Yeremia
6 Inywe baghala ba Benyamini, muyibise hali n’omuyi we Yerusalema.
Mubuhe omo mahembe mwe Tekoa;
Mwakaye omo Bete-hakeremu m’omuliro owakendibya kiminyikalo!
Kundi obuhanya bunemwasira oko luhande lw’endata, obuhanya bunene.
2 Mwali we Sioni asosire omukali mubuya kandi molo.
3 Abalisya bakendyasa n’esyonyama syabo.
Bakendimutimbyako amahema wabo,
Obuli mulisya akendilisiryayo esyombuli esyo alyahabawa.
4 “Muyiteghekanaye* erilwa naye!
Muhangane, tuyalwe naye oko medi!”
“Tuli bahanya, kundi bukisiya ibwira,
Kundi ebitsutsu by’erigholo-gholo birimubya biri-biri!”
5 “Muhangane, mulwe naye omo kiro
N’erihimbula ehileberyo hiwe ehyo omundu ate angahikamo bweghu-bweghu.”
6 Kundi Yehova w’emilondo ati:
“Mukonde emiti n’eritimbya oko Yerusalema k’oluhimbo mutoke erilwa nagho.
Litolere omuyi oyo iniatswerwa.
Omuyi wosi aswiremo akaghonero.*
7 Ngoko ekyuna ky’amaghetse kikaleka amaghetse iniabya inianahehere,
Kutya n’omuyi oyo akaleka obubi bwagho ibwabya ibunahehere.
Obutsururu n’eritsandya byo bikanowika mugho;
Obukoni n’obuhanya byo nganalangiramo.
8 Ukungawe, Yerusalema, ngasyakulekerania ininakukwire esyonye;
Ngendikuyira mo matongo, ekihugho ekitikeremo mundu.”
9 Yehova w’emilondo ati:
“Bakendisyabota-bota Abaisraeli bosi abakendisyasighala ngoko omundu akoha emizabibu eyiryasighalira oko muti.
Utasyalabya ebyala byaghu ngoko oyukoha emizabibu akakola.”
10 “Nikanaye nandi, nikungendi?
Nindi yukendihulikirira?
Mulangire! Amatwi wabo ahumene,* neryo sibangowa;
Mulangire! Babiripokya ekinywa kya Yehova;
Sibalitsemerakyo n’ahake.
11 Ekyo kyabirileka inusulamo ekinigha kinene kya Yehova.
Nabiriluha eribikakyo emwisi syaghe.”
“Utulirekyo oko mwana oyuli omo ndaki,
Oko bikuto by’abalwana abahindene,
Abosi bakendihambwa, omulume n’omukali wiwe,
Abasyakulu n’abasyakulu bondu-bondu.*
12 Amanyumba wabo akendisyahabwa abandi bandu,
Amalima wabo n’abakali babo, ebyosi ebyo bikendisyahabwa abandi bandu.
Kundi ngendikakya ebyala byaghe nitoke eriha abikalani b’omo kihugho b’amalipizi,” Yehova atya.
13 “Kundi eritsuka oko mulere kutsibu erihika oko mukulu kutsibu, obuli mundu anemuyironderya endundi omo nzira y’amabehi;
Eritsuka oko muminyereri erihika oko muhereri, obuli mundu anemukola amanyanga.
14 Kandi banemusondya erilamya obubune bw’abandu baghe bw’endata-ndata omw’ibugha bati:
‘Obuholo bune! Obuholo bune!’
Isihali obuholo.
15 Bakanakwa esisoni busana n’emyatsi mibi eyo bakakola?
Sibalikwa esisoni n’ahake!
Nibya sibasi erihemuka nga ni bugha ambu ki!
Busana n’ekyo, bakendisyawa omo kati-kati k’abandu ababiriwa.
Bakendisyatwikala omughulu ngendisyahabo amalipizi,” Yehova atya.
16 Yehova ati:
“Mwimane omo mahwa, mulebaye.
Mubulaye esyonzira sya kera nga siri hayi,
Mubulaye enzira eyuwene nga yiri hayi, neryo mulabe muyo,
Neryo imukenditekana.”
Aliwe mubabugha bati: “Iyehe, sitwendilaba muyo.”
17 “Munahiraho abateya ababugha bati,
‘Muhulikirire omulenge w’erihembe!’”
Aliwe mubabugha bati: “Iyehe, sitwendihulikiriragho.”
18 “Neryo inywe bihanda, muhulikirire!
Kandi muminye, inywe bandu abahindene,
Ebikendisyabahikira.
19 Hulikirira, iwe kihugho!
Ngendiletera abandu aba b’obuhanya
Busana n’emipango yabo mibi
Kundi mubatatsomana ebinywa byaghe
Kandi mubaghana emighambo* yaghe.”
20 “Ukalengekanaya uti ninatsomene obubani obo ukalusaya e Sheba
N’oluseke olukakumba ndeke olo ukalusaya omo kihugho ky’ehali?
Sindiligha amahere wenyu w’eryokererya
Kandi sinditsemera amahere wenyu.”
21 Neryo Yehova ati:
“Ngendihira ebindu ebikatwikalaya embere sy’abandu aba,
Bakendisyatwikala kubyo,
Abobaba haghuma n’abana babo,
Omuhimbani haghuma n’omwira wiwe,
Abosi bakendisyahola.”
22 Yehova ati:
“Mulangire! Abandu banemwasira omo kihugho ky’oko luhande lw’endata,
Ekihanda kinene kikendisyatengulibwa erilua omo biharo by’ehali-hali by’ekihugho.
23 Bakendisyahambirira obuta* n’akatumo.
Ni batsibu kandi sibalikwa bulighe n’ahake.
Emilenge yabo ikendisyahuha ng’engetse,
Kandi bali oko syosabayiri.*
Babiriyipanga busana n’amalwa ng’omundu mughuma batoke erilwa naghu, iwe mwali we Sioni.”
24 Twabiryowa oko ngulu yabo.
25 Isimwaya emoli,
Kandi isimwalaba omo ndaki,
Kundi enzighu yenyu yiwite oko muyali;
Ehosi-hosi yiri obuba.
26 Iwe mwali w’abandu baghe,
Mbala olukimba lw’esaki* n’eriyikumbaghalya omo ribu.
Ulire kutsibu ng’oyukalira ekyusa kiwe,
Kundi oyukatoghotaya akendituhikako kitsumbukirania.
27 “Nabirikuyira* mo mundu oyukalebaya emetale omo kati-kati k’abandu baghe,
Oyukasosotaya omwatsi wo ndeke-ndeke;
Litolere iwalebya ndeke n’eritsopolya emikolere yabo.
28 Abosi ni bandu abalimo erighundu rinene,
Ni bandu abakaya eyi n’eyi ibanemulegha abandi.
Bali ng’ekwivre* n’ekyuma;
Abosi batsandire.
29 Epuli yabiryaka.
Erisasi risa* ryo rikalua omo muliro wabo.
Bakabera eryerya kutsibu aliwe ni bule,
Kundi ababi sibetalusibwa omo bandu.
30 Abandu bakendisyabahula mo feza* eyiryaghanawa,
Kundi Yehova abirighanabo.”