Ulole embere erikwama Yesu enyuma w’eribatisibwa

1-2. Omundu akabana emiyisa yahi abibatisibwa?

KIKATSEMESAYA eribatisibwa n’eribya mughuma w’omo kihanda ky’Abimiri ba Yehova. Ni lusunzo lunene eribya n’obwira obunokire haghuma na Yehova. Tukalighirana n’ebinywa bya Daudi oyo wabugha ati: ‘Obutseme buli ukwʼabo [Yehova] akayisoga, abo akaleta erikala aho wiwe habuyirire.’​—Esy. 65:4.

² Yehova akaleta omo kihanda kiwe mw’abandu ba muhanda wahi? Ngoko tulyalangira omo mwatsi owalyalaba, Yehova akasonda eriyitunda hakuhi n’abandu abakakanganaya ndeke-ndeke ngoko banzire eribya bira biwe. (Yak. 4:8) Omughulu ukayisogha eriherera engebe yaghu oko Yehova n’eribatisibwa, ukabya n’obwira bw’embaghane haghuma na Yehova. Wikiriraye ngoko enyuma w’olubatiso lwaghu Yehova akendisyakukingulira ‘amadirisa wʼelubula nʼerikutulirako omuyisa, isihangabanika obwaga.’​—Mal. 3:10; Yer. 17:7, 8.

3. Abakristo ababiriyiherera oko Yehova n’eribatisibwa litolere ibakolaki? (Omughambuli 5:4, 5)

³ Olubatiso lukakukingulira omulango ow’eringira omo mubiiri wa Yehova. Enyuma w’olubatiso lwaghu wangananza eriyikasa erisikya eriyilagha lyaghu oko Yehova n’erisighala mutaleghula okw’iye, nibya n’omughulu wamalengwako kutse n’omughulu unemulaba omo myatsi eyikalire. (Soma Omughambuli 5:4, 5.) Ng’omwigha wa Yesu, ukendikwama eky’erileberyako kiwe n’erisikya ebyalayiro biwe ngoko wangatoka. (Mat. 28:19, 20; 1 Pet. 2:21) Omwatsi ono akendikuwatikya erikola ekyo.

ULOLE EMBERE ERIKWAMA YESU NOMO UNEMULABA OMO MALIGHO N’AMALENGWAKO

4. Yesu asonda eribugha atiki akabugha ati abigha biwe “basyaheka omuti wabo w’amaghali”? (Luka 9:23)

⁴ Isiwalengekanaya uti enyuma w’eribatisibwa engebe yaghu yikendyoloba. Yesu mwakangania ndeke-ndeke ngoko abigha biwe, ‘basyaheka omuti wabo w’amaghali.’ Oko kwenene, bendibya bakahekagho “mughulu wosi.” (Soma Luka 9:23.) Neryo, Yesu mwanasonda eribugha ati abigha biwe bakendisyabya bakaghalwa mughulu wosi kwe? Ko bite bitya n’ahake. Oko kwenene, Yesu abya akasonda eribugha ati sibendisyabana emiyisa misa, aliwe basyabana n’amaghali. Nibya n’amaghali awakalire.​—2 Tim. 3:12.

5. Ni miyisa yahi eyo Yesu alagha abakayiherera?

⁵ Kwa muhwa, unemwendereribwa n’abomo kihanda kyaghu. Kutse wabirilobya engebe yaghu utoke erihira Obwami b’oMungu bw’embere, neryo siwanzire eribya n’esyofranga nene kutse ebindu binene. (Mat. 6:33) Kyamabya kitya, uminye ngoko Yehova anemulangira ebyosi ebyo unemukola busana naye. (Ebr. 6:10) Alinga wabiriyilangirira ekwenene y’ebinywa bya Yesu bino: “Sihali omundu oyo wabirisigha enyumba, kutse abaghala babo, kutse abali babo, kutse mama wiwe, kutse baba wiwe, kutse abana, kutse amalima, busana naghe na busana n’engulu mbuya, oyutendisyasunga ngendo 100 kwilaba aho oko mughulu ono; amanyumba, abaghala babo, abali babo, abo mama, abana, n’amalima, haghuma n’eryendereribwa; n’oko mughulu owakasa engebe y’erikota.” (Mar. 10:29, 30) Emiyisa yosi eyo wabiribana ni mingyi kwilaba ebindu byosi ebyo wabiriherera.​—Esy. 37:4.

