Yeremia
3 Abandu bakabulaya bati: “Omulume amabihigha omukali wiwe neryo omukali oyo iniaghenda, iniayabya mukali w’oghundi mulume, omulume oyo wamuhigha anganatasyasubana naye?”
Ekihugho si kyabiritsanda olosi!
“Wabirikola obumbalaka n’abalume bangyi.
Neryo ibwa lino, uti wanzire erinisubira?” Yehova atya.
2 “Usumbe ameso waghu, ulebaye ehitwa ehiteko kindu neryo usamalire.
Hane oho bataghotsera naghu kinyanganga?
Wabya ukikala oko musike w’endaki ukalinda abalume,
Ng’omundu oyukahuma-huma* omo mbwarara.
Ukinatsandaya ekihugho
Omo bumbalaka bwaghu n’omo bubi bwaghu.
3 Kyo kyabirileka ibakughanira embula nene
N’embula y’omwiso-mwiso muyititawa.
Ameso* waghu syakirimo esisoni ng’ameso w’omukali oyukakola obumbalaka.
Ukaghana erikwa esisoni.
4 Neryo lino ukanilakira uti:
‘Baba waghe, uli mwira waghe eritsuka omo bulwana bwaghe!
5 Ukendisyabya ighunanihiteneko kera na kera?
Kutse ukendisyabya ighunanibikireko ekinigha mughulu wosi?’
Ebyo byo ukabugha,
Aliwe ukabya ighunemukola ebibi byosi ebyo wangatoka.”
6 Omo biro by’omwami Yosia, Yehova mwanibwira ati: “‘Mughukanalangira emyatsi eyo Israeli, omukali mumbalaka, alyakola? Mwakahetukira oko buli kitwa kiri-kiri n’eriya omo ndina sy’obuli muti owaboghire akayakola obumbalaka. 7 Nibya Israeli mwabya abikola emyatsi yosi eyo, mundaleka erimubwira niti anisubire, aliwe mwatanzubira. Na Yuda mwabya akatungerera mwali wabo oyukaleghula. 8 Nabere nabilangira ebyo, munahigha Israeli oyukaleghula iniane n’ebaruha y’eritwa endwa olosi busana n’obusingiri bwiwe. Aliwe ye Yuda, omwali wabo oyukaleghula, mwatasagha; naye mwaghenda, amayakola obumbalaka. 9 Mwatalangira obumbalaka bwiwe mo kindu ekikalire. Mwabya akatsandya ekihugho n’erisingira omw’iramya amabwe n’emiti. 10 Nomo ebyosi ebyo byanabya, mwali wabo ye Yuda oyukaleghula, mwatanisubira n’omutima wiwe wosi, aliwe mwabya ng’akanisubira, kwesi iko bite bitya,’ Yehova atya.”
11 Enyuma sy’aho, Yehova mwanibwira ati: “Israeli, omukali oyukaleghula, abiriyikangania mo mutunganene kulenga Yuda oyukaleghula. 12 Ghenda uyatulaghanaye ebinywa bino oko luhande lw’endata:
“‘“Israeli, omukali oyukaleghula, nisubire,” Yehova atya.’ ‘“Sinendikulebererya endata ininahitene,* kundi niri mutaleghula,” Yehova atya.’ ‘“Sinendisyabya ininakuhiteneko kera na kera. 13 Ekyo ngakusaba kisa ry’eriligha ngoko wabirikola amakosa, kundi wabirighana erikwama obusondoli bwa Yehova oMungu waghu. Muwataleka erighotsera n’abandu* b’ehandi* omo buli ndina sy’omuti owaboghire kandi muwataniowa,” Yehova atya.’”
14 “Munisubire, inywe bana abakaleghula,” Yehova atya. “Kundi lino n’ingye mukama* wenyu oyutolere. Kandi ngendibimya, ngendimya omundu mughuma omo muyi n’abandu babiri omo kihanda, n’eribatwala e Sioni. 15 Ngendisyabaha abalisya abakakola ebyo mutima waghe anzire, kandi bakendisyabalisya erilabira ebyo basi n’omo menge. 16 Oko mughulu oyo, mukendisyabya bangyi kandi mukendisyahetya amatuda omo kihugho,” Yehova atya. “Sihendisyasyabya oyukabugha ati, ‘Erisanduku ry’endaghane ya Yehova!’ Omundu syendisyalengekania oko mwatsi oyo, sihali oyukendisyibukagho kutse erikwagho olukando, kandi syendisyasyakolwa. 17 Oko mughulu oyo, bakendisyahula Yerusalema mo kitumbi ky’obwami kya Yehova. N’ebihanda byosi bikendisyahindanibwa bitoke eripipa erina rya Yehova omo Yerusalema, kandi sibyendisyasyakwama omutima wabo mubi omo righundu.”
18 “Oko mughulu oyo, abandu be Yuda n’abandu be Israeli bakendisyalendera haghuma, oghundi hakuhi n’oghundi, kandi bakendisyalua haghuma omo kihugho ky’oko luhande lw’endata n’eringira omo kihugho ekyo naha abotata-kulu wenyu mo mwandu. 19 Munalengekania niti, ‘Ka munakuhira omo baghala kandi munakuha ekihugho ekyuwene, omwandu oghuwene kutsibu omo kati-kati k’ebihanda!’* Kandi munalengekania niti ukendinibirikira mo ‘Baba waghu!’ kandi niti siwendisyasyaleka erinikwama. 20 ‘Oko kwenene, ng’omukali oyukaleghula oko mulume wiwe* n’erimusigha, nenyu inywe bandu be Israeli, mwabirileghula okw’ingye,’ Yehova atya.”
21 Omulenge anemwowika oko hitwa ehiteko kindu:
Ni milenge y’abandu be Israeli abakalira n’erilemba-lemba.
Kundi babiriyighendya muhanda
Kandi babiribirirwa Yehova oMungu wabo.
22 “Munisubire, inywe bana abakaleghula!
Ngendilamya erileghula ryenyu.”
“Itwe babano! Twabiryasa eyo uli,
Kundi iwe Yehova, uli Mungu wetu.
23 Oko kwenene, ehitwa n’ebuna-buna y’oko bitwa ni myatsi eyite y’ekwenene.
Oko kwenene, Yehova oMungu wetu yukendisyasabula Israeli.
24 Aliwe omwatsi owakita esisoni* abiritsandya ekindu ekyo abotata-kulu wetu banubira erilua omo bulwana bwetu,
Abiritsandya esyombuli syabo n’esyonde syabo,
Abiritsandya abana babo b’obulume n’ab’obukali.
25 Tughotsere omo sisoni syetu,
Kandi tuyiswike erihemuka ryetu,
Kundi twabirikolera Yehova oMungu wetu y’erilolo,
Itwe n’abobaba wetu eritsuka omo bulwana bwetu erihika na munabwire,
Kandi mututakwama omulenge wa Yehova oMungu wetu.”