Wanamibuka?

Wanabirisoma amagazeti wosi w’Akaleberyo k’Omuteya aw’omwaka ono? Byamabya bitya, lebaya nga wanganasubirya oko mabulyo ano:

“Eribya n’obulengekania buhya-buhya” kihiriremoki? (Rom. 12:2)

Erikola emyatsi mike eyuwene siritosire. Litolere itwabya tukalebya emibere n’amalengekania wetu. Kandi litolere itwalekana n’ebituwene tutoke eritsemesya Yehova.​—w23.01, aka. 8-9.

Omughulu tukayiteghereraya ebinemulaba omo kihugho, twangakangania tuti ngoko tuwite amalengekania awatolere?

Tukanza eriminya ebinemulaba omo kihugho nga binemuberererya biti amaminyereri w’eBiblia. Omo mwanya w’eriyipika-pikira emyatsi eyangaleka endeko iyaghabana, litolere itwasonda eriminya endondeka ya Yehova nga yabirikania yiti oko mwatsi oyo. (1 Kor. 1:10)​—w23.02, aka. 16.

Olubatiso lwa Yesu lusighene okuki n’olw’abigha biwe?

Itwe tukayiha oko Yehova, aliwe Yesu iye syabya asabirwe eriyiha oko Yehova, kundi abutawa omo kihanda kye Israeli eky’abandu ababya ibabiriyiherera oko Mungu. Yesu abya ahika-hikene, syabya n’erilolo lyosi-lyosi. Neryo syabya n’amalolo awangalekire inyasabwa eriyisubako.​—w23.03, aka. 5.

Twangawatikya abandi bo tuti batoke eribya bakasubirya oko mihindano?

Twanganabya tukasubirya omo binywa bike, tutoke erisighira abandi b’akanya k’erisubirya. N’omughulu tukasubiraya omo binywa bike, kumbe isitwakanaya oko myatsi mingyi. Aho, abandi nabo ibakendibana emyatsi y’erikaniako.​—w23.04, aka. 23.

Enzira y’obubuyirire eyikanibweko omo Isaya 35:8 yikasosekanayaki?

Oko nzuko, enzira nene y’ekisosekanio eyi, yabya ikasosekania enzira eyo Abayahudi balabamo bakalua e Babiloni bakasuba ewabo. Tubughe tutiki oko mighulu ya lino-lino? Omo syokarne sy’embere w’omwaka 1919, omubiri munene w’eriteghekania enzira eyo, mwakolwa, ng’eribindula eBiblia omo yindi mibughe n’eritsapisyayo; n’eyindi mibiri okw’aho. Abandu b’oMungu banemulendera omo ‘nzira yʼobubuyirire’ eyikakolaya omo paradiso y’obunya-kirimu, n’erisondola oko miyisa y’omo Bwami.​—w23.05, aka. 15-19.

Emisyo esura 9, yirimo amahano awakanirye oko bakali babiri bahi ab’ekisosekanio?

Ekitabu ky’Emisyo kikakanaya oko “mukali mukiru” oyo eribirikira liwe likalolaya oko “luholo.” Ekitabu ekyo, kikakanaya n’oko “menge [w’ekwenene],” awasosekanibwe n’omukali, oyo eribirikira liwe likalolaya “omo nzira yʼobowika” n’oko ngebe. (Misyo 9:1, 6, 13, 18)​—w23.06, aka. 22-24.

Omo mibere yiwe y’erikolera Loti, oMungu mwakangania ati omubere w’eriyikehya n’eriyibombeka?

Yehova mwabwira Loti ati alue e Sodomo asaghire oko bitwa. Loti abere alemba-lemba Yehova ati iye n’ekihanda kiwe basaghire omo kayi kake ake Zoari omo mwanya w’erisaghira oko bitwa, Yehova mwamulighira.​—w23.07, aka. 21.

Omukali angakolaki ow’omwiwe amabilebya epornografia?

Litolere inyibuke ngoko siye yulyaleka iba wiwe inyalebya epornografia. Litolere inyayikasa erihira amalengekania wiwe oko bwira bwiwe haghuma n’oMungu n’eribya akalengekania buli oko bakali ababya omw’ihangya-hangya, abakanibweko omo Biblia abasikibawa mutima busana n’eriyiketera oMungu. Anganawatikya iba wiwe eriyihighula oko myatsi eyangaleka inyatoghera omo kitegho ky’erilebya epornografia.​—w23.08, aka. 14-17.

Omughulu tukakanaya n’abandi oko ebyo twikirirye, amenge angatuwatikya ati eribya n’omutima molo?

Twanganalangira eribulyo eryo omundu amatubulya mo kanya k’eriminya ebiri oko mutima wiwe n’emyatsi eyo akatsemera. Aho itukenditoka erimusubirya omo bolo.​—w23.09, aka. 17.

Oko mwatsi w’eribana akaghala, twamighaki oko Maria?

Abere eminya ngoko n’iye yukendisyabuta Masiya, Maria mwabana akaghala erilua oko bandi. Gabrieli na Elizabeti mubasikya Maria yo mutima erilabira Amasako. Netu kutya, twanganabana akaghala erilua oko Bakritso balikyetu.​—w23.10, aka. 15.

Yehova anganasubirya oko misabe yaghu kw’ati?

Yehova akalagha erihulikirira emisabe yetu kandi akalangira nga yihambene yiti n’erisonda liwe. (Yer. 29:12) Anganasubirya oko misabe mighumerera omo nzira esisighene, aliwe akendisyatuwatikya mughulu wosi.​—w23.11, aka. 21-22.

Abanya Roma 5:2 ikakanaya oko “maha,” neryo busanaki omulondo 4 nagho akatasyakanaya oko maha?

Omughulu omundu akowa engulu mbuya, anganabana amaha w’erisyatsemera engebe oko kihugho paradiso. Aliwe omughulu eryendereribwa likamuhikira, n’omughulu akayiyinaya omo maligho, n’eriyilangirira ngoko oMungu amulighire, amaha wiwe akawata kutsibu n’eribya w’ekwenene-kwenene okw’iye.​—w23.12, aka. 12-13.