6. Enyuma w’olubatiso busanaki litolere iwalola embere erilwa n’esyongumbu sy’omubiri?

⁶ Kundi sighuhika-hikene, nibya n’enyuma w’eribatisibwa kikendikusaba erilola embere erilwa ‘n’esyongumbu sy’omubiri.’ (1 Yoh. 2:16) Hanganabya endambi, amalengekania waghu inyabya ngo w’omukwenda Paulo. Mwahandika ati: “Ngalangira omo mubiri waghe oghundi mughambo owakalwa n’omughambo owakasondola obwenge bwaghe. Kandi omughambo oyo akaniyiramo mukobe w’omughambo w’erilolo owali omo mubiri waghe.” (Rom. 7:22, 23) Wanganabunika mutima kundi unemulwa n’esyongumbu nyibi. Aliwe eribya ukalengekania oko ebyo walagha Yehova omughulu wayiherera okw’iye, rikendikuha akaghala ak’erikinda amalengwako. Ekwenene y’eno, omughulu unemulaba omo maligho, eriyilagha eryo wakola ery’eriyiherera oko Yehova lyanganakuwatikya. Liti?

7. Eriyiherera lyaghu oko Yehova likendikuwatikya liti erisighala mutaleghula okw’iye?

⁷ Omughulu ukaherera engebe yaghu oko Yehova, ukayighana. Ekyo ni bugha ambu ukaghana erikwama esyongumbu syaghu n’erighana erikola emyatsi eyangahitania Yehova. (Mat. 16:24) Neryo, omughulu wamalengwako ngambe isiwabya n’elindi-lindi. Ukendibya iwabiriyisogha eky’erikola, ni bugha ambu erisighala mutaleghula oko Yehova. Kandi ukendibya ighunayisoghire kundu eritsemesya Yehova. Aho ighukendibya nga Yobu. Nomo anabya akalaba omo maligho awakalire, mwayisogha kundu ati: “Erihika okwʼihola lyage sindiendisyagana eritunganene lyage!”​—Yobu 27:5.

8. Eribya ukalengekania oko musabe waghu w’eriyiherera oko Yehova, kyanganakuwatikya kiti omughulu wamalengwako?

⁸ Eribya ukalengekania ngoko wabiriyiherera oko Yehova, kikendikuha akaghala ak’erikinda amalengwako. Ng’eky’erileberyako, wanganatsuka eribya ukabongera kutse eriyiwata nga wanzisibwe n’omulume kutse omukali wabene? Alinga, siwangakola utya! Wabirilagha Yehova ngoko siwangakola omwatsi owali ng’oyo. Omwikola utya ukabya iwamayihighula oko bitsibu ebyangaluira omo malengekania mabi isyalyahanda emirihi omo mutima waghu. Wamakola ekyo, ukendibya ‘iwamayihigula’ oko “nzira yʼababi.”​—Misyo 4:14, 15.

9. Eribya ukalengekania oko musabe waghu w’eriyiherera oko Yehova, kandi kyanganakuwatikya kiti eribya ukahira Yehova y’embere omo ngebe yaghu?

⁹ Wangayira uti bamabikuha omubiiri owakendileka iwabya ukabula endambi ey’erihindana? Ngambe iwabya ighunasi ekyo ukendikola. Embere ubane omubiiri oyo, wabya iwabiriyisogha ngoko siwangaligha omubiiri owangaleka ighutabya ukahika oko mihindano. Neryo, isiwenditoghera omo kitegho eky’eriligha omubiiri oghuli ng’oyo, ukayiteba uti ukenditoka erihira Yehova y’embere omo ngebe yaghu, kandi ighunemukola n’omubiiri oyo. Eribya tukalengekania oko eky’erileberyako kya Yesu kyanganatuwatikya. Abya inyayisoghire kundu eritsemesya Tata wiwe. Kundi wabiriyiherera oko Yehova, uyisoghe kundu nga Yesu, erighana luba obuli mwatsi owangaleka Yehova inyapona, kandi ngambe iwasikya eriyisogha lyaghu eryo.​—Mat. 4:10; Yoh. 8:29.

10. Enyuma w’eribatisibwa Yehova akendikuwatikya ati “erikwama Yesu ebiro byosi”?

¹⁰ Ekyo ukakola omughulu uli omo maligho kutse omughulu wamalengwako, kyanganakangania nga unanzire ‘erikwama Yesu ebiro byosi’ kutse iyehe. Kandi wanganayiketera ngoko Yehova akendikuwatikya erikwama Yesu. EBiblia ikabugha yiti: “OMungu syalileghula. Syendileka mukaghalwa kulenga ngoko mwangatoka eriyiyinia. Omughulu mukaghalawa, oMungu akendibaha enzira y’eribalamo mutoke eriyiyinia.”​—1 Kor. 10:13.

