Ukanakola ndeke haghuma n’abandi?

“NABYA hakuhi naye, ng’omukoli mukulu. . . . N’eritsema emigulu yosi embere siwe.” (Emi. 8:30) Erisako eri rikakanganaya ngoko oMughala w’oMungu akola haghuma na Tata wiwe omo myaka eyitasibwe mighanzo embere ase oko kihugho. Kandi tukalangira omo risako eri ngoko Yesu “mwatsema” omughulu abya akakola haghuma n’oMungu.

Yesu haghuma na Tata wiwe, Yehova, omughulu w’erihangyika olubula n’ekihugho.

Omughulu abya elubula, Yesu mwigha emibere eyamuwatikaya eribya mundu oyukakola ndeke haghuma n’abandi. Neryo abere ahika oko kihugho mwabya ky’erileberyako ekyuwene eky’omundu oyo wakola ndeke haghuma n’abandi. Eky’erileberyako kya Yesu kyangatuwatikya kiti? Omw’iyiteghererya eky’erileberyako kiwe, twanganabana esyokanuni isatu esyangatuwatikya eribya bandu abakakola ndeke haghuma n’abandi. Esyokanuni esyo sikendituwatikya eribya omo bughuma n’abaghala n’abali betu.

Yesu amatuma abigha biwe babiri eriyatulira. — Nga Yehova na Yesu, ubye ighunayiteghekire erikangania abandi ebyo wasi n’ebyo wabiriyilangirira

AKANUNI 1: ‘MUKENGANE’

Oyukakola ndeke haghuma n’abandi akayikehaya. Akalangira abakoli balikyabo mo b’omughaso kandi syalisonda eriyikangania. Yesu mw’igha omubere w’eriyikehya oyo erilwa oko Tata wiwe. Nomo Yehova musa yutolere eryahulwa mo Muhangyiki, mwanza abandi nabo baminye omubírí w’omughaso owo Mughala wiwe akola. Tukalangira ekyo omo binywa bino eby’oMungu abugha: “Tuhangike omundu omo musindo, n’omo kisosekanio kyetu.” (Enz. 1:26) Omughulu Yehova abugha ebinywa ebyo, Yesu mwalangira kw’akayikehaya kundu.—Esy. 18:35.

Omusyakulu w’endeko anemubegherya mughala wetu mulwana erikola omubírí mulebe w’omo ndeko.

Omughulu abya oko kihugho, Yesu naye mwayikehya. Omughulu abandu babya bakamupipa busana n’ebyalyakola, mwabya akaha olukengerwa Oyutolerelo. (Mar. 10:17, 18; Yoa. 7:15, 16) Yesu mwayikasa eribya ndeke haghuma n’abigha biwe kandi mwabakolera ng’abira butsira ng’abaghombe. (Yoa. 15:15) Nibya mwanabyabo n’oko bisando erikangiriryabo omubere w’eriyikehya. (Yoa. 13:5, 12-14) Nga Yesu, netu litolere itwakenga abakakola haghuma netu omo mwanya w’eribya tukalabirirya emyatsi yetu y’embere. Twanganakola bingyi twamabikenga abandi n’eritendisonda tuti itwe tubye tukapipwa mughulu wosi.—Rom. 12:10.

Kandi omundu oyukayikehaya akaminya ngoko “omo bungyi bw’abahani [omwatsi] akahanganibawa.” (Emi. 15:22) Nomo twanganabya n’obutoki bunene kutse itwabiriyilangirira myatsi mingyi, litolere itwibuka ngoko sihali oyo wasi emyatsi yosi. Yesu naye mwaligha ngoko hane emyatsi eyatasi. (Mat. 24:36) Kandi inyakatsemera eriminya amalengekania w’abigha biwe nomo babya isibahika-hikene. (Mat. 16:13-16) Kyo kyaleka ababya bakakola haghuma naye ibayowa mbolere eribya naye! Kutya, omughulu tukayikehaya n’eryibuka ngoko sitwasi emyatsi yosi, n’omughulu tukahulikirira amalengekania w’abandi, tukabya nabo ndeke, kandi busana n’erikola omo bughuma “[omwatsi] akahanganibawa.”

Kutsibu-tsibu abasyakulu b’endeko batolere ibigha omubere wa Yesu ow’eriyikehya omughulu bakakola haghuma. Litolere ibibuka ngoko ekirimu kibuyirire kyanganakola oko musyakulu wosi-wosi omughulu bali omo muhindano w’abasyakulu. Bamabiyikasa erileka obuli mughuma wa kubo inyayowa bwiranda eriteka amalengekania wiwe, emyatsi eyo bakendiyisogha haghuma iyikendiletera endeko yosi y’endundi.

AKANUNI 2: “MUMINYIKALAYE ERIYIBOMBEKA LYENYU”

Oyukakola ndeke haghuma n’abandi akayibombeka omughulu akakola nabo. Akahulikilira n’amalengekania w’abandi. Kwenene Yesu mwayilangirira kangyi-kangyi Tata wiwe akakangania omubere w’eriyibombeka. Ng’eky’erileberyako, Yehova mwamutuma erisabula abandu ababiritswerwa oluholo olo babya batolere.—Yoa. 3:16.

