Yeremia
2 Yehova mwakania naghe, amanibwira ati: 2 “Ghenda, uyabwire abikalani be* Yerusalema uti, ‘Yehova ati:
“Nikinibukire ngoko wabya unianzire* omughulu wabya mulwana,
Olwanzo olo wanikanganaya omughulu twalighirana tuti tukenditahania,
Nikinibukire ngoko wanikwama omo mbwarara,
Omo kitaka ekyabya isikiheriremo mbuto.
3 Israeli abya mubuyirire oko Yehova, abya byalya by’erimbere-mbere ebyo oMungu asoloma.”’
‘Abosi ababya bakasonda erimutomera ibakabyako omusango.
Obuhanya ibukabahikira,’ Yehova atya.”
4 Muhulikirire ekinywa kya Yehova, inywe bana ba Yakobo,
N’inywe bihanda byosi by’abandu be Israeli!
5 Yehova ati:
“Abotata-kulu wenyu mubanisungako ekibi kyahi,
Ekyaleka ibaya hali okw’ingye
Kandi ekyaleka ibaramya esyosanamu esite na mughaso, neryo nabo bamabya bandu abate na mughaso?
6 Nibya mubatabulya bati, ‘Yehova alihi,
Oyo watulusaya omo kihugho kye Misri,
Oyo watusondola omo mbwarara,
Omo kihugho ekirimo esyombwarara n’ebyuna,
Omo kihugho ekikakolamo omwisi munene n’ekirimo ekitsutsu kinene,
Omo kihugho ekitelabamo abandu
Kandi ekitikiremo mundu?’
7 Neryo munabaleta omo kihugho ekirimo emiti y’amatunda
Mutoke erirya amatunda w’emiti eyo n’ebindu ebyuwene ebikalua oko miti eyo.
Aliwe mumwahika, mwamatsandya ekihugho kyaghe.
Mumwayira omwandu waghe mo kindu ekikita esyonye.
8 Abahereri mubatabulya bati: ‘Yehova alihi?’
Abakangirirya b’Emighambo mubataniminya,
Abalisya mubaghana erikwama obusondoli bwaghe,
Abaminyereri mubabugha obuminyereri omo rina rya Baali,
Kandi mubakwama emiungu eyiteyangabaletera endundi yosi-yosi.
9 ‘Busana n’ekyo, kandi ngendibashitaka,’ Yehova atya.
‘Ngendishitaka n’abana b’abana benyu.’
10 ‘Aliwe musoke engetse n’eriyahika omo myanya ye Kitimu y’oko musike-sike w’engetse,* neryo mulangire.
Inga, mutume omundu ye Kedari
Ayayiteghereraye ndeke-ndeke.
Muterilebya ekiri ng’eki nga kinekyatabya.
11 Hane ekihanda ekyabirileka eriramya emiungu yakyo neryo ikyaramya ebindu ebite miungu?
Aliwe abandu baghe babirihira ekindu ekite na mughaso omo mwanya w’olukengerwa lwaghe.
12 Iwe lubula, ulebaye ekyo n’erisangala.
Utitimane busana n’obuba bunene kutsibu,’ Yehova atya,
13 ‘Kundi abandu baghe babirikola emyatsi ibiri eyituwene:
Babirinilekerania, ingye ngununuko y’amaghetse w’engebe,
N’eriyitakulira* ebyuna by’amaghetse
Ebyuna by’amaghetse ebirimo mighenyo-mighenyo, ebitebyangaleghamo amaghetse.’
14 ‘Israeli ni mughombe kutse ni mukobe oyo wabutirawa omo nyumba y’omukama wiwe?
Neryo busanaki babiripura ebindu biwe?
15 N’esyosimba esikine nyilere* sikamururumira;
Syabiriruruma omo mulenge muli.
Syabiriyira ekihugho kiwe mo kindu ekikita obuba.
Emiyi yiwe yabiritimibwa, neryo simukiri mundu.
16 Abandu be Nofu* n’abe Tapanesi bakalira oko makuha w’oko mutwe* waghu.
17 N’iwe utalyayiletera ekyo
Omw’ilekerania Yehova oMungu waghu
Omughulu abya akakusondola omo nzira?
18 Neryo busanaki lino wanzire erirondya enzira eyikaya e Misri
Utoke eriyanywa oko maghetse we Shihori?*
Busanaki wanzire erirondya enzira eyikaya e Asiria,
Utoke eriyanywa oko maghetse w’Olusi?*
19 Litolere obubi bwaghu ibwakukunga
Litolere n’erileghula ryaghu iryakukunga.
Uminye n’erilangira ngoko si kyuwene n’ahake kandi ngoko kikalihire kutsibu
Erilekerania Yehova oMungu waghu.
Muwatanisagha n’ahake,’ Omukama Mukulu oko Bosi, Yehova w’emilondo atya.