TWANGALOLA TUTI EMBERE ERIKWAMA YESU?

11. Enzira nguma eyuwene eyangatuwatikya erilola embere erikwama Yesu ye yahi? (Ulebaye n’epitsa.)

¹¹ Yesu mwakolera Yehova n’omutima wiwe wosi, kandi emisabe iyikamuwatikya eriyitunda hakuhi na Yehova. (Luka 6:12) Enzira nguma eyuwene eyangakuwatikya erilola embere erikwama Yesu enyuma w’eribatisibwa, ry’eribya ukakola emyatsi eyangakuwatikya eribya n’obwira obuwatire haghuma na Yehova. EBiblia ikabugha yiti: “Nomo twangabya itwabirilola embere omo lulengo lwahi, situlekere aho.” (Filip. 3:16) Ukendibya ukowa kangyi-kangyi abaghala n’abali betu bakabugha ngoko babihirikira emiradi yabo y’obunya-kirimu. Kwamuhwa, mubasoma oko Kalasi k’Abatuliri b’Obwami, kutse mubahumira eyiri obwagha bw’abatuliri. Wamabilangira iwanganatoka eriyihiriraho omuradi owali ng’oyo, kolakyo! Abandu ba Yehova bakarondekanaya ehyanya hy’erikola bingyi omo mubiiri wiwe. (Emib. 16:9) Neryo wangayira uti wamabya isighuliwahikira emiradi yaghu? Isiwalengekanaya uti alinga uli mundu bule ukayilingirirania n’ababirihikira emiradi yabo. Eky’omughaso ry’erilola embere eriyiyinia. (Mat. 10:22) Isiwibirirawa ngoko Yehova akatsema kutsibu omughulu ukamukolera n’obutoki bwaghu bosi nibya nomo emyatsi yangabya yiti. Eyo yo nzira y’omughaso ey’erilola embere erikwama Yesu enyuma w’eribatisibwa.​—Esy. 26:1.

12-13. Wangakolaki omuhwa waghu amabitsuka erikeha? (1 Abanya Korinto 9:16, 17) (Ulebaya n’akasanduku “Isiwalua omo matangwa.”)

¹² Wangayira ghuti wamalengekania uti emisabe yaghu siyikilua oko mutima kutse wamayowa nga sighukitsemera omubiiri waghu w’eritulira? Kandi wangayira ghuti wamabya isighukitsemera erisoma eBiblia nga kera? Ekyo kyamabikuhikira enyuma w’eribatisibwa, isiwalengekanaya uti alinga sighukiriko ekirimu kya Yehova. Kundi sighuhika-hikene, eriyowa lyaghu lyanganabya likabinduka-binduka. Wamalangira omuhwa waghu inyamatsuka erikeha, ulengekanaye oko ky’erileberyako ky’omukwenda Paulo. Nomo Paulo anabya akayikasa erigha Yesu, mwaminya ngoko hanganabya endambi inyabula omuhwa ow’erikola ekyo atolere erikola. (Soma 1 Abanya Korinto 9:16, 17.) Mwabugha ati: “Nomo nangakola nitya butsira erianza, nisabirwe erikola omubiiri oyo.” Ekyo ni bugha ambu Paulo inyayisoghire kundu erikola omubiiri wiwe w’eritulira nibya n’omughulu amayowa nga syawite omuhwa.

¹³ Naghu kutya, isiwabya ukayisogha erikwamana ngoko wamayowa lisa. Uyisoghe kundu eribya ukakola ekitunganene nibya n’omughulu wamayowa nga siwanzire erikola ghutya. Wamalola embere erikola ekitunganene, eriyowa lyaghu ilyanganabinduka. Nomo bine bitya, wamatendileka eriyighisya bunya-kirimu, erisaba, eribya ukahindana n’eritulira, ighukendilola embere erikwama Yesu enyuma w’eribatisibwa. Abaghala n’abali betu bakabya babilangira ngoko unemuyiyinia ukalola embere erikolera Yehova, ekyo kikabasikaya mutima.​—1 Tes. 5:11.

