Yeremia
8 Yehova ati: “Oko mughulu oyo, bakendisyalusya omo masinda wabo mw’amakuha w’abami be Yuda, amakuha w’abakulu be Yuda, amakuha w’abahereri, amakuha w’abaminyereri, n’amakuha w’abikalani be Yerusalema. 2 Bakendisyasanzagho oko ryuba, oko mughenda, n’embere sy’ebindu byosi ebiri elubula, ebyo bandu abo banza n’erikolera, ebyo bakwama n’erisondya-sondya, n’ebyo babya bakakukamira. Amakuha ayo syendiyakumwa-kumwa kutse eritabwa. Bakendisyabya ng’embolewa oko kitaka.”
3 Yehova w’emilondo ati: “Ehosi-hosi eyo ngendisyabapanza-panzira, abandu b’ekihanda kino kibi abakendisyasighalira bakendisyasombola oluholo omo mwanya w’eribyaho.”
4 “Kandi ubabwire uti, ‘Yehova ati:
“Bakendisyawa ahisi, neryo sibendisyasyahangana?
Omughuma amabiyisubako, oghundi naye syangayisubako?
5 Busanaki abandu aba, abandu be Yerusalema, bakabera erinileghulako?
Bakamakirira amabehi
Bakaghana eriyisubako.
6 Munategha amatwi n’erihulikirira, aliwe sibabya bakabugha emyatsi y’ekwenene.
Sihali oyo waleka erikola obubi kutse eriyibulya ati, ‘Mungakolaki?’
Obuli mundu abya akakola ebyo bandu bosi bakakola, ngoko esabayiri* yikatibita ikaya omo malwa.
7 Nibya n’ekirobi ekikaghuluka omo kyanya kikabya ikinasi emighulu yakyo*
Akalikuku, endambira, n’ekuruwiji,* bikabya ibinasi endambi yabyo y’erisubulirako*
Aliwe abandu baghe sibasi ngoko Yehova akendisyabatswera”’
8 ‘Mwanganatoka eribugha muti: “Tuli n’amenge, kandi tuli n’emighambo* ya Yehova?”
Kundi oko kwenene, akalamu* k’amabehi k’abahandiki* kakakolesibawa erihandika amabehi masa-masa.
9 Abandu b’amenge babirihemuka.
Babirisagha kandi bakendihambwa.
Mulebaye! Babirighana ebinywa bya Yehova,
Neryo aho banganabugha bati bali n’amenge?
10 Neryo ngendiha abakali babo b’abandi balume,
N’amalima wabo, ngendihagho abandi bandu;
Kundi eritsuka oko mulere kutsibu erihika oko mukulu kutsibu, obuli mundu akarondaya endundi omo bwibi;
Eritsuka oko muminyereri erihika oko muhereri, obuli mundu akakola amanyanga.
11 Kandi banemusondya erilamya obubune bwa mwali w’abandu baghe endata-ndata omw’ibugha bati,
“Obuholo bune! Obuholo bune!”
Isihali obuholo.
12 Bakanakwa esisoni busana n’emyatsi mibi eyo babirikola?
Sibalikwasyo n’ahake!
Sibasi n’erihemuka nga ni bugha ambuki
Neryo bakendisyawa omo kati-kati k’abandu abiririwa.
Bakendisyatwikala omughulu ukendisyabaha amalipizi,’ Yehova atya.
13 ‘Omughulu ngendsyahindaniabo, ngendisyababughaho,’ Yehova atya.
‘Sihendisyabya emizabibu eyikendisyasighala oko muti w’emizabibu, sihendisyabya esyotini esikendisyasighala oko muti w’esyotini, n’ebiti bikendisyahonga.
N’ebyo nabaha bikendisyahera busana nabo.’”
14 “Twikere hano ho busanaki?
Tuhindane haghuma n’eringira omo miyi eyo mundu ate angahikamo bweghu-bweghu n’eriholerayo.
Kundi Yehova oMungu wetu akenditubughaho,
Kandi akatuha amaghetse w’erinywa awalimo esumu,
Kundi twabirikolera Yehova y’erilolo.
15 Twabya tukalindirira obuholo, aliwe sihetabya ekibuya,
Twabya tukalindirira omughulu w’erilamibwa, aliwe hali obuba!
16 Emilenge y’esyosabayiri* sy’enzighu yinemwasira e Dani.
Ekihugho kyosi kinemutitimana,
Busana n’emilenge y’esyosabayiri siwe sy’obulume esikabehereraya.
Enzighu ikasa n’eritsandya ekihugho n’ebyosi ebirimo
Omuyi n’abikeremo.”
17 “Kundi ngendituma esyonzoka omo kati-kati kenyu,
Esyonzoka esirimo esumu esyo mundu ate angatoka erisatya,
Oko kwenene, sikendibaluma,” Yehova atya.
18 Obulighe bwaghe sibwangahwa;
Omutima waghe alwere.
19 Omulenge w’erisaba obuwatikya anemuluira omo kihugho ky’ehali,
Ni mulenge wa mwali w’abandu baghe:
“Yehova syali e Sioni kwe?
Kutse omwami we Sioni syaliyo kwe?”
“Busanaki babirinihitania omo syosanamu syabo esibatsire,
N’omo yindi miungu yabo eyitawite mughaso?”
20 “Omughulu w’erighesa abirilaba, n’omughulu w’ekipwa* abirihwa,
Aliwe sitwetwasabulwa!”
21 Nabirihwamo muka kundi mwali w’abandu baghe abiribunika;
Nabiriyowa muhanda
Nabirisagha kutsibu.
22 E Gileadi siyiri ezeri?*
Kutse eyo siyiri oyo wangalamya omundu?*
Busanaki mwali w’abandu baghe syalyalama?