20 ‘Kundi kera munatsutsanga omuketo waghu
Kandi munatwa eminyororo* yaghu.
Aliwe muwabugha uti: “Sinendikukolera.”
Kundi oko buli katwa kali-kali n’omo buli ndina y’omuti owaboghire
Muwabya ukayighalika n’erikola obumbalaka.
21 Munakuhera mo muzabibu waghe w’erangyi y’omusasi oghuwene, owakalua omo mbuto eyiteko mutsafu.
Neryo mubikabya biti wamayihindula embere syaghe n’eribya mitahi eyite loko ey’omuti w’omuzabibu w’ehandi?’
22 ‘Nomo wanganaba omo sude* kandi nomo wangakolesya esabuni nyingahi,
Ekosa yaghu yikendibya iyine kitingu embere syaghe,’ Yehova Omukama Mukulu oko Bosi atya.
23 Wanganatoka eribugha uti: ‘Sinditayitsandya,
Sinditakwama Esyobaali’?
Lebaya enzira eyo ulyalabamo omo musya.
Lengekanaya oko ekyo ulyakola.
Uli ng’engamia y’obukali eyikine nyilere eyanguhire
Eyikaya eyi n’eyi yikatibita kitya-kitya omo syonzira syayo,
24 Ng’epunda y’omoli ey’obukali eyibeghere embwarara,
Eyikakumba* oko rihunga, omughulu yihisirye
Nindi yo wangakakiryayo omughulu yabirihisya?
Omo bandu abakarondayayo, sihali oyo wangayiluhya.
Bakendisungayo omughulu yilaghire oko nume.
25 Uteghaye ebisando byaghu ukasyaghenda isiwambite ebiryato.
Uteghaye n’omumero waghu akasyuma busana n’enyota.
Aliwe muwabugha uti, ‘Iyehe, sihali maha!
Nabiryanza abandu b’ehandi,*
Kandi bo ngendikwama.’
26 Ngoko omwibi akahemuka abihambwa,
Ekihanda kye Israeli nakyo kyabirihemuka,
Abaisraeli, abami babo n’abakulu babo
Ababahereri babo n’abaminyereri babo.
27 Bakabwira omuti bati, ‘N’iwe baba waghe,’
Ibabwira n’eribwe bati, ‘N’iwe wanibuta.’
Aliwe ingye, babirinilolyako omughongo omo mwanya w’erilolerya obusu bwabo eyo niri.
Kandi omughulu bakendisyahikirwa n’obuhanya, bakendisyabugha bati,
‘Hangana, utusabule!’
28 Neryo lino, emiungu eyo wayikokoteraya yiri hayi?
Yihangane yamabya iyanganatoka erikusabula omughulu uli omo buhanya.
Kundi iwe Yuda, emiungu yaghu yabiribya minene ng’emiyi yaghu!
29 ‘Busanaki mukinanishitaka?
Busanaki inywe bosi mwabirighana erikwama obusondoli bwaghe?’ Yehova atya.
30 Nabirihunza abanya benyu, aliwe ekyo sikyetaluiramo kindu.
Mubataligha erikungwa.
Omuyali wenyu-wenyu walyalya abaminyereri benyu,
Ng’esimba eyikaronda akanyama k’erirya.
31 Iwe kizazi,* lengekanaya oko kinywa kya Yehova.
Nabiribya ng’embwarara omo meso wa Israeli
Kutse nabiribya ng’ekihugho ekirimo omwirimya munene?
Busanaki abandu aba, abandu baghe, mubabugha bati, ‘Tukaghanga-ghanga bwiranda,
Sitwendisyasyasa ewaghu’?
32 Omubikira anganabirirwa ebindu biwe by’eriyipambamo,
Kutse omulunga anganabirirwa emikaba* yiwe?
Aliwe abandu baghe babirinibirirwa omo biro bingyi.
33 Mukali, namaligha ngoko wasi erirondya olwanzo!
Wabiyighisya esyonzira sy’obubi.
34 Nibya n’ekihande ky’eyikwa ky’oko ropo yaghu kiriko ekitingu ky’omusasi w’abera kandi abate n’ekosa,
Nomo sinditeya abandu abo bakatula omulango w’enyumba yaghu.
Omusasi wabo ali oko kihande kyosi ky’eyikwa ky’eropo yaghu.
35 Aliwe ukabugha uti, ‘Sindi n’ekosa.
Syakinihiteneko.’
Neryo ngakutswera
Kundi ukabugha uti, ‘Sinditakola erilolo.’
36 Busanaki ukalangira eribya ukayibinduka-bindukako mo mwatsi muke?
Ne Misri nayo ikendileka iwahemuka,
Ngoko e Asiria nayo yaleka iwahemuka.
37 Ekyo nakyo kikendisyaleka iwahulukira ehihya iwabirihira ebyala by’oko mutwe,
Kundi Yehova abirighana abandu abo ukayiketera.
Sibendisyakuwatikya n’ahake.”