‘ULOLE EMBERE ERIYILENGAKO . . . N’ERIKANGANIA NGA ULI MUNDU OYULYATI’

14. Ni myatsi yahi eyo utolere iwabya ukayilebyako, kandi busanaki? (2 Abanya Korinto 13:5)

¹⁴ Enyuma w’eribatisibwa litolere iwabya ukalebya nga uli mundu oyulyati. (Soma 2 Abanya Korinto 13:5.) Litolere iwabya ukayibulya kangyi-kangyi nga unemulola embere erisaba, erisoma eBiblia, erihindana, n’eritulira. Uyikase eritasyatsemera emyatsi eyo, n’eribana muyo mw’endundi. Wanganabya ukayibulya amabulyo awali ng’ano: ‘Nanganatoka eryowisya omundu y’amakangirirya w’eBiblia w’omusingi? Hane myatsi eyo nangakokotya nitoke eritasyatsemera omubiiri waghe w’eritulira? Emisabe yaghe yikanalua oko mutima kandi yikanakanganaya ngoko niyiketere Yehova yo kutsibu? Ninabeghere erihika oko mihindano y’endeko? Nangakolaki nitoke eribya ngakwama ndeke emihindano n’erisubirya kuyo?’

15-16. Ekyahikira mughala wetu Robert, kyamatwighisyaki oko mwatsi ow’erikinda erilengwako?

¹⁵ Kandi ni ky’omughaso eribya ukalebya kangyi-kangyi obulema bwaghu nga bo bwahi. Mughala wetu Robert mwayilangirira ekyo, akabugha ati: “Omughulu n’abya n’emyaka 20, inyiwite omubiiri owatenisaba endambi nene. Kiro kighuma enyuma w’omubiiri, omusika oyo tukakola naye mwanyibirikira eka wabo. Mwanibwira ati tukendibyayo itwibene kandi ‘tukendiyitsemesya ndeke.’ Oko nzuko, munatsuka erisondya eby’eriyihambulisyamo, aliwe oko mwiso munaghana, kandi munamubwira ekikaleka.” Kyuwene kundi mughala wetu Robert mwakinda erilengwako eryo. Enyuma, abere abilengekania oko mwatsi oyo, mwalangira ngoko mwatitakindagho ngoko litolere. Akabugha ati: “Munataghana kotso-kotso kandi luba ngoko Yosefu aghana omukali wa Potifari. (Enz. 39:7-9) Oko kwenene munasweka erilangira ngoko mukyanikalako erighana aho n’aho. Omwatsi oyo mwaniwatikya erilangira ngoko nitolere inatasyawatya obwira bwaghe haghuma na Yehova.”

¹⁶ Ni ky’endundi eribya tukayilebya nga mughala wetu Robert. Nomo wanganakinda erilengwako, ngambe iwayibulya uti: ‘Munganaghana aho n’aho kutse mungalinda ndambi nyiri?’ Wamalangira ihamabya omwatsi ogho utolere erikokotya, isiwabunika mutima. Utseme kundi wamabiminya obulema bwaghu. Ubye ukabwira Yehova oko bulema obo, kandi ubye ukakola emyatsi eyangakuwatikya erisikya emighambo yiwe.​—Esy. 139:23, 24.

17. Omughulu tukasighala bataleghula oko Yehova ekyo kikawatikaya kiti eryerya erina liwe?

¹⁷ Hane n’ekindi ekyo twanganigha oko mwatsi owahikira mughala wetu Robert. Akatasyatomekako ati: “Nabere naghana eriya eka wabo, omusika oyo mwanibwira ati: ‘Wamabala!’ Neryo munamubulya ng’amabugha atya busanaki. Mwanibwira ati oghundi murafiki wiwe oyo wabya Mwimiri wa Yehova kera, mwamubwira ati abalwana n’abambesa Abimiri ba Yehova, bamabibana akanya ak’erikola amalolo omo bubiso-biso, bakakolagho. Neryo, omusika oyo twabyatukakola naye mwabwira omurafiki wiwe oyo ati akendinilengako. Munatsema erilangira ngoko erighana lyaghe lyabirisikya erina lya Yehova.”

18. Uyisoghire kundu erikolaki enyuma w’eribatisibwa? (Ulebaye n’akasanduku “Emyatsi ibiri eyikendikutsemesya.”)

¹⁸ Omughulu ukayiherera oko Yehova n’eribatisibwa, ukakanganaya ngoko wanzire eriyira erina liwe mo libuyirire, nomo hangabyaki. Kandi, uminye ngoko Yehova anemulangira amaligho wosi agho unemulabamo n’amalengwako wosi agho unemukinda. Akendikuwatikya erisighala mutaleghula. Uyiketere kundu ngoko Yehova akendikuha ekirimu kiwe kibuyirire kikuwatikaye erisighala mutaleghula. (Luka 11:11-13) Omo buwatikya bwa Yehova wanganalola embere erikwama Yesu enyuma w’eribatisibwa.