Yeremia
5 Mulabe omo syonzira sye Yerusalema.
Musamalire oko syombande syosi n’erilangira.
Mukwese-kwese omo myanya y’abandu bosi y’omo muyi mutoke erilangira
Nga mwanganasungamo omundu oyukakola ebitunganene,
Omundu oyukayikasa eribya mutaleghula,
Neryo ingendighanyira omuyi.
2 Nibya n’omughulu bakabugha bati: “Oko kwenene-kwenene ngoko Yehova aliho!”
Emyatsi eyite y’ekwenene yo bakalapa.
3 Yehova, ameso waghu syalisondaya obutaleghula?
Mughukabahunza, aliwe ekyo mukitetabayira kindu.*
Mughukasonda eribabughaho, aliwe mubatetaligha erikungwa.
Mubakalya-kalya obusu bwabo ng’olukuka,*
Kandi mubaghana eribinduka
4 Aliwe munayibwira niti: “Oko kwenene, ni bandu b’ahisi.
Bakakola lukiru-kiru, kundi sibasi enzira ya Yehova.
Sibasi ebyalayiro by’oMungu* wabo.
5 Ngendiyasungana n’esyoseghu-seghu, n’erikania nasyo,
Kundi musyakwama enzira ya Yehova,
Ebyalayiro by’oMungu* wabo.
Aliwe esyosi musyabuna omuketo
N’eritwa ebikoba.”
6 Ekyo kyo kyabirileka esimba y’omo musitu iyalwa nabo,
N’omukenge* w’omo mabanda awali ng’embwarara iniabahutalya,
Esoro yinemulimbirya hakuhi n’emiyi yabo.
Obuli mundu oyukalua muyo, akatulangawa mo bihande-bihande;
Kundi amakosa wabo ni manene;
Babirileghula kangyi-kangyi.
7 Ngendikughanyira niti busana n’ebyo unemukola ebi?
Abana baghu babirinilekerania,
Kandi banemulapa omo rina ry’oyute Mungu
Munahabo ebyo balaghireko,
Aliwe mubataleka obusingiri,
Kandi mubabya bakaya omo nyumba y’omumbalaka mo bikuto-bikuto.
8 Bali ng’esyosabayiri* esyabirihumayira kundi isyanzire erisamba oko sy’obukali
Obuli mughuma anemubehererya oko mukali w’oghundi mulume.
9 Yehova ati: “Nanganabula eritondesyabo busana n’emyatsi yosi eyo?
Nanganabula eriyituhulirya abandu abali ng’abo?”
10 “Muhetukire omo malima w’emizabibu w’omuyi oyo n’eritsandyagho,
Aliwe isimwatsandaya obuli kindu.
Mutwe emitahi milere-milere y’omo muyi oyo,
Kundi si ya Yehova.
11 Kundi ekihanda kye Israeli n’ekihanda kye Yuda
Kyabirinileghulako kutsibu,” Yehova atya.
12 “Babirighana Yehova, kandi bakabera eribugha bati,
‘Syendikola kindu.*
Sihali obuhanya obwangatuhikira;
Sitwendilola oko malwa* kutse oko nzala.’
13 Abaminyereri baswiremo erihunga,
Kandi sibalimo ekinywa.*
Ekyo kyo banatolere erilolako!”
14 Neryo Yehova, oMungu w’emilondo, ati:
“Kundi ebi byo bandu aba bakabugha,
Ngendiyira ebinywa byaghe mo muliro omo buno bwaghu.
N’abandu aba bo syongwi,
N’omuliro oyo akenditimyabo.”
15 “Inywe bandu be Israeli, ngendileta abandu b’ehali erisyalwa nenyu,” Yehova atya.
“Ni bandu abatulaho kera.
Ni bandu ba kera,
Abandu abo mutasi omubughe wabo,
Kandi abo mutemwangowa ebinywa byabo.
16 Olubo* lwabo luli ng’eyisinda eyitalibire;
Abosi ni balwi.
17 Bakendisyapepya ebyalya ebyo ukaghesa n’erirya omukati waghu.
Bakendisyapepya abana baghu b’obulume n’ab’obukali.
Bakendisyapepya esyombuli syaghu n’esyonde syaghu.
Bakendisyapepya emizabibu yaghu n’emiti yaghu y’esyotini.
Emiyi yaghu eyo mundu ate angahikamo bweghu-bweghu eyo uyiketere, bakendisyatsandyayo omo muyali.”
18 “Nibya n’omo biro ebyo,” Yehova atya, “Sinendisyababughaho olosi. 19 Bamabibulya bati, ‘Busanaki Yehova oMungu wetu mwakatukolera ebyosi ebi?’ Litolere iwabasubirya uti, ‘Ngoko mwanilekeranaya, mwamayakolera oghundi mungu omo kihugho kyenyu, kutya mukendisyakolera abandu b’ehandi omo kihugho ekite kyenyu.’”
20 Bino byo ubwire abana ba Yakobo
N’eritulaghaniabyo omo Yuda:
21 “Muhulikirire, inywe bandu bakiru n’abatawite obwenge:*
Bali n’ameso aliwe sibelangira
Bali n’amatwi aliwe sibaliowa.
22 Yehova ati: ‘Simunisaghire?
Simwangatitimana embere syaghe?
N’ingye nayira omutsanga mo mupaka w’engetse,
Ni mughambo w’omughulu wosi ogho ngetse yiteyangalabako.
Nomo ebisunda byayo byanganayisumba, sibyangatoka;
Nomo byanganahuha, sibyangalaba kugho.
23 Aliwe abandu aba balimo mutima w’erighundu n’ow’omulele;
Babirileka enzira yaghe n’erikwama eyindi nzira.
24 Sibangayibwira bati:
“Lero twaterisagha Yehova, oMungu wetu,
Oyukawisaya embula oko mughulu owatolere,
Embula y’erimbere-mbere n’embula y’omwiso mwiso,
Oyukatuhiriraho omughulu* w’erigheserako.”
25 Amakosa wenyu w’abirileka imwatabya mukalola oko myatsi eyo.
Amalolo wenyu w’abirileka imutabana ebibuya.
26 Kundi omo kati-kati k’abandu baghe muli abandu babi.
Bakabya ibanemulimbya, ng’abakategha ehinyunyu ibabirisunama.
Bakahiraho ekitegho ekikita.
N’abandu bo bakahamba.
27 Ng’eritonga eriswiremo ehinyunyu
Kutya n’amanyumba wabo aswiremo amabehi.
Ekyo kyo kyabirileka ibabya n’amaka kandi ibabya bateke.
28 Babirineneha, n’engobi yabo yabiritendera.
Baswiremo obubi.
Sibalilwira oko syombangwa sy’omwana oyutawite baba,
Busana n’eriyironderya endundi;
Kandi sibalikolera abera omo ritunganene.’”
29 Yehova ati: “Nanganabula eribatondesya busana n’emyatsi eyo?
Nanganabula eriyituhulirya ekihanda ekiri ng’ekyo?
30 Omwatsi owakita obuba kandi owakasaghisaya mwakabya omo kihugho:
31 Abaminyereri bakabugha obuminyereri bw’amabehi,
N’abahereri bakakolesaya obukulu bwabo erinubya abandi.
N’abandu baghe babiritsemera ekyo kyo batya.
Aliwe mukendisyakolaki enduli yabihika?”