Yeremia
4 Yehova ati: “Israeli, wamabiligha erinisubira,
Wamabinisubira
Kandi wamabilusya embere syaghe y’esyosanamu syaghu esikita esyonye,
Aho isiwendibya musayi.
2 Kandi wamabilapa omo kwenene, omo bulingirirania, n’omo ritunganene,
‘Oko kwenene-kwenene ngoko Yehova aliho!’
Ebihanda ibikendiyibanira emiyisa erilabira iye,
Kandi ibikendiyihalamba omw’iye.”
3 Kundi bino byo Yehova akabwira abandu be Yuda n’abandu be Yerusalema:
“Muyilimire ekitaka ekyangalimwa,
Muleke erihera embuto y’omo mahwa.
4 Muyibanaye busana na Yehova
Kandi mulusaye engobi y’oko busoni bw’emitima yenyu,
Inywe bandu be Yuda n’abe Yerusalema.
Bite bitya, ekinigha kyaghe ikikendyaka ng’omuliro
Kandi ikikendyaka, isihendibya oyukenditoka erilimyakyo
Busana n’emikolere yenyu eyituwene.”
5 Mutulaghanaye omwatsi oyo omo Yuda, kandi mutulaghanayegho omo Yerusalema.
Mulake n’eribuha omo mahembe omo kihugho kyosi.
Mubirikire omo mulenge muli n’eribugha muti:
“Muhindane haghuma,
Tutibitire omo miyi eyo mundu ate angahikamo bweghu-bweghu!
6 Mutsimbe omuti owakakanganaya enzira ye Sioni!
Murondaye ah’eribisama, kandi isimwimana,”
Kundi ngalusaya obuhanya oko luhande lw’endata, obuhanya bunene.
7 Oyukatsandaya ebihanda abiritsukalo.
Abirikulika aho ali ngoko esimba ikakulika omo kisuki, aho yilue yibiseme.
Abirilua omo mwanya wiwe atoke eriyira ekihugho kyaghu mo kindu ekikita obuba.
Emiyi yaghu yikendiyirwa mo bisambukalirya,
Simwendisyasyikala n’omundu n’omughuma.
8 Neryo muyambale olukimba lw’esaki,*
Mulire* n’eribya omo bulighe,
Kundi ekinigha kinene kya Yehova sikyekyatuluako.
9 Yehova ati: “Ekiro ekyo, omutima w’omwami akendisyatitimana,*
N’omutima w’abakulu akendisyatitimana.
Abahereri bakendisyasaghisibwa n’abaminyereri bakendisyakukubala.”
10 Neryo munabugha niti: “Bulighe bwaghe, Yehova Omukama Mukulu oko Bosi! Oko kwenene, wabiriteba abandu aba n’abikalani be Yerusalema! Wabiribugha uti: ‘Mukendikala buholo,’ aliwe omuyali iniane omo mumero wetu.”*
11 Oko mughulu oyo, bakendisyabwira abandu aba n’abandu be Yerusalema ambu:
“Ekihunga ekikumaya ebindu ekikalua oko hitwa ehiteko kindu hy’omo mbwarara
Kikendisyabuhirira oko mwali* w’abandu baghe.
Sikiryasa erisyaghulukya engano kutse eryeryayo.
12 N’inge ngatuma ekihunga ekikalire ky’omo myanya eyi.
Neryo lino ngendibatswera.
13 Mulebaye! Akendyasa ng’ebitu by’embula.
N’emitoka yiwe-yiwe ng’ekihunga kinene.
Esyosabayiri* siwe syanguhire kulenga amasamba.
Tuli bahanya, kundi twamabitsandibwa!
14 Yerusalema, eraya omutima waghu, ulusayemo obubi, utoke erisabulwa.
Ukendisyabya ighune n’amalengekania mabi erihika mughulu wahi?
15 Kundi omulenge anemutula omwatsi eritsuka e Dani
Kandi anemutulaghania omwatsi w’obuhanya eritsuka oko bitwa bye Efraimu.