Yesu inyakasuba oko malengekania wiwe kyamatolera. Wibuke ngoko mwawatikya omukali Mukanana nomo anatumawa oko nyumba y’abana ba Israeli basa. (Mat. 15:22-28) Kandi abya n’amalengekania awatolere oko ebyabya anzire abigha biwe ibakola. Omwira wiwe mwanzwa yo Petero abere amughana embere sy’abandu, Yesu mwamughanyira n’omutima wosi. Enyuma syaho mwaha Petero y’emibírí y’omughaso ey’erikola. (Luka 22:32; Yoa. 21:17; Emib. 2:14; 8:14-17; 10:44, 45) Eky’erileberyako kya Yesu kikakanganaya ndeke-ndeke ngoko netu litolere itwaminyikalya “eriyibombeka [lyetu] oko bandu bosi” omw’ibya tukahulikilira amalengekania w’abandi.—Flp. 4:5.

Mwali wetu anemubegherya owundi erikola omwatsi mulebe.

Kandi eriyibombeka likendituwatikya eribya tukabeghera luba oko bandi tutoke erikola ndeke omo buholo n’abandu b’emihanda yosi. Yesu inyakakolera abandu abamutimbireko bo ndeke, kyo kyaleka n’esyonzighu siwe esyabya n’eritsuro isyamutsongera siti ni “mwira w’abasolesya n’abakola nabi” ababya bakahulikirira amakangirirya wiwe. (Mat. 11:19) Nga Yesu, netu twanganatoka erikola ndeke haghuma n’abandu abatatusosire mibere? Mughala wetu Louis, oyo wakola n’abandu b’emibere mbiriri-mbiriri omo mubírí w’obulebya b’omutimbo n’oko beteli akabugha atya: “Obuli kikuto ky’abandu abo nabya ngakola nabo, iningayikasa erisosekaniabo n’omubírí w’erihimba oluhimbo omo mabwe awatalingirirene. Kikasaba erihira obuli libwe aho litolere oluhimbo tutoke erilungukala. Monabya ngayikasa kutsibu erilungula emibere yaghe nyitoke erikola omubírí haghuma n’abandi ndeke!

Oyukakola ndeke haghuma n’abandi syalibisabo emyatsi busana n’erisondekania eribya endata kubo

Tuwite ehyanya hyahi omo ndeko yetu ehy’erikanganiryamo ngoko tuli bandu abakayibombeka? Twanganakangania omubere oyo omughulu tukatulira n’abandu b’omo kikuto kyetu. Twanganakola n’abatuliri abawite ebingyi by’erikolera ebihanda byabo kutulenga kutse abate b’omo lubwa lwetu. Twanganakwama emibasulire yabo kutse erikola omuhanda w’amahubiri awo banzire batoke eritsemera omubírí w’eritulira?

AKANUNI 3: ‘UBYE UKAHITYA’

Oyukakola ndeke haghuma n’abandi ‘akahitaya.’ (1 Tim. 6:18) Omughulu abya akakola haghuma na Tata wiwe, alinga Yesu mwayilangirira ngoko Yehova syabya akabisa emyatsi. Omughulu Yehova “asingika amatuku,” Yesu ‘abyaho’ akamuleberyako. (Emi. 8:27) Enyuma, Yesu mwaminyisya n’obutseme abigha biwe “emyatsi yosi” ey’owa oko Tata wiwe. (Yoa. 15:15) Twanganigha eky’erileberyako kya Yehova omwiminyisya abaghala n’abali betu b’emyatsi eyo twasi. Kwenene, Oyukakola ndeke haghuma n’abandi syalibabisa emyatsi eyo batolere eriminya n’eyangabawatikya busana n’erisondekania eribya endata kubo. Akatsema eribwira abandi b’emyatsi mibuya eyo asi.

Omusyakulu w’endeko anemuhulikirira mughala wetu mulebe akauba ngendo nyingyi omo mukania wiwe. Omusyakulu oyo ane n’akatabu “Erikangirirya”.

Kandi twanganasikya emitima yabo tukakola nabo. Omughulu omundu mulebe akatusima erilua oko mutima busana n’ebyo tukayikasa erikola ndeke, tukatsema. Yesu inyakabwira ababya bakakola naye b’ebibuya ebyalyalangira kubo. (Linganisaya Matayo 25:19-23; ne Luka 10:17-20) Mwababwira nibya ati basyakola “emibírí eyilengire” eyiwe. (Yoa. 14:12) Omo kiro eky’ekiro ekyatangirira oluholo lwiwe, mwasima abakwenda biwe bataleghula omw’ibabwira ati: “Inywe muli ababirinyihanganira [ababirikala haguma nage, NTN62] omwirengwako lyage.” (Luka 22:28) Terilengekania ngoko ebinywa ebyo mubyatula oko mitima yabo n’eribakuna erikola! Netu twamabya tukasima abo tukakola nabo, kwenene ibakenditsema kandi ekyo kyanganabakuna erikola bingyi.

WANGANABYA UKAKOLA NDEKE HAGHUMA N’ABANDI

Mughala wetu oyukahulawamo Kayode akabugha ati: “Erikola ndeke haghuma n’abandi sighusabirwe eribya mundu oyuhika-hikene, wamawatikya abandi eribya n’obutseme, omubírí akalu inyayitwala.” Naghu ukanakola utya kughuma n’abandi? Wanganabulya abaghala n’abali betu balebe ng’abakakulangira mo mukoli wa muhanda wahi. Bamabya bakatsemera erikola haghuma naghu ngoko abigha ba Yesu babya bakatsemera erikola haghuma naye, iwanganabugha ng’omukwenda Paulo uti: “Twanzire erikola haguma nenyu, n’eribaha obutseme.”—2 Kor. 1:24.