Epitsa ey’ejukwaa eyiriko ekibenete endata
1922—Hamabilaba emyaka 100
“OMUNGU . . . akatuha erikinda omwisi wa . . . Yesu Kristo.” (1 Kor. 15:57) Ebinywa ebi ebyasombolawa mo risako ly’omwaka 1922, mobyaleka Abigha b’eBiblia ibikirirya ndeke-ndeke ngoko bakendisyahembwa busana n’obutaleghula bwabo. Na kwenene oko mwaka oyo, Yehova mwahemba abatuliri b’omuhwa abo. Mwabawatikya omughulu batsuka eriyilusirya ebitsapo n’erikolesya eradio busana n’eritulaghania ekwenene eyilebirye oBwami bw’oMungu. Neryo omwaka 1922 akasond’ihwa, mokyalangirika ngoko Yehova anemutsumula abandu biwe. Abigha b’eBiblia mobakola omuhindano munene owate angibiriranwa eCedar Point, Ohio, omo Amerika. Ebyabya oko muhindano munene oyo byabiributa bighuma bingyi omo mubírí ogho endondeka ya Yehova ikakola erilua oko mughulu oyo erihika lino.
“ERIYISOGHA ERIKASWEKAYA”
Abandu bangyi babere batsuka eritulira, mobalagha n’oko bitabu bingyi. Abaghala betu b’oko Beteli y’eBrooklyn ibakatsapisaya amagazeti w’omo kibanda kyabo-kyabo, aliwe babya ibakinakolesaya amakambuni w’abandi bandu okw’itsapisya ebitabu by’ebijalada ebikala-kalire. Neryo mohalaba misi mingyi akambuni ikabiritaluka eritsapisya ebitabu ebitosire eby’erikolesya omw’itulira. Busana n’ekyo mughala wetu Rutherford mwabulya mughala wetu Robert Martin nga kyanganatokekana itwabya tukayilusirya ebitabu.
Ah’eritsapisirya ebitabu oko Concord Street omo Brooklyn, New York
Mughala wetu Martin mwabugha ati: “Eryo lyabya eriyisogha erikaswekaya, kundi ekyo n’ibughambu lyabya litolere itwabya n’ekibanda ekirimo amamasini agho tukendibya tukalusiryamo ebitabu byetu byosi.” Baghala betu mobabana omwanya ogho bakendibya bakaliha oko Avenue Concord 18 omo muyi w’eBrooklyn n’erihiramo amamasini.
Omwatsi oyo mw’atatsemesya abandu bosi. Omukulu w’akambuni akabya kakatulusirya ebitabu byetu mwalenderera enyumba yetu nyihya-nyihya eyo. Mwabugha ati: “Muwite oko masini awuwene aw’erilusya ebitabu, aliwe simulimo omundu n’omughuma oyo wasi erikolesyagho. Omo misi ndatu (6) misa mukendibya imwamabitsandya amamasini wosi aya.”
Mughala wetu Martin mwabugha ati, “Omulume oyo mwabya ng’amabugha ekwenene, aliwe twabya itunasi ngoko oMukama akendituwatikya; na kwenene mwatuwatikya.” Mughala wetu Martin mwatateba. Enyuma w’ebiro bike, motwabya tukatsapisya ebitabu 2 000 oko kiro.
Abafundi banimene ahali amamasini w’erilusya ebitabu omo kibanda
ERIHIKYA ENGULU Y’OKO BANDU BANGYI ERILABIRA ERADIO
Eritomeka okw’ibya bakayitsapisirya ebitabu, abandu ba Yehova mobatsuka erikolesya enzira nyihya y’eritulira—ey’erikolesya eradio. Omo Yenga, kiro 26 oMwisi 2, 1922 omwitungyi, mughala wetu Rutherford mwakanirya oko radio kw’engendo y’erimbere. Mwalabya omukania owakabugha ati “Esyomiliyoni sy’abandu abaliho lino sibendisyahola” oko radio ey’eKOG eLos Angeles omo Kalifonia, eAmerika.
