KITSWEKA 2
Siuleghule okw’iba kutse oko mukali waghu
“Ab’[oMungu, NWT] abirimatania haguma, sihabye mundu oyukagabulabo.”—Mariko 10:9
Yehova anzire “itwanza eritendileghula.” (Mika 6:8, NWT) Eki ni ky’omughaso kutsibu omo ndwa yenyu, kundi ahate eritendileghula sihangabya eriyiketera oghundi. Kandi eriyiketera oghundi likaleka olwanzo ilwakanya.
Munabwire, obutunganane sibuli omo manyumba manene. Eritsunga obunyumba bwaghu, litolere iwayikasa erikola emyatsi ibiri.
1 ENDWA YAGHU YIBYE Y’ERIMBERE OKO BYOSI
EKYO EBIBLIA IKABUGHA: “Muminye ndeke eby’omughaso kulenga ebindi.” (Abanya Filipi 1:10, NWT) Endwa yaghu ni kighuma ky’oko myatsi y’omughaso omo maisha waghu. Yitolere iyabya oko by’erimbere.
Yehova anzire iwatsomana kutsibu iba waghu kutse omukali waghu “ n’eritsemera eribyaho” haghuma. (Omugambuli 9:9) Yehova syakubisire kindu, anzire iwatsomana iba waghu kutse mukali waghu, na kandi anzire obuli mundu iniasondya eritsemesya iba wiwe kutse omukali wiwe. (1 Abanya Korinto 10:24) Iba waghu kutse omukali waghu ayowe ko ni w’omughaso okwiwe kandi ngoko umwanzire.
EKYO WANGAKOLA:
Musondaye endambi y’eritsanga haghuma, kandi ukanganaye oghundi ko niye yo wanzire
Ubye ukabugha uti “itwe” butsira “ingye”
2 TEGHAYA OMUTIMA WAGHU
EKYO EBIBLIA IKABUGHA: “Obuli mundu oyukasamalira omukali n’engumbu nyibi ‘iniamabisingira naye omo mutima wiwe.’ (Matayo 5:28) Omo nzira nyirebe, omundu amabya akalengekania iniane mughotsera n’abandi balume kutse bakali, oyo syamatene ndeke-ndeke n’iba wiwe kutse mukali wiwe.
Yehova ati: ‘Teghaya omutima wawe.’ (Emisyo 4:23; Yeremia 17:9) Eritoka omwatsi oyu, litolere iwateya ameso waghu. (Matayo 5:29, 30) Ukole nga Yobu, oyo wakola endaghane n’ameso wiwe ati syangasamalira owundi mukali n’engumbu nyibi. (Yobu 31:1) Isiwalebaya esyofoto n’esyofilme sy’abandu abali ndumbu. Kandi isiwatsukisaya obwira b’olwanzo n’omundu oyute mulume waghu kutse mukali waghu.
EKYO WANGAKOLA:
Kanganaya abandi ngoko iba waghu kutse mukali waghu y’omundu oyo utsomene kutsibu
Tsomana ngoko akayowa omo mutima, kandi uleke obwira bosibosi obutetsemesaya omulume waghu kutse omukali waghu