16 Mubwire omwatsi oyo w’ebihanda.
Mubwiregho abandu be Yerusalema.”
“Abalebererya* bamabilua omo kihugho ky’ehali.
Bakendisyakaramira emiyi ye Yuda.
17 Bamabitimba oko muyi oko syombande syosi ngoko abakateghaya eririma bakakola,
Kundi omuyi oyo abirighana erikwama obusondoli bwaghe,” Yehova atya.
18 “Ukendisyahabwa amalipizi busana n’emighendere yaghu n’emikolere yaghu.
Obuhanya obukendikuhikira bukalihire kutsibu,
Kundi bukendihika n’omo mutima waghu!”
19 Bulighe bwaghe!* Bulighe bwaghe!
Namowa obulumi bunene omo mutima waghe.*
Omutima waghe anemupuka-puka emwisi syaghe.
Sinangatoka erihuna.
Kundi nabiryowa omulenge w’erihembe,
Omulenge owakakanganaya ngoko hakendibya amalwa.*
20 Ko tunemwowa esyongulu sy’obuhanya,
Kundi ekihugho kyosi kyabiritsandibwa.
Amahema waghe abirilw’iniatsandibwa,
Amahema waghe abiritsandibwa omo katambi kake.
21 Erihika mughulu wahi ngendibya ininemusamalira omuti owakakanganaya ah’erihindana?
Erihika mughulu wahi ngendibya ininemwowa omulenge w’erihembe?
22 “Kundi abandu baghe ni bakiru;
Sibanitsomene.
Ni bana bakiru, abatelengekanaya.
Basi erikola* ebibi,
Aliwe sibasi erikola ekyuwene.”
23 Munasamalira ekihugho, neryo namalangira isikirimo kindu kandi ikyabiribya matongo.
Munasamalira olubula, neryo namalangira ekyakakala ky’olubula isikikiri.
24 Munasamalira ebitwa, neryo namalangira ibinemutitimana,
N’ehitwa hyabya hikatsinga-tsinga.
25 Munasamalira, neryo namalangira isihali mundu,
N’esyonyunyu syosi sy’omo kyanya syabya isyabiritibita.
26 Munasamalira, neryo namalangira ekihugho ekirimo emiti y’amatunda ikyabiribya mbwarara,
N’emiyi yamo yosi iyabirisambulwa.
Byabya bitya busana na Yehova,
Busana n’ekinigha kiwe kinene.
27 Kundi Yehova ati: “Ekihugho kyosi kikendibya matongo,
Aliwe sinenditsandyakyo olosi.
28 Busana n’ekyo, ekihugho kikendibya omo kiriro
N’olubula oluli endata lukendibyamo mwirimya.
Kundi nabiribugha kandi kundi nabiriyisogha.
Sinendibindula amalengekania waghe,* sinendisuba enyuma.
29 Omuyi wosi akenditibita
Busana n’omulenge w’abakaghenda oko sabayiri* n’abakaghusa emisali,
Abandu bakayibisa omo hiti hike-hike.
Kandi bakahetukira oko lukuka.*
Emiyi yosi yabiribya matongo,
Simukiri mundu.”
30 Neryo kundi lino wabiribya matongo, ukendiyira ghuti?
Ighukambala esyonyimba sy’eryangyi y’omusasi eyihenirye,*
Ighukayipamba omo mapambo w’ehoro,
Kandi ighukanenehaya ameso waghu omo rangyi eyikinire.
Aliwe ighukayiluhaya bule ukayiyira mo mubuya,
Kundi ababya bakayitsutsa iwe babirikughana.
Ibwa lino bakasonda erikwita.*
31 Kundi nabiryowa omulenge owali ng’ow’omukali oyulwere,
Mungowa obulumi obuli ng’obw’omukali oyunemubuta omwana wiwe w’erimbere.
Mungowa omulenge w’omwali we Sioni inianemuhumula akatwa omuka.
Akabugha inianasanzire ebyala biwe ati:
“Bulighe bwaghe, nabiriluha busana n’abiti!”