Wanamibuka?

Muwanasomire amagazeti wosi w’Akaleberyo k’Omuteya aw’omwaka ono? Byamabya bitya, lebaya nga wanganasubirya oko mabulyo ano:

Erilabya endambi ukakania na Yehova, erimuhulikirira, n’erimulengekaniako likaletera endundi yahi?

Iwukendibya ukayisogha ndeke, iwukendibya mukangirirya mubuya, obwikirirya bwaghu bukendibya ibunemuwata n’olwanzo lwaghu oko Yehova ilukendiwata.​—w22.01, aka. 30-31.

Eriyiketera Yehova lino n’abandu ababirihiraho eritusondola lyasyatuletera endundi yahi?

Eno y’endambi y’eriyiketera emibere ya Yehova y’erikolamo emyatsi omwitenditika-tikira obusondoli n’eriyisogha ly’abasyakulu. Omughulu w’obulighe bunene kikendisyoloba okw’itwe erikolesya obusondoli obo twasyahabwa nomo bwangabya ibwasyalangirika nga bukalire eryowika kutse nga likalire erikolesyabo.​—w22.02, aka. 4-6.

Omulaika asond’ibugha atiki omughulu abwira Zekaria oko “lulengo omo byala bya [Kafurnali] Zerubabeli”? (Zek. 4:8-10)

Enzoli moyakangania abandu b’oMungu ngoko n’omo ehekalu yalangirika omo meso w’abandu balebe mo buyira erisosekaniayo n’eya kera, yikendihwererera kandi yikendibya ngoko Yehova abya anzire iyabya.​—w22.03, aka. 16-17.

Twangabya tuti eby’erileberyako “. . . omw’ibugha”? (1 Tim. 4:12)

Omughulu tukabugha n’abandu omo lukogho omw’itulira, omughulu tuk’imba n’omuhwa wosi, omughulu tukabeghera erisubirya oko mihindano, omughulu tukabugha ekwenene, omughulu tukakanaya omo nzira eyikahimba abandi n’omughulu tukayiteghaya oko bitsumi.​—w22.04, aka. 6-9.

Busanaki emibere y’esyonyama ini (amami ani) esiri omo Danieli esura 7 yiri oko nyama nguma omo Eribisulirwa 13:1, 2?

Enyama eyi siyirisosekanaya obutabali bughuma busa, ng’obutabali bw’eRoma. Aliwe, ikasosekanaya amatabali wosi w’ekipolitike awabiritabala abandu erihika lino.​—w22.05, aka. 9.

Twangakangania tuti ngoko tuyiketere eritunganene rya Yehova?

Omundu mulebe amatukosera, amatuhitania kutse amatuhutalya kutsibu, tukayikasa eritendimuhitanako n’eritendimubikako ekinigha, tukaleka emyatsi y’omo byala by’oMungu. Akasyabughaho ebitsibu byosi ebikabya busana n’erilolo.​—w22.06, aka. 10-11.

Mughala wetu oyukasaba embere sy’abandi atolere inyibuka mwatsi wahi?

Omusabe si y’enzira y’erihana endeko kutse erilabya emilaghe. Siritolere omughala wetu oyukasaba iniabugha “binywa bingyi” kutsibu-tsibu emihindano yikatsuka. (Mat. 6:7)​—w22.07, aka. 24-25.

“Abakola ebibi” “basyalubuka oko lubanza lw’eritswerwa” omo nzira yahi? (Yoa. 5:29)

Sibendisyatswera erikwamana n’emibírí eyo bakola embere bahole. Bakendisyatswera erikwamana n’emyatsi eyo bakendisyakola babibana amakangirirya mahya-mahya omo kihugho kihya-kihya, sibendisyatswerwa erikwamana n’emyatsi eyo bakola kera. Bakisyatsopolibwa erikwamana n’amalengekania n’emikolere ebyo bakendisyabya nabyo enyuma sy’erilubukibwa.​—w22.09, aka. 18.

Oko muhindano munene owabya oko Omwisi 9, 1922, J. F. Rutherford mwahira omo bandu m’omuhwa w’erikolaki?

Oko muhindano munene owabya e Cedar Point, Ohio, e Amerika, mwabugha ati: “Omwami anemutabala! Muwite omubírí w’eribwira obuli mundu y’omwatsi oyo. Neryo, mutulaghanaye, mutulaghanaye, mutulaghanaye, oMwami n’oBwami bwiwe!”​—w22.10, aka. 3-5.

Isaya esura 30 hakakanganaya nzira syahi isatu esya oMungu akatuwatikiraya mo eriyiyinia?

Esura eyi yikakanganaya ngoko (1) akahulikirira n’erisubirya oko misabe yetu, (2) akatuha obusondoli, kandi (3) ngoko akatuha emighisa lino n’eyindi akendisyatuhayo omo biro by’embere.​—w22.11, aka. 9.

Busanaki twanangabugha tuti ebiri omo Esyonyimbo 37:10, 11, 29 mobyabererera kera, kandi bikendisyabererera omo biro ebikasa?

Ebinywa bya Dawidi bikakanaya engebe nga yabya yiti omo Israeli, ng’eky’erileberyako omo butabali bwa Solomono. Yesu mwakangania engebe nga yikendisyabya yiti omo biro ebikasa neryo mwasuba omo binywa ebiri omo mulondo wa 11. (Mat. 5:5; Luka 23:43)​—w22.12, aka. 8-10, 14.