Yeremia
1 Bino ni binywa bya Yeremia* mughala wa Hilkia, omughuma w’oko bahereri be Anatoti ey’omo kiharo kya Benyamini. 2 Yehova mwakania na Yeremia omo mwaka we 13 w’obutabali bwa Yosia mughala wa Amoni, omwami we Yuda. 3 Kandi mwakania naye oko mughulu wa Yehoyakimu mughala wa Yosia, omwami we Yuda, erihika oko mwiso w’omwaka we 11 w’obutabali bwa Zedekia mughala wa Yosia, omwami we Yuda, erihika omughulu abikalani be Yerusalema batwalawa omo bunyewa, omo mwisi w’akatano.
4 Yehova mwakania naghe, mwanibwira ati:
5 “Embere nikubumbire omo nda, nabya ininakwasi,*
Nabya inabirikuyira mo muminyereri w’ebihanda.”
6 Aliwe munabugha niti: “Bulighe bwaghe, Mukama Mukulu oko Bosi Yehova!
Ka sinasi eribugha, kundi nikine mulwana mulere.”
7 Neryo Yehova mwanibwira ati:
“Isiwabugha uti, ‘Nikine mulwana mulere.’
Kundi litolere iwayasungana n’abandu bosi abo ngendikutuma niti uyasungane nabo,
Kandi litolere iwabugha ebyosi ebyo ngendikubwira niti ubughe.
8 Isiwabasagha busana n’obusu bwabo,*
Kundi Yehova ati: ‘Nine haghuma naghu nitoke erikusabula.’”
9 Neryo Yehova mwakakya ebyala biwe, amatula oko buno bwaghe. Enyuma sy’aho, Yehova mwanibwira ati: “Namabihira ebinywa byaghe omo buno bwaghu. 10 Hulikirira! Munabwire namakuha omubiiri w’eribya muminyereri w’ebihanda n’ow’amami, w’erikulanga n’eriterya, w’eritsandya n’erihimbula, n’ow’erihimba n’erihera.”
11 Kandi Yehova mwakania naghe, amanibulya ati: “Yeremia, wamalangiraki?” Neryo munamusubirya niti: “Namalangira omutahi w’omuti w’elozi.”*
12 Yehova mwanibwira ati: “Kobine ngoko wamalangira, kundi ngabya ininalolire nitoke eriberererya ekinywa kyaghe.”
13 Kandi Yehova mwakania naghe engendo y’akabiri, amanibulya ati: “Wamalangiraki?” Neryo munamusubirya niti: “Namalangira enyungu* iyinemubera,* n’obuno bwayo bukondomire erilua oko luhande lw’endata erilolera oko luhande lw’eyikwa.” 14 Neryo Yehova mwanibwira ati:
“Obuhanya obukendisyahikira abandu bosi b’omo kihugho
Bukendisyasira oko luhande lw’endata.
15 Kundi Yehova ati:
‘Ngabirikira ebihanda byosi by’omo mami w’oko luhande lw’endata
Bikendisyasa; n’obuli mwami w’ebihanda ebyo akendisyayihiriraho ekitumbi kiwe ky’obwami,
Oko bwingiriro bw’emilango ye Yerusalema,
N’erilwa n’esyombimbo syosi esitimbire kugho
N’erilwa n’emiyi yosi ye Yuda.
16 Kandi ngendibatswera busana n’obubi bwabo bosi,
Kundi babirinilekerania,
Kandi bakatumbiraya eyindi miungu y’omuki w’amahere wabo
Kandi bakakukamira ebindu ebyo bandu bakokotaya omo byala byabo.’
17 Aliwe iwe, uyiteghekanaye erikola omubiiri.*
Kandi uhangane n’eribwirabo ebyosi ebyo niryakubwira niti ubabwire.
Isiwasaghabo,
Wamabisaghabo, ingendisyakusaghisya embere syabo.
18 Kundi munabwire namakuyira mo muyi ogho mundu ate angahikamo bweghu-bweghu,
Enduyi y’ekyuma n’esyombimbo sy’ekwire* utoke erilwa n’ekihugho kyosi,
N’erilwa n’abami be Yuda n’abakulu be Yuda,
Abahereri b’amo n’abandu b’omo kihugho ekyo.
19 Oko kwenene, bakendisyalwa naghu,
Aliwe sibendisyakusinga.
Kundi Yehova ati: ‘Nine haghuma naghu nitoke erikusabula.’”