Abandu hakuhi 25 000 mobakwama eprograme eyo. Abaghuma ba kubo mobatuma esyobaruha bakakangania erisima lyabo. Ebaruha nguma y’oko baruha esyo yabya ya Willard Ashford, omwikalani w’eSanta Ana, omo Kalifonia. Mwasima mughala wetu Rutherford busana n’omukania oyo “oghuwene n’owalumire.” Kandi mwabugha ati: “Omo kihanda kyaghe mulue abandu basatu abate bangatoka n’erilua omo nyumba kundi ni balwere. Omukania oyu kw’atalyalabibawa oko radio sitwangatokire eryowagho nomo angabere omo parasele eyihererenie netu.”
Omo mayenga awakwama eyindi mikania y’oko radio moyalabibwa. Oko nduli y’omwaka oyo, Akaleberyo k’Omuteya mokakangania ngoko “abandu nga 300 000 babya ibabiryowa omwatsi w’oBwami erilabira [eradio].”
Busana n’emilaghe n’esyobaruha sy’ewasingya esyo abandu batuma, aBigha b’eBiblia mobayisogha erihimba enyumba y’eradio omo kibanza ekyabya eStaten Island, hakuhi n’ebeteli y’eBrooklyn. Emyaka eyakwama, aBigha b’eBiblia mobakolesya eradio eyo, eyabya ikahulwa mo WBBR, erihikya engulu y’oko bandu bangyi omo biharo mina-mina.
“ADV”
Omo Kaleberyo k’Omuteya ak’ekiro 15 oMwisi 6, 1922, mwabya omulaghe owakakanganaya ngoko hakasyabya omuhindano munene eCedar Point, omo Ohio, eritsuka ekiro 5-13 oMwisi 9, 1922. Abigha b’eBiblia mobahika eCedar Point ibanatsemire kutsibu.
Omo mukania wiwe w’eritangirirya, mughala wetu Rutherford mwabugha ati: “Nyikirirye ndeke-ndeke ngoko oMukama . . . akenditsumula omuhindano munene ono kandi ngoko akendikola ekyosi-kyosi omwatsi w’oBwami ahike oko bandu bangyi kutsibu kwilaba kera.” Abalabaya emikania mobahira omo baghala n’abali betu m’omuhwa munene w’eritulira.
Ekikumula ky’abandu kine oko muhindano munene owabya eCedar Point, Ohio
Neryo omo Tano, ekiro 8 oMwisi 9, abandu 8000 mobahika omo nyumba eyabya m’omuhindano munene oyo, ibanalindirire kutsibu erihulikirira omukania wa mughala wetu Rutherford. Babya balindirire bati akendikangania ebinywa “ADV” ebyabya bihandikire oko mialiko nga bisondir’ibugha bitiki. Babere bakikala, abangyi mobalangira ekitambara kinene ekilingire ikine endata oko jukwaa. Arthur Claus, owe Tulsa, omo Oklahoma, eAmerika, mwikala omo mwanya owuwene owangaleka iniakwama emikania yo ndeke, kandi kyabya kikalire erikwama emihindano yo ndeke kundi ebiro ebyo isihali ebyuma ebikongera omulenge.
“Motwakwama ndeke obuli kinywa”
Eritoka erikakirya ebyangakenderya omughulu mughala wetu Rutherford akalabaya omukania, omuhanganiri mwabugha ati oyukendihika omukania oyo akalaba syendilighirwa er’ingira omo nyumba y’omuhindano oko ndambi eyo. Oko saha isatu n’ekitswe omo makyakya (9:30), mughala wetu Rutherford mwatangirirya omukania wiwe omo binywa bya Yesu bino ebiri omo Matayo 4:17: “Obwami bw’elubula buli hakuhi.” Omughulu akanaya ngoko abandu bangowire engulu y’oBwami obo, mwabugha ati: “Yesu iyowe-wene mwabugha ati omo mughulu w’erihika liwe hakendisyabya erighesa abandu biwe, n’ibughambu erihindania abandu b’ekwenene kandi abataleghula.”
Mughala wetu Claus, oyo wabya inyanikere omo nyumba y’omuhindano mwabugha ati: “Motwakwama ndeke obuli kinywa.” Aliwe mughala wetu Claus omw’itsumbukania mwowa omubiri wo muhanda, neryo mokyamusaba erilua omo nyumba y’omuhindano. Arthur mwalwamo inyanaponire, kundi inyanasi ngoko syendisyalighirwa eringira mughala wetu Rutherford inyanemulabya omukania.
Habere halaba katambi kake, mwatsuka eriyowa ndeke. Mwabugha ati abere akasuba omo nyumba, mwowa abandu bakabanda oko byala. Ekyo mokyaleka iniakangamuka! Mwalangira inyatolere erikwama ekitswe ekyabya ikikisigha ky’omukania mubuyanga oyo nomo kyamusaba erisambira oko lutwe lw’enyumba. Mughala wetu Claus, omulwana w’emyaka 23 oko mughulu oyo, mwabana ah’erisambira oko nyumba amahika oko lutwe. Ehidirisa ehy’oko lutwe ehikalabaya ekyakakala hyabya ihinakingwire, mwabugha ati “mwowa omulenge wo ndeke abihika hakuhi nahyo.”
Aliwe Arthur syabya oko lutwe kw’iyuwene. Mweyayo n’abandi bira biwe. Omughuma wa kubo, ye Frank Johnson, mwaya aho ali n’erimubulya ati: “Wanganayira aho h’oko kahamba akatwire?”
Arthur mwabugha ati, “Inga, nangwite kuko.”
Frank mwamusubirya ati, “Wamabya kisubiryo ky’oko musabe wetu. Wanamalangira ekitambara ekilingire eki? Kiri ng’ekibenete, kandi kibohwerwe oko misumali eyi. Tuhulikirire ndeke oMutsweri.a Akendibya abugha ati, ‘neryo mutulaghanaye, mutulaghanaye,’ neryo iwatwa emiriki ini eyi.”
Arthur, mwawata oko muhamba k’omo byala biwe akalindirira haghuma n’abira biwe, mughala wetu Rutherford abughe ebyangaleka inyaminya ngoko endambi y’eritwa esyokamba yamahika. Neryo mughala wetu Rutherford mwahika oko kitswe ky’omughaso eky’omukania wiwe. Busana n’obutseme bunene mughala wetu Rutherford alinga anganabya imwabugha omo mulenge munene akabugha ati: “Mubye bataleghula n’aBimiri b’ekwenene b’oMukama. Muyitsingirire omo malwa erihika aho ebisomo byosi by’amabehi byasyatsandibwa. Mutsatsange engulu y’ehosi-hosi. Litolere ekihugho ikyaminya ngoko Yehova ni Mungu na Yesu Kristo ko ni Mwami w’abami n’oMukama w’abakama. Ono ni mughulu w’omughaso munene omo historia y’abandu. Mulebaye, oMwami anemutabala! Muwite omubírí w’eribwira obuli mundu y’oko mwatsi oyo. Neryo, mutulaghanaye, mutulaghanaye, mutulaghanaye, oMwami n’oBwami bwiwe!”
Arthur mwabugha ati iye n’abandi baghala betu mobatwa esyokamba n’ekitambara kinene mokyayilingola. Esyoherufi “ADV,” syabya kikuhi ky’ekinywa ky’eKingereza ‘advertise,’ ekyabya kikamanyisya: “Mutulaghanaye oMwami n’oBwami.”
OMUBÍRÍ W’OMUGHASO
Omuhindano munene owabya eCedar Point mwawatikya abaghala betu eritasyayitsingirira kutsibu omo mubírí w’eritulira, n’ababya bayiteghekire erikolagho mobatsema erisangira kugho. Omukolpota (oyukahulawa lino mo mupainia) owe Oklahoma, eAmerika, mwahandika ati, “Ekiharo ekyo twabya tukatulira mw’engulu yowene kyabyamo emine eyo bakatakulamo e charbon (amakala w’amabwe), kandi yabya abera.” Mwabugha ati omughulu babya bakowa ebiri omo gazeti ye Amuka!, “ibakatsuka erilira.” Kandi mwabugha ati, “Tukatsema kutsibu kundi twanganatoka eribakirania.”
Abigha b’eBiblia aba mobalangira omughaso w’erikola omubírí owali omo Luka 10:2 wo luba: “Eby’erighesa ni bingyi, nikwa abahingyi ni bake.” Oko nduli y’omwaka oyo, mobayisogha kundu eritulaghania engulu mbuya y’oBwami y’oko bandu bangyi omo kihugho kyosi.
a Mughala wetu Rutherford inyakahulawa mo “Mutsweri” kundi mughulu mulebe mwanakola omubírí w’omutsweri w’eMissouri, omo Amerika.