Amosi
5 “Inywe Baisraeli, muhulikirire ebinywa bino ebyo ngababughako ebiri ng’olwimbo lw’ekiriro:
2 ‘Omubikira, Israeli abiriwa ahisi;
Syangasyahangana.
Babirimuleka oko kitaka kiwe;
Sihali oyo wangamuhangania.’
3 “Kundi Yehova Omukama Mukulu oko Bosi ati:
‘Omuyi owakatuma abasuda 1000 oko malwa akendisighala n’abasuda 100;
N’omuyi owakatuma abasuda 100 oko malwa akendisighala n’abasuda 10;
Ekyo kyo kikendihikira Abaisraeli.’
4 “Bino byo Yehova akabwira Abaisraeli:
‘Munisubire, neryo mukendibyaho omo mughulu muli.
5 Isimwaya e Beteli,
Isimwaya e Gilgali kandi isimwatambukira e Beeri-sheba,
Kundi oko kwenene-kwenene, Gilgali akendisyaya omo bunyewa,
N’omuyi we Beteli akendisyahwaho.*
6 Musonde-sonde Yehova, neryo mukendibyaho omo mughulu muli,
Bite bitya, iniakendihutangikira oko kihanda kya Yozefu ng’omuliro,
Iniakendihisya omuyi we Beteli, isihendibya oyukalimaya omuliro oyo.
7 Mukabindula ebitunganene mo ngalihira,
Kandi mukaghusa eritunganene ry’ahisi.
8 Oyo wabumba ekikuto ky’esyongununu kye Kima* n’ekikuto ky’esyongununu kye Kesili,*
Oyukabindula ekitsutsu kinene mo kyakakala ky’etututu,
Oyukaleka eritungyi iryabyamo mwirimya ng’omo kiro,
Oyukabirikira amaghetse w’engetse,
Atoke eryutagho oko kihugho,
—Erina riwe yo Yehova.
9 Akendisyalw’iniatsandya omundu w’amaka,
Akendisyalw’iniatsandya emyanya eyo mundu ate angahikamo bweghu-bweghu.
10 Abandu abo baponire abakabakungira oko mulango w’omuyi.
Kandi baponire abakababwira ekwenene.
11 Kundi mukalihisaya omwera y’ekitasi busana n’eririma eryo akalima
Kandi mukimaya engano mo ngemo,
Simwendisyikala mughulu muli omo manyumba agho mwahimba, awahimbire omo mabwe awabatsire
Kandi simwendisyanywa edivai y’emizabibu eyikalua omo malima aghuwene w’emizabibu eyo mwahera.
12 Kundi ninasi ngoko amakosa wenyu ni manene kutsibu
Kandi ngoko amalolo wenyu ni manene kutsibu
Mukaghalaya omutunganene,
Mukimaya ebyutuliro,*
Kandi simwekolera omwera ebyo atolere iniakolerwa oko mulango w’omuyi.
13 Busana n’ekyo, abawite amenge bakendisyabya bukutu oko mughulu oyo,
Kundi akendisyabya mughulu w’obuhanya.
14 Mukole ebyuwene, butsira ebituwene,
Mutoke eribyaho mughulu muli.
Neryo Yehova oMungu w’emilondo akendibya haghuma nenyu,
Ngoko mukanabugha muti ane haghuma nenyu.
15 Mupone ebibi, aliwe mwanze ebyuwene,
Muleke eritunganene ritabale oko mulango w’omuyi.
Kwa muhwa Yehova oMungu w’emilondo
Akendikangania olukogho abana ba Yozefu abakiriho.’
16 “Busana n’ekyo, bino byo Yehova oMungu w’emilondo, ye Yehova, akabugha:
‘Omo buli mwanya w’abandu bosi hakendisyabya ekiriro
Omo syonzira syosi abandu bakendisyabugha bati: “Buhanya! Buhanya!”
Bakendisyabirikira abakulima base balire
Bakendisyabirikira n’abaliri abakalihawa base balire.’
17 ‘Omo buli ririma ry’emizabibu mukendisyabya ekiriro;
Kundi ngendisyalaba omo kati-kati kaghu, Yehova atya.
18 ‘Bulighe oko banzire kutsibu bati ekiro kya Yehova kihike!
Munasi emyatsi eyikendisyabahikira ekiro kya Yehova kyahika?
Kikendesyabya mwirimya, sikyendisyabya kyakakala.
19 Bikendisyabya ng’omughulu omundu akatibita akasagha esimba, neryo ibwa iniahindana n’edubu,
Neryo abingira omo nyumba yiwe n’erihira ebyala by’oko luhimbo, n’enzoka iyamuluma.
20 Simwasi ngoko ekiro kya Yehova kikendisyabya mwirimya, butsira kyakakala?
Kandi simwasi ngoko kikendisyabya mwirimya, sihendisyabya ekikakoleraya?
21 Niponire, nipokirye ebiro byenyu bikulu,
Kandi sinditsemera ekikumbo ky’emihindano yenyu minene-minene.
22 Nomo mwangaherera amahere w’eryokererya n’ebindi bihembo,
Sinendisyatsemerabyo;
Kandi sinendisyatsemera esyonyama esirimo ebisabu esyo mukaherera mo mahere w’obuholo.
23 Munilusayeko emilenge-lenge y’esyonyimbo syenyu;
Sinanzire eryowa esyonyimbo esikawatawa omo byombo byenyu by’omuziki by’esyosinga.
24 Eritunganenene risende ng’amaghetse,
N’obulingirirania busende ng’olusi olutyuma.
25 Inywe Baisraeli, mumwanabya mukaniletera amahere n’ebihembo
Omo myaka 40 eyo mwabugha omo mbwarara?
26 Neryo mukendisyaheka omwami wenyu Sakuti na Kaiwani,*
Esyosanamu esyo mwayikokoteraya, engununu y’omungu wenyu,
27 Kandi ngendisyabatuma omo bunyewa eriyatwangana oko Damasko,’ oyo erina riwe yo Yehova oMungu w’emilondo atya.’’