Yeremia
9 Omutwe waghe angabere maghetse basi,
N’ameso waghe angabere ngununuko y’emisonia!
Nangabere ngalira omw’itungyi nomo kiro
Abandu b’omo bandu baghe abalitibawa.
2 Nangabere n’aho mubalami angapanga omo mbwarara!
Nangasighire abandu baghe n’eriya hali kubo,
Kundi abosi ni basingiri,
Ni kikuto ky’abatebya.
3 Bakakondomaya olulimi lwabo ng’obuta;
Ekihugho kiswiremo amabehi, simuli obutaleghula.
“Ko banemukola ebituwene,
Sibanitsomene,” Yehova atya.
4 “Obuli mundu alebaye ndeke omuhimbani wiwe,
Isiwahira amaha omo mundu wosi-wosi, nibya nomo mughala wenyu.
Kundi obuli mulikyenyu ni mutebya,
N’obuli muhimbani akalegha abandi.
5 Obuli mundu akateba mulikyabo,
Kandi sihali oyukabugha ekwenene.
Babirikangirirya olulimi lwabo eribugha amabehi.
Bakayiluhaya omw’ikola ebibi.
6 Wikere omo mabehi.
Bakaghana eriniminya busana n’amabehi wabo,” Yehova atya.
7 Busana n’ekyo, Yehova w’emilondo ati:
“Ngendisyabayeyukya nitoke eriminya nga bali bati,
Kundi ni kindi kyahi ekyo nanganatasyakolera mwali w’abandu baghe?
8 Olulimi lwabo ni musali owakita owakabugha amabehi.
Omundu akakolesaya obuno bwiwe eribwira mulikyabo oko buholo,
Aliwe omo mutima wiwe inianemumusohera.”*
9 “Nanganabula eribatondesya busana n’ebyosi ebyo?” Yehova atya.
“Nangabula eriyituhulirya ekihanda ekiri ng’ekyo?
10 Ngendilira n’eribya omo bulighe busana n’ebitwa
Ngendimba olwimbo lw’ekiriro busana n’emyanya y’erilisiryamo y’omo mbwarara,
Kundi yabiritimibwa, neryo sihakiri oyukalabayo,
Siwangowayo n’omulenge w’esyonyama.
Esyonyunyu esikaghuluka omo kyanya n’esyonyama syabiritibita, syabirighenda.
11 Ngendiyira e Yerusalema mo kilundo ky’amabwe, ngendiyirayo mo busamba bw’emyondo,*
Kandi ngendiyira emiyi ye Yuda mo matongo awatikeremo mundu.
12 Nindi yuli n’amenge atoke eryowa emyatsi eyi?
Obuno bwa Yehova bwamabya ibulyakanaya naye, abughe.
Busanaki ekihugho kyabiritsanda?
Busanaki kyabiryuma ng’embwarara,
Erihika oko kika sihali n’omundu n’omughuma oyukalaba mukyo?”
13 Yehova mwasubirya ati: “Kundi mubaleka erikwama emighambo* yaghe eyo nabaha kandi kundi mubatakwamayo n’eryowa omulenge waghe. 14 Omo mwanya w’ekyo, mubakwama ebiri omo mitima yabo omo righundu, kandi mubaramya esyosanamu sya Baali, ngoko abobaba wabo babakangiriraya. 15 Neryo Yehova w’emilondo, oMungu we Israeli, ati: ‘Ngendilisya abandu aba b’engalihira n’eribanywisya amaghetse awalimo esumu. 16 Ngendipanza-panzirabo omo bihanda ebyo ibo n’abotata-kulu wabo bataminya, kandi ngendibatumako omuyali erihika omughulu ngendibabughaho.’
17 Yehova w’emilondo ati,
‘Mukole n’amenge.
Mubirikire abakali abakimba esyonyimbo sy’ekiriro,
Kandi muyende abakali abasi erilira,
18 Neryo bayire luba-luba, n’eritwimbira olwimbo lw’ekiriro,
Ameso wetu atoke eritoghongya emisonia
N’amaghetse atoke erilua omo bikoheryo byetu.
19 Kundi emilenge y’abakalira yinemwasira e Sioni:
“Twabirihikirwa n’obuhanya obukalire!
Twabirihemuka kutsibu!
Kundi twabirisigha ekihugho, neryo babirihimbula amanyumba wetu.”
20 Inywe bakali, muhulikirire ebinywa bya Yehova.
Okutu kwenyu kwowe ekinywa ekikalua omo buno bwiwe.
Mukangiriraye abali benyu olwimbo olu lw’ekiriro,
Kandi mukangiriranaye olwimbo olu lw’ekiriro.
21 Kundi oluholo lwabiriasa n’erilaba omo madirisa wetu;
Lwabiringira omo hileberyo hyetu, ehyo omundu ate angahikamo bweghu bweghu
Lutoke eriheka abana abali omo syondaki
N’abalwana abali omo myanya y’abandu bosi.’
22 Ubughe uti, ‘Yehova ati:
“Ebinda by’abandu bikendisyawa ng’embolewa omo ririma
Ng’omulondo w’engano enyuma sy’oyukalua okw’itwayo,
Sihendisyabya oyukendisyatolayo.”’”
23 Yehova ati:
“Oyuli n’amenge isyayihalamba busana n’amenge wiwe;
Oyuli n’akaghala isyayihalamba busana n’akaghala kiwe;
N’omuteke isyayihalamba busana n’obuteke bwiwe.”
24 “Aliwe oyukayihalamba ayihalambe busana
N’eribya n’amenge n’eriniminya,
Kandi busana n’eriminya ngoko ingye Yehova, oyukakanganaya olwanzo oluteleghula, oyukakola ebitunganene, n’ebilungukere oko kihugho,
Kundi emyatsi eyo yo ngatsemera,” Yehova atya.
25 “Mulangire, ebiro binemwasa,” Yehova atya. “Omo biro ebyo, ngendisyatondesya abosi ababanibwe aliwe isibabanibwe, 26 e Misri, e Yuda, e Edomu, Abaamoni, ne Moabu, n’abosi abawite esyonzwiri esyabiritwibwa oko mutwana* kandi abikere omo mbwarara; kundi ebihanda byosi sibibanibwe, n’abandu bosi be Israeli sibabanibwe omo mutima.”