Yeremia
7 Bino by’ebinywa ebyo Yehova abwira Yeremia: 2 “Wimane omo mulango w’enyumba ya Yehova, neryo ighune aho, ubughe uti, ‘Muhulikire ebinywa bya Yehova inywe bosi, inywe bandu be Yuda abakingira omo milango eyi bakayakukamira Yehova. 3 Yehova w’emilondo, oMungu we Israeli, akabugha ati: “Muwanaye esyonzira syenyu n’emibere yenyu, neryo sinendibalusya omo mwanya ono. 4 Isimwikiriraya ebinywa by’amabehi kandi isimwabugha muti, ‘Eno* ni hekalu ya Yehova, ehekalu ya Yehova, ehekalu ya Yehova!’ 5 Kundi oko kwenene mwamabyuwania esyonzira syenyu n’emibere yenyu, oko kwenene mwamabikwamirira eritunganene omughulu mukatswera emyatsi y’omundu n’omulikyabo, 6 mwamatendibya mukaghalya abagheni, esyongubi, n’abakwakali, mwamatendibya mukuta omusasi w’abandu abate na kosa omo kighuho kino, kandi mwamatendiyiletera amaligho omw’iramya eyindi miungu, 7 isinendisyabalusya omo kihugho kino, ekyo naha abotata-kulu wenyu mo kyabo.”’”
8 “Aliwe inywe, mukikiriraya ebinywa by’amabehi. Sibyendibaletera endundi n’ahake. 9 Munemwiba, munemwita, munemusingira, munemulapa eby’amabehi, munemuherera Baali y’amahere, n’eriramya emiungu eyo mwatabya mwasi. 10 Mukalengekanaya muti mwanganakola emyatsi mibi yosi eyo n’enyuma sy’aho imwasyimana embere syaghe omo nyumba eno eyiriko erina ryaghe n’eribugha muti, ‘Tukendisabulwa?’ 11 Enyumba eyi eyiriko erina ryaghe, mwabirilangirayo mo bwikalo bw’abibi? Nabiriyilangirirakyo ingyuwene-wene,” Yehova atya.
12 “‘Nomo bine bitya, muye ewaghe e Shilo eyo natsuka erihira erina ryaghe, neryo mulangire ekyo nakolera Shilo busana n’obubi bw’abandu baghe Abaisraeli. 13 Aliwe simwemwataleka erikola emyatsi yosi eyi,’ Yehova atya, ‘ngabya ininemukania* nenyu aliwe simulyowa, ngabya ininemubabirikira aliwe simulisubiraya. 14 Busana n’ekyo, enyumba eno eyiriko erina ryaghe eyo mukayiketera, n’omwanya ogho naha inywe n’abotata-kulu wenyu, ng’endiyirabyo ngoko nayira e Shilo. 15 Ngendibatibitako mulue embere sy’ameso waghe, ngoko natibita oko baghala benyu bosi, abana bosi ba Efraimu.’
16 “Neryo naghu, isiwabugha uti ukasabira abandu aba. Isiwanilakira, isiwanisaba kutse erinilemba-lemba busana nabo, kundi sinendikowa. 17 Naghu sighulangire ebyo banemukolera omo miyi ye Yuda nomo syonzira sye Yerusalema? 18 Abana bakasenya esyongwi, abobaba ibokya omuliro, n’abakali ibaponda-ponda efarine batoke erihuka esyogato esyo bakendiherera Omughole w’Elubula,* kandi bakutira eyindi miungu y’ebihembo by’obwabu busana n’erinihitania. 19 ‘Aliwe bakalengekanaya bati n’ingye bakaghalaya?’* Yehova atya. ‘Sindi mbino bakayitesa ibibene-bene, kandi bakayihemula ibibene-bene!’ 20 Neryo Yehova, Omukama Mukulu oko Bosi ati, ‘Ngendyutulira ekinigha kyaghe n’erihitana ryaghe oko kihugho kino, oko bandu, oko syonyama, oko miti y’emoli n’oko byalya ebikera oko kitaka; ekinigha kyaghe kikendyaka, sikyendisyalima.’
21 “Yehova w’emilondo, oMungu we Israeli, ati, ‘Muyeyo, mutomeke oko wandi mahere wenyu kw’awandi mahere w’eryokererya n’eriyilira enyama. 22 Kundi ekiro nalusaya abotata-kulu wenyu omo kihugho kye Misri, munatababwira mwatsi kandi munatababwira ekyo-kyosi oko mahere w’eryokererya n’awandi mahere. 23 Aliwe ekyalayiro kino kyo nabaha: “Mukwame omulenge waghe, neryo ngendibya Mungu wenyu, nenyu mukendibya bandu baghe. Mutolere imwakwama esyonzira syosi esyo ngendibakangania, emyatsi yosi yitoke eribaghendera ndeke.”’ 24 Aliwe mubatahulikirira kutse eritegha amatwi; nikwa mubakwama esyonzira* syabo-syabo. Omo righundu, mubakwama omutima wabo mubi, kandi mubasuba enyuma omo mwanya w’erilola embere. 25 Mubakola batya eritsuka ekiro abotata-kulu wabo balua omo kihugho kye Misri erihika na munabwire. Neryo nabya ingabatumako abaghombe baghe abaminyereri, ingabatuma obuli kiro kandi kangyi-kangyi.* 26 Aliwe mubaghana erinihulikirira kandi mubatategha amatwi wabo. Nikwa mubabyamo erighundu* kandi mubakola obubi kulenga abotata-kulu wabo!
27 “Ukendibabwira ebinywa byosi ebi, aliwe sibendikuhulikirira; ukendibabirikira, aliwe sibendikusubirya. 28 Kandi ukendibabwira uti, ‘Eki ky’ekihanda ekyatakwama omulenge wa Yehova oMungu wakyo kandi ekyaghana erikungwa. Obutaleghula sibukiri, nibya sibalikanaya na kubo.’*
29 “Utwe esyonzwiri syaghu esitesyatatwibwa* n’erighusasyo, kandi wimbire oko hitwa ehiteko kindu k’olwimbo lw’ekiriro, kundi Yehova abirighana abandu b’ekizazi* kino abamuhitanaya kandi akendisyalekeraniabo. 30 ‘Kundi abandu be Yuda babirikola ekituwene omo meso waghe,’ Yehova atya. ‘Babirihira esyosanamu syabo esikita esyonye omo nyumba eyiriko erina ryaghe, busana n’eritsandyayo. 31 Babirihimba emyanya y’endata ye Tofeti, eyiri omo Musya w’Omughala wa Hinomu,* busana n’eribya bakahisiryayo abana babo b’obulume n’abana babo b’obukali. Sindinatabugha niti bakole ekyo, kandi sindinatabyamo amalengekania ayo.’*
32 “‘Neryo ebiro binemwasa,’ Yehova atya. ‘Omo biro ebyo, omwanya ono syendisyahulwa mo Tofeti kutse Omusya w’Omughala wa Hinomu,* aliwe akendisyahulwa mo Musya w’Obwiti. Ebinda bikendisyatabwa erihika oko kika omwanya inyabula. 33 N’ebinda by’abandu abo bikendisyabya kalyo k’ehinyunyu hy’omo kyanya n’esyonyama sy’oko kihugho. Sihendisyabya omundu oyukendisyasaghisyasyo. 34 Ngendibughaho emilenge y’eriyisyandira, emilenge y’eritsema, omulenge w’omulunga mulume n’omulenge w’omulunga mukali, omo miyi ye Yuda nomo syonzira sye Yerusalema, kundi omuyi akendisyabya bisambukalirya.’”