 Mumwasabulwa omo lukogho olo busana n’erikirirya, n’ekyo si busana n’eriyikasa ryenyu. Ni kihembo ky’oMungu. 9 Ekyo si busana n’ebyo mukakola, kusudi omundu syabye n’ekyangaleka iniayihalamba. 10 OMungu yo watubumba kandi twahangyikawa omo bughuma na Kristo Yesu tutoke erikola ebyuwene, ebyo oMungu abya iniabiripanga embere ati tukendisyakolabyo.
11 Neryo mwibuke ngoko kera, inywe mwabutawa mo bandu b’ebihanda, abandu “ababanibawa” n’abandu ibakabahulamo “abatabanibwe.” 12 Oko mughulu oyo, simwabya omo bughuma na Kristo. Mwabya isimuli b’omo kihugho kye Israeli. Mwabya isimuli omo syondaghane sy’oMungu. Simwabya n’amaha kandi simwabya n’oMungu omo kihugho. 13 Aliwe lino, kundi muli omo bughuma na Kristo Yesu, inywe mwabya hali n’oMungu kera mwabiribya hakuhi naye erilabira omusasi wa Kristo. 14 Kundi Kristo abirituha obuholo. Abiriyira ebikuto bibiri mo kighuma kandi abirihimbula oluhimbo olwabya lukaghababyo. 15 Erilabira omubiri wiwe, abiribughaho ekyabya kikahiraho obuyighu, ni bugha ambu, Emighambo ya Musa eyabyamo ebyalayiro. Mwakola atya atoke eriyira ebikuto bibiri ebyo ebiri omo bughuma naye mo mundu mughuma muhya-muhya n’erihiraho obuholo, 16 kandi atoke erisubya ebihanda bibiri by’omo bughuma n’oMungu erilabira oluholo lwiwe oko muti w’amaghali,* atoke eriyira ebihanda bibiri mo mubiri mughuma kundi abiribughaho obuyighu erilabira omubiri wiwe. 17 Kandi mwasa eribabwira engulu mbuya y’obuholo, inywe mwabya hali n’oMungu, n’eriha obuholo ababya hakuhi n’oMungu, 18 kundi n’iye yukatuwatikaya itwe bikuto bibiri erihika bweghu-bweghu embere sya Tata erilabira ekirimu kighuma.
19 Neryo simukiri bagheni, kutse abandu b’omo kindi kihugho. Aliwe muli bakalani haghuma n’ababuyirire, kandi muli b’omo nyumba y’oMungu. 20 Kandi mwabirihimbwa oko fondasyo y’abakwenda n’abaminyereri. Kristo Yesu yo ribwe ry’oko ngonde* y’efondasyo. 21 Omo bughuma naye, ebihande byosi by’enyumba binemuhirwa haghuma bitoke eribya ehekalu nyibuyirire ya Yehova.* 22 Omo bughuma naye, nenyu munemuhimbwa haghuma mutoke eribya omwanya ogho Mungu ikeremo erilabira ekirimu.