Uleke omukania ayilete

Akanuni: “Ekinywa omo mugulu owuwene—ni kibuya kingahi!”—Emi. 15:23.

Ngoko Filipo akola ekyo

Omutuliri Filipo anemukania n’omulume Omuetiopia oyukasoma ekitabu ky’erilinga inianikere omo gali.

EVIDEO: Filipo akatulira omulume Omuetiopia

1. Ulebaye EVIDEO, kutse usome Emibiri 8:30, 31. Neryo ulengekanaye oko mabulyo awali ahikwa hano:

Filipo mwatsukisya ati omukania?
Busanaki eyi yabya nzira y’eritsukisya omukania eyikaleka iniayileta bweghu-bweghu eyaleka omulume iniaminya emyatsi mihya-mihya erilua omo Masako?

Ekyo Filipo akola kikatwighisayaki?

2. Twamakania omo nzira eyikaleka omukania iniayileta bweghu-bweghu ikyanganaleka oyo tukakanaye naye, iniabya inianatulere, n’erituhulikirira.

Ukole nga Filipo

3. Ubye ukayiteghererya. Wamayiteghererya omundu, ngoko akayiwata, n’ebiminyikalo by’obusu bwiwe iwanganamuminya ndeke. Mbino omundu oyu ananzire erikania naghu? Ukanza erikanirya omundu oko Biblia, wanganatsuka omw’ibulya utya, “Unasi ngoko . . . ?” Oyutanzire eribugha isiwamukasira oko mukania.

4. Isiwabya n’ehagha-hagha. Isiwalengekanaya uti ukenditsuka erikania n’omundu oko Biblia aho n’aho. Ulinde akanya k’eritsukisya omukania kayilete bweghu-bweghu. Ekyo kyanganasaba erilinda akandi katambi ukatasyakania n’omundu oyo.

5. Ubinduke erikwamana n’emibere eyamabyaho. Oyo ukakanaya naye anganahulukya omwatsi ogho utalue ulengekenie. Neryo ngambe iwamukanirya omwatsi mulebe owangawatikya omundu; nibya nomo kyangasaba erikania oko ghundi mwatsi we Biblia ogho utalue uteghekire erikaniako.

LEBAYA N’OMO

Omug. 3:1, 7; 1 Kor. 9:22; 2 Kor. 2:17; Kol